ހަނދު ފެނިއްޖެ: ހައްޖު ދުވަހަކީ ޖޫން ފަހެއް، އީދު ވާނީ ހަޔަކަށް
މި އަހަރުގެ ހައްޖު ދުވަހަކީ ޖޫން މަހުގެ ފަސް ވަނަ ދުވަސް ކަމަށް ސައުދީ ސަރުކާރުން ދެންމެ ކަނޑައަޅައިފި އެވެ.
ސައުދި ސަރުކާރުން ކަނޑައަޅާފައިވާ ގޮތުގައި ޒުލްޣައިދާ މަހުގެ އެންމެ ފަހު ދުވަހަކީ މިއަދެވެ. ހައްޖު މަހުގެ އެއްވަނަ ދުވަހަަކީ މާދަމާ އެވެ.
ހައްޖު ދުވަހަކީ އަންނަ މަހުގެ ފަސް ވަނަ ދުވަހުއެވެ. އަދި އަލްހާ އީދު ދުވަހަކީ ހަ ވަނަ ދުވަހެވެ.
ސައުދީ ސަރުކާރުން މިރޭ ބުނީ ހަނދު ފެނިފައިވާތީ މާދަމާ އަކީ ހައްޖު މަހުގެ ފުރަތަމަ ދުވަހުގެ ގޮތުގައި ކަނޑައަޅާފައިވާ ކަމަށެވެ.
މި ފެށުނީ އެންމެ މާތް މައްސަރުތަކުގެ ތެރޭގައި ހިމެނޭ އެއް މަހެވެ. ހައްޖު މަހުގެ ފުރަތަމަ ދިހަ ދުވަހަކީ މާތްވެގެންވާ ދުވަސްތަކެކެވެ. އެ މަހުގެ ފުރަތަމަ ނުވަ ދުވަހު ރޯދަ ހިފުމަކީ ގަދަވެގެންވާ ސުންނަތެވެ. ގުރުއާން ކިޔެވުމާއި ޒިކުރު ކިޔުމާއި ހެޔޮ އަމަލުތަކުގައި ހީވާގިވެ އުޅުން މި ދުވަސްތަކުގައި މުހިންމެވެ.
ހައްޖު މަސް މާދަމާ ފެށޭއިރު މި އަހަރުގެ ހައްޖުގެ އަޅުކަމަށް ދުނިޔޭގެ އެކި ކަންކޮޅުތަކުން މައްކާއަށް މުސްލިމުން ދަނީ ޖަމާވަމުންނެވެ. ރާއްޖޭގެ ދެ ގުރޫޕެއް މިހާރު ވަނީ ސައުދީއަށް ގޮސްފަ އެވެ.
މި އަހަރު ވެސް ހައްޖުގެ އަޅުކަމަށް ދެ މިލިއަނަށް ވުރެ ގިނަ މުސްލިމުން ވަނީ މާތްވެގެން މައްކާއަށް ޖަމާވާނެ އެވެ. ރާއްޖެއިން 1،000 މީހުން މިއަހަރު ހައްޖަށް ދާނެ އެވެ.
Advertisement
This content is created and paid for by advertisers and does not involve Voice Journalists
