ދިވެހިރާއްޖޭގައި ބޭންކިން ހިދުމަތް ދިނުމަށް ޕްރީ-އޮޕަރޭޝަނަލް ހުއްދަ ދެ ކުންފުންޏަކަށް ދީފި އެވެ.
މޯލްޑިވްސް މަނިޓަރީ އޮތޯރިޓީން މިއަދު ބުނީ ދިވެހިރާއްޖޭގައި މާލީ ނިޒާމް ހަރުދަނާކޮށް ކުރިއެރުވުމަށް އެ އޮތޯރިޓީއިން ކުރަމުންދާ މަސައްކަތްތަކުގެ ތެރެއިން ރާއްޖޭގައި ބޭންކިން ހިދުމަތް ދިނުމަށް ބޭނުންވާ ޕްރީ-އޮޕަރޭޝަނަލް ހުއްދަ ދެ ކުންފުންޏަކަށް ދީފައިވާ ކަމަށެވެ.
އެ ހުއްދަތައް ދިނީ މި މަހުގެ 19 ވަނަ ދުވަހު ކަމަށް ވެސް ބުންޏެވެ.
އެއީ މޯލްޑިވްސް ފައިނޭންސް އެންޑް ލީސިންގ ކޮމްޕެނީ (އެމްއެފްއެލްސީ) އާއި ބީއައިސީ ބޭންކް މޯލްޑިވްސް ޕްރައިވެޓް ލިމިޓެޑަަށެވެ.
ބޭންކިން ޚިދުމަތް ދިނުމަށް ދެ ކުންފުންޏަކަށް ހުއްދަ ދިނުން -- ފޮޓޯ: އެމްއެމްއޭ
މޯލްޑިވްސް ފައިނޭންސް އެންޑް ލީސިން އަށް ހުއްދަ ދިނީ މޯލްޑިވްސް ފައިނޭންސް އެންޑް ލީސިން ބޭންކްގެ ނަމުގައި ޓިއާ އެކެއް ބޭންކްއަކަށް ބަދަލުކުރުމަށެވެ. ބީއައިސީ ބޭންކް މޯލްޑިވްސް ޕްރައިވެޓް ލިމިޓެޑަށް ހުއްދަ ދިނީ ބީއައިސީ ބޭންކް މޯލްޑިވްސްގެ ނަމުގައި ބެންކްއެއް ގާއިމްކުރުމަށެވެ.
މި ހުއްދަތަކާއެކު، ހިދުމަތް ފެށުގެ ކުރިން ފުރިހަމަ ކުރަންޖެހޭނެ ކަމަށް އެ އޮތޯރިޓީއިން ކަނޑައަޅާ ޝަރުތުތައް ފުރިހަމަކުރުމުން މި ދެ ކުންފުންޏަށް ރާއްޖޭގައި ބޭންކިން ހިދުމަތް ދިނުމުގެ ހުއްދަ ދޭނެ ކަމަށް އެމްއެމްއޭ އިން ބުންޏެވެ.
އެމްއެމްއޭ އިން ބުނީ އެ އޮތޯރިޓީން ދެކޭގޮތުގައި މިއީ މާލީ ހޖދުމަތްތައް ފުޅާކޮށް ވާދަވެރިކަން އިތުރުކޮށް އަދި ރާއްޖޭގެ މާލީ ދާއިރާގެ ދުރު ރާސްތާގެ ކުރިއެރުމަށް އެހީތެރިވެދޭނެ މުހިންމު ފިޔަވަޅުތަކެއް ކަމަށެވެ.
ދިވެހިރާއްޖޭގައި ބޭންކިން ހިދުމަތް ދިނުމަށް ޕްރީ-އޮޕަރޭޝަނަލް ހުއްދަ ދެ ކުންފުންޏަކަށް ދީފައިވާއިރު މި ވަގުތު ހަތް ބެންކަކުން ދަނީ ރާއްޖޭގައި ޚިދުމަތް ދެމުންނެވެ.
Advertisement
This content is created and paid for by advertisers and does not involve Voice Journalists
