މި ސަރުކާރުގައި ކޮރަޕްޝަން ހިންގުމަށް އެއްވެސް ފުރުސަތެއް ނޯންނާނެ ކަމަށާ އެއްވެސް ވެރިއަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ފުރުސަތު ނުދެއްވާނެ ކަަމަށް ހުޅުދޫ ދާއިރާގެ މެންބަރު މުހައްމަދު ޝާހިދު މިރޭ ވިދާޅުވެއްޖެ އެވެ.

ޝާހިދު މިހެން ވިދާޅުވީ މިރޭ އޮތް ކޮންގްރެސް ޕާޓީގެ ހަރުގެ ޖަލްސާގައި ވާހަކަ ދައްކަވަމުންނެވެ. ސަރުކާރުގެ ވަޒީރުންނާއި ކޮންގްރެސްގެ މަޖިލީސް މެންބަރުން އަދި އެ ޕާޓީގެ ގިނަ އަދަދެއްގެ ސަޕޯޓަރުން ބައިވެރިވި ޖަލްސާގައި ވާހަކަ ދައްކަވަމުން ޝާހިދު ވިދާޅުވީ މި ސަރުކާރާއެކު ކޮރަޕްޝަން ހިންގުން ނިމުމަކަށް އައީ ކަމަށެވެ.

އަދި ވިދާޅުވީ ކޮރަޕްޝަން އޮންނާނީ ތަޅުލާފައި ކަމަށެވެ. 

"މި ސަރުކާރު އަައުމާއެކު ކޮރަޕްޝަން އޮންނާނީ ތަޅުލާފައި. ތަޅުލާފައި އޮންނާނީ. ލާހިކެއް ނޫން ހިންގާކަށް. ނުހިންގޭނެ. ނުހިންގާ އެއްޗެއްގެ ވާހަކަ ކިހިނެތް ދައްކާނީ. ހިންގޭނެ ފުރުސަތެއް ރައީސް ނުދެއްވައޭ އެއްވެސް ވެރިއަކަށް. ކަރަޕްޝަން އޮންނާނީ މަނާކޮށްފައި," ޝާހިދު ވިދާޅުވި އެވެ.

ޝާހިދު ވިދާޅުވީ ދައުލަތުގެ ކުންފުންޏެއްގެ ވެރިއަކަށް ވިޔަސް މުއައްސަސާއެއްގެ ވެރިއަކަށް ވިޔަސް އަދި ވަޒީރަކަށް ވިޔަސް ކޮރަޕްޝަންގެ ކުޑަ އަމަލެއް ހިންގުމަށް ވެސް ރައީސް ފުރުސަތު ނުދެއްވާނެ ކަމަށެވެ. އެފަދަ ކޮންމެ ކަމަކަށް ފިޔަވަޅު އަޅުއްވާނެ ކަމަށް ވިދާޅުވި އެވެ.

އެ މަންޒަރު މިހާތަނަށް ވެސް އޮންނާނީ ފެނިފައި ކަަމަށް ވިދާޅުވި އެވެ.

ކޮރަޕްޝަން ތަޅުލުމަށް ފަހު ތަޅުދަނޑި ހަވާލުކޮށްފައި ވާނީ މަޖިލީހުގެ ރައީސް އަބްދުއްރަހީމަށް ކަމަށް ވެސް ޝާހިދު ވިދާޅުވި އެވެ.

"މަޖިލީހުން އަޅުގަނޑުމެން އޮންނާނީ ކޮރަޕްޝަން ހުއްޓުވާފައި ތަޅުލާފައި. ތަޅުދަނޑި އޮންނާނީ މަޖިލީހުގައި ސްޕީކާ އަބްދުއްރަހީމް އަތްޕުޅުގައި," ޝާހިދު ވިދާޅުވި އެވެ.

ޝާހިދު ވިދާޅުވީ ސަރުކާރާ ގުޅޭގޮތުން އިދިކޮޅުން ދައްކާ ވާހަކަތަކުގެ ހަގީގަތް ރައްޔިތުންނަށް އެނގޭ ކަމަށެވެ. އެ ވާހަކަތައް ރައްޔިތުން ގަބޫލު ނުކުރާ ކަމަށް ވެސް ވިދާޅުވި އެވެ.

އަދި ރައްޔިތުންނަށް އަޅާލި އޯގާތެރި ވެރިއަކީ ރައީސް މުއިއްޒު ކަމަށް ވިދާޅުވެ އެމަނިކުފާނުގެ ސަރުކާރުން މިހާތަނަށް ހާސިލުކޮށްފައިވާ ކަންކަން ޝާހިދު ވަނީ ވިދާޅުވެ ދެއްވާފަ އެވެ.