ޙައްޖު ދުވަހާއި އަޟްޙާ ޢީދާ ގުޅިގެން ބަންދުވާނީ، މިހާރުވެސް ކަލަންޑަރުގައި ބަންދު ކަމަށް ކަނޑައަޅާފައިވާ ދުވަސްތައް ކަމަށް ރައީސް އޮފީހުން ބުނެފިއެވެ. 

މިކަން ހާމަކުރެއްވީ ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައެވެ.

ކަލަންޑަރުގައި ވާގޮތުން ޢީދު ދުވަހާއި ގުޅިގެން ބަންދު ކަމުގައި ކަނޑައަޅާފައިވަނީ ޖޫން 6، 7، 8 އަދި 9 ވަނަ ދުވަހެވެ. އެއީ ހުކުރު، ހޮނިހިރު، އާދިއްތަ އަދި ހޯމަ ދުވަހެކެވެ. އެއާ ވިދިގެން އަންނަ އަންގާރަ، ބުދަ އަދި ބުރާސްފަތި ދުވަހަކީ ރަސްމީ ދުވަސް ތަކެވެ. 

ނަމަވެސް ގިނަ ބަޔަކު އަންނަނީ، އެ ތިން ދުވަސްވެސް ސަރުކާރު ބަންދު ދުވަސް ކަމުގައި ކަނޑައަޅެމުށް އެދި މީސް މީޑިއާގައި ޝުޢޫރުފާޅުކުރަމުންނެވެ.  

އެކަމާއި ގުޅިގެން އެކްސްގައި ކުރެއްވި ޕޯސްޓެއްގައި ހީނާ ވިދާޅުވީ، މިއަހަރުގެ ޙަައްޖު ދުވަސް ދިމާވަނީ، 5 ޖޫން ވާ ބުރާސްފަތި ދުވަހާ ކަމުގައި ސަޢޫދީޢަރަބިއްޔާއިން ކަނޑައަޅުއްވާފައުވާތީ، ޢީދާއި ގުޅިގެން ސަރުކާރު ބަންދު ދުވަސްތަކަށް ބަދަލެއް ނާންނާނެ ކަމަށެވެ.  

ކަލަންޑަރުގައި ވާގޮތުން މިއަހަރުގެ އަޟުހާ ޢީދު ދުވަސް ވަނީ ޖޫން 6 ވާ ހުކުރު ދުވަހަށެވެ.