އއ. އުކުޅަހު ސްކޫލުގެ ޕްރިންސިޕަލް، ޝަހުލާ އިމާދު އާއި ގުޅިގެން އެތައް ބެލެނިވެރިންނާއި ޓީޗަރުން ކަންބޮޑުވުން ފާޅުކޮށް، މިނިސްޓްރީއަށް އެތަކެއް ޕެޓިޝަނެއް ލާފައިވަނިކޮށް، އޭނާ އެހެން ސްކޫލަކަށް ބަދަލުކުރަން މިނިސްޓްރީން ނިންމައިފިއެވެ. 

އަންނަ ބުރާސްފަތި ދުވަހުން ފެށިގެން އުކުޅަހު ސްކޫލްގައި ޝަހުލާ އަދާކުރަމުންދިޔަ ވަޒީފާއިން ވަކިކޮށް، އއ. އަތޮޅު ސްކޫލަށް އޭނާ ބަދަލު ކުރުމުގެ މަސައްކަތް ކުރަމުންދާ ކަމަށް ބުނެ އެޑިޔުކޭޝަން މިނިސްޓްރީން މިއަދު އޭނާއަށް ސިޓީއެއް ފޮނުވާފައިވާ ކަމަށާ، އެކަން ކުރީ އޭނާ، ލޯކަލް ކައުންސިލް އިންތިޚާބުގައި ޕީއެންސީއަށް ވޯޓު ނުދޭނެ ކަމަށް ބުނުމުން ކަމަށް ނޫހަކުން މިއަދު ވަނީ ރިޕޯޓް ކޮށްފައެވެ. 
ނަމަވެސް، މި މައްސަލާގައި ކަން ހިނގާފައިވާ ގޮތް، ސާފުކުރުމަށް ”ވޮއިސް“ އިން އެރަށުގެ ބެލެނިވެރިންނާއި ޓީޗަރުންނާއި ސުވާލު ކުރުމުން އެފަރާތްތަކުން މައުލޫމާތު ދީފައިވާ ގޮތުން، މިނިސްޓްރީން މިފަދަ ނިންމުމެއް ނިންމާފައި މިވަނީ، ޝަހުލާ ބަދަލު ކުރުމަށް އެދި ޓީޗަރުންނާއި ބެލެނިވެރިން މިނިސްޓްރީގައި އެތައް ފަހަރުމަތީން އެދިފައިވަނިކޮށެވެ. 

”ވޮއިސް“ އަށް މައުލޫތު ދެއްވަމުން އުކުޅަހު ސްކޫލްގެ އިސް ފަރާތެއް ބުނީ، ޝަހުލާ ޕްރިންސިޕަލް ކަމުގެ މަޤާމަށް ވަޑައިގެންނެވީވެސް ނުގަވާޢިދުން ކަމަށެވެ. އެގޮތުން އެކަން ހިނގައި ދިޔަގޮތް ހާމަކުރައްވައި އޭނާ ބުނީ، ޑިސެމްބަރ 2019 ވަނަ އަހަރު އުކުޅަހު ސުކޫލުގެ ޕްރިންސިޕަލް ކަމުގެ މަޤާމުގައި ހުރި ބޭފުޅާ މަޤާމުން ވަކިވުމާއި ގުޅިގެން ގުޅިގެން އެމަޤާމް ހުސްވެ، ޖެނުއަރީ 2020 އުކުޅަހު ސުކޫލުގެ ހުސްވަފައިވާ ޕްރިންސިޕަލް ކަމުގެ މަޤާމަށް ބޭފުޅަކު ހަމަޖެހިފައިވާކަމަށް އެޑިޔުކޭޝަނުން ސުކޫލަށް އެންގި ކަމަށެވެ.

މިއެންގުމާއި ގުޅިގެން އެކަމަށް ސުކޫލުން ތައްޔާރުވެ ހުރިހާ ކަމެއް ހަމަޖެއްސާފައި ވަނިކޮށް 2020 ވަނަ އަހަރުގެ ޖެނުއަރީމަހުގެ 16 ވަނަ ދުވަހު އެއްވެސް މަޤާމެއް، އަދި ރަސްމީ ލިޔުމެއްވެސް ނެތި ސުކޫލުގެ ހިންގުން ކުއްލިގޮތެއްގައި ޝަހުލާ ޢިމާދުއާއި ވަގުތީ ގޮތުން ހަވާލުކޮށްފައިވާ ކަމަށާ، އެކަން އެގޮތަށް ކުރީ ސިޔާސީ ބާރާއި ނުފޫޒު ބޭނުންކޮށްގެން ކަމަށެވެ. ޝަހުލާގެ އާއިލާ އަކީ އޭރު ވެރިކަމުގައި އޮތް އެމްޑީޕީގެ އިސްފަރާތްތަކާއި ގާތް ގުޅުމެއް އޮންނަ ބައެއް ކަމަށް އެރަށުން މައުލޫމާތު ދެއެވެ. 

ސުކޫލުގެ ހިންގުން ހަވާލުކުރިއިރުވެސް ޝަހުލާ ޢިމާދުގެ ޕްރިންސިޕަލް ކަމުގެ ޝަރުތު ހަމަނުވާ ކަމުގައި ސިވިލް ސާރވިސްއިން ސުކޫލަށް އަންގާފައިވާތީ ޖެނުއަރީ 16 އިން ފެށިގެން 3 މަސްދުވަސް ވަންދެން ޝަހުލާ ޢިމާދު ސްކޫލުގެ އެންމެ އިސް ފަރާތް ކަމުގައި ބަހައްޓާފައިވަނީ އެއްވެސް މަޤާމަކަށް ހަމަނުޖައްސައި ކަމަށް އެ ސުކޫލުން ވޮއިސް އަށް މައުލޫމާތު ދިން މީހާ ބުނެއެވެ. އަދި އެފަހުން ސްކޫލުގައި ހުސްކޮށް އިން ހެލްތު އަދި ފިޒިކަލް އެޑިޔުކޭޝަން (އެޗް.ޕީ.އީ) ޓީޗަރުގެ މަޤާމަށް ވަގުތީ ޓީޗަރެއްގެ ގޮތުގައި އޭނާ ހަމަޖައްސާފައިވާއިރު އޭގެ ފަހުން ޕްރިންސިޕަލްގެ ގޮތުގައި ޝަހުލާ އުޅެފައިވަނީ އުކުޅަހު ސުކޫލުގެ ހެލްތު އަދި ފިޒިކަލް އެޑިޔުކޭޝަން (އެޗް.ޕީ.އީ) ޓީޗަރެއްގެ މަޤާމުގައި ހުރެގެން ކަމަށްވެސް މައުލޫމާތު ލިބިފައިވެއެވެ. 

ޕްރިންސިޕަލަކު ނެތި ގާތްގަނޑަކަށް އަހަރެއް ވަންދެން ސްކޫލްގެ ހިންގުން ޝަހުލާއާއި ހަވާލުކޮށްގެން ކުރިއަށް ގެންދިޔުމަށްފަހު، 2021 ވަނަ އަހަރު ނޮވެމްބަރު މަހު 17 ވަނަ ދުވަހު އުކުޅަހު ސުކޫލަށް ޕްރިންސިޕަލަކު ހޯދަން އިޢުލާންކުރެވުނެވެ. މި އިއުލާން ކޮށްފައިވަނީ ޕްރިންސިޕަލް ކަމަށް ކުރިމަތިލާން ބޭނުންވާ ތަޢުލީމީ ޝަރުތުތައް ފުރިހަމަކުރުމަށްޓަކައި ޝަހުލާ ހަދަމުންދިޔަ  ކޯސްވެސް ނިމިފައިވަނިކޮށް ކަމަށް އެރަށުން މައުލޫމާތު ދިން މީހާ ބުންޏެވެ.

ޖުމްލަ4 ފަރާތަކުން ކުރިމަތިލައިގެން ޕްރިންސިޕަލަކު ހޮވުމަށް ކުރިއަށް ގެންދިޔަ އިންޓަވިޔުއާއި ދެފަހަރެއްގެ މަތީން އާއްމުކުރި އޭ2 ޝީޓުން ސެޓިފިކެޓްތަކަށް ޕޮއިންޓް ދިނުމުގައި މައްސަލަތަކެއް ހުރިކަމަށާ، އިންޓަވިޔުގައި ޕެނަލިސްޓުންގެ މެދުގައި އެކަކަށް (ޝަހުލާއަށް)މާކްސް ދިނުމުގައި ބޮޑެތި ތަފާތުތައް ހުރިކަން ފާހަގަކުރެވުނު ކަމަށާ، އެމައްސަލަ މިނިސްޓްރީއަށް ހުށައެޅުމުންވެސް އެދެވިގެންވާ އެއްވެސް ޖަވާބެއް ލިބިފައި ނެތްކަމަށް ސުކޫލުން މައުލޫމާތު ދިން މީހާ ބުންޏެވެ. 

މިނިސްޓްރީގެ ޤަވާޢިދު ބުނާގޮތުން އުކުޅަހު ސުކޫލުގައި ތިބެން ޖެހޭނީ 4 ލީޑިން ޓީޗަރުންނެވެ. ނަމަވެސް އުކުޅަހު ސުކޫލު ހިންގުމަށްޓަކައި ޕްރިންސިޕަލްގެ ޚާއްޞަ ނެންގެވުމަކުން އިތުރު 2 މީހަކު ލީޑިން ޓީޗަރުންގެ ގޮތުގައި ނަންގަވައި އެޓީޗަރުންގެ އަޞްލު ކިޔަވައިދިނުމުގެ ގަޑިތައް މަދުކޮށް އެހެން ޓީޗަރުންނަށް ބުރަވާގޮތަށް ކިޔަވައިދިނުން ތަރުތީބު ކުރެވިފައިވާކަމަށް ސުކޫލުގައި މަސައްކަތްކުރާ ޓީޗަރަކު ”ވޮއިސް“ އަށް މައުލޫމާތު ދީފައިވެއެ.

މީގެ އިތުރުން، ދަރިވަރުންނަށް ކިޔަވައި ދިނުމަށް ފަސޭހަވާ ގޮތަށް ކަންކަން ބައްޓަން ކުރުމަށް ޓީޗަރުންގެ ފަރާތުން އެދުމުން އެކަމަށް ބީރު ކަންފަތެއްދީ، އޭނާ ބޭނުން ގޮތަކަށް ކަން ނުކުރާނަމަ، ފިޔަވަޅު އަޅާނެ ކަމުގެ އިންޒާރު އެތައް ފަހަރަކު ޓީޗަރުންނަށް ދީފައިވާ ކަމަށް މައުލޫމާތު ލިބެއެވެ.

މިގޮތުގެ މަތީން، އިންޒާރުދީ، އެރަށު ސްކޫލުގައި މަސައްކަތްކުރި 4 ޓީޗަރަކު މިދިޔަ ސަރުކާރުގައި ސަސްޕެންޑްވެސް ކޮށްފައިވެއެވެ. އެ ޓީޗަރުން ސަސްޕެންޑްކުރުވީ، މިޔުޒިކާއި އެކު ކުޑަކުދިންނަށް ނަށަން ދަސްކޮށްދިނުމަށް އިންކާރުކުރުމުނެވެ. ސަސްޕެންޑްކުރި ޓީޗަރުންގެ ތެރެއިން އެކަކު ވަޒީފާއިންވެސް ވަކިކުރިއެވެ.

ވޮއިސް އަށް މައުލޫމާތު ދެމުން ބެލެނިވެރިއަކު ބުނެފައިވާ ގޮތުން، މި އަހަރު އޯ ލެވެލް ހަދަމުންދާ ދަރިވަރުންނަށް ކިޔަވައި ދިނުމަށް އިތުރުގަޑިތައް ނެގުމާއި އިތުރު އެހީ ހޯދަން ޖެހޭ ކުދިންނަށް އެ ފުރުސަތު ފަހި ކޮށްދިނުމަށްވެސް ޕްރިންސިޕަލްގެ ފަރާތުން މަސައްކަތެއް ނުކުރެއެވެ. 

އޯލެވެލް ދަރިވަރުންނަށް ގިނަ ވަގުތު ދިނުމަށް މިދުވަސްކޮޅު އެހެން ގަޑިތައް މަދުކޮށްލަދޭން އެދުމުން ޕްރިންސިޕަލްގެ ފަރާތުން އެކަމަށް އެއްބާރުލުން ނުދިންކަން ”ވޮއިސް“ އަށް މައުލޫމާތު ދިން ޓީޗަރުންވެސް ފާހަގަކުރިއެވެ. 

މިކަންކަމުގެ އިތުރުންވެސް، އުކުޅަށް ސްކޫލުގެ ލައިބްރަރީއަށް އަޅާނުލުމުގެ ސަބަބުން އެތަނުގައި ހުރި ފޮތްތަކަކާއި ބެލެނިވެރިން ހަދިޔާކޯސްފައި ހުރި ފޮތްތަކެއްވެސް ހަލާކުވެގެން ގޮސްފައިވާކަން ޓީޗަރުން ފާހަގަކިރެއެވެ. ނަތީޖާއެއްގެ ގޮތުން، ކުދިންގެ ޢިލްމު ތަނަވަސްކުރުމަށް ކިޔާނެ ފޮތް ލިބޭނެ މަގު ހަނިވެ، ލައިބްރަރީގެ ބޭނުންވެސް ކުދިންނަށް ފުރިހަމައަށް ނުހިފޭގޮތް ވަނީ ވެފައެވެ. 

މިފަދަ އެތަކެއް މައްސަލަތަކެއް ގާތްގަނޑަކަށް 2021 ވަނަ އަހަރުން ފެށިގެންވެސް ފެންމަތިވަމުން އައިސްފައިވާއިރު، އެ މައްސަލަ ސަރުކާރުގެ ކަމާބެހޭ އިދާރާތަކަށްވެސް ސްކޫލުގެ ޓީޗަރުންނާއި ބެލެނިވެރިން ވަނީ ހުށަހަޅާފައެވެ. އެގޮތުން، އެކި ފަހަރުމަތިން، ޓިޗަރުންނާއި ބެލެނިވެރިން ސޮއި ކޮށް ޕެޓިޝަންތަކަާއި ސިޓީތައް އެޑިޔުކޭޝަން މިނިސްޓްރީއަށް ލީ ނަމަވެސް، އެ މިނިސްޓްރީން ދެނީ އެންމެ ޖަވާބެކެވެ.

މިފަދަ މައްސަލަތައްވެސް ސިޔާސީ ފަރާތްތަކާއި ގުޅިގެން “އޮއްބާލަނީ“ ކަމަށް ޓީޗަރުންނާއި ބެލެނިވެރިން ބުނެއެވެ. 

މި މައްސަލާގައި، 2021 ވަނަ އަހަރުން ފެށިގެން މިއަދާއި ހަމައަށް، 10 އަށްވުރެ ގިނަ ޕެޓިޝަނާ ސިޓީ ބެލެނިވެރިންނާއި ޓީޗަރުންގެ ފަރާތުން މިނިސްޓްރީއަށް ހުށަހަޅާފައިވާ ކަމަށް ”ވޮއިސް“ އަށް މައުލޫމާތު ލިބެއެވެ. އަދި ޕްރިންސިޕަލް އާއި ގުޅުންހުރި މައްސަލަތަކަާއެކު ޓީޗަރުންގެ ވަފުދެއް އެޑިޔުކޭޝަން މިނިސްޓްރާވެސް ބައްދަލު ކޮށްފައިވާ ކަމަށް މައުލޫމާތު ލިބެއެވެ.

ހަމައެހެންމެ، ދާދިފަހުންވެސް ޕްރިންސިޕަލް ވަކިކޮށްދިނުމަށްއެދި ޓީޗަރުންނާއި  ބެލެނިވެރިން ހިމެނޭހެން ޕެޓިޝަނެއް މިނިސްޓްރީއަށް ހުށަހަޅާފައި ވެއެވެ. 

މި މައްސަލާގައި އެޑިޔުކޭޝަން މިނިސްޓްރީގެ ބަހެއް ހޯދާލަން ”ވޮއިސް“ އިން އެތައް ފަހަރު ގުޅުމުންވެސް އަދި މެސެޖު ކުރުމުންވެސް ޖަވާބެއް ލިބޭ ގޮތް ވަނީ ނުވެއެވެ.