ޔޫތު މިނިސްޓްރީގެ 2018 އިން 2023 ވަނަ އަހަރުގެ އޮޑިޓް ރިޕޯޓްގައި ތަހުގީގު ކުރަންޖެހޭ ކަމަށް އޮޑިޓަރު ޖެނެރަލް ފާހަގަ ކޮށްފައިވާ ދެ މައްސަލައާ އެއްވެސް ގުޅުމެއް ނެތް ކަން ސާފުކޮށްދީ އެކަމުގެ ހެކިތައް ކުރީގެ ޔޫތު މިނިސްޓަރު އަހްމަދު މަހްލޫފް ދައްކަވައިފި އެވެ.

އާންމުކޮށްފައިވާ ޔޫތު މިނިސްޓްރީގެ އޮޑިޓް ރިޕޯޓްގައި ދެ މައްސަލައެއް ފާހަގަކޮށްފައިވެ އެވެ. ރައީސް ސޯލިހްގެ ވެރިކަމުގައި އެންމެ ރަނގަޅު ނަތީޖާއެއް ނެރުނު ޔޫތު މިނިސްޓްރީގެ އޮޑިޓް ރިޕޯޓާއި ގުޅިގެން ދެކެވޭ ވާހަކަތަކުގެ ހަގީގަތް ސާފުކޮށް ދެއްވާ ކުރީގެ މިނިސްޓަރު މަހްލޫފް ވަނީ ސޯޝަލް މީޑިއާގައި ދިގު ބަޔާނެއް ހިއްސާ ކުރައްވާފަ އެވެ.

މަހްލޫފް ވިދާޅުވި ގޮތުގައި 2023 ވަނަ އަހަރުގެ އެންމެފަހު ބައްދަލުވުމުގައިވެސް، ބޮޑެތި މައްސަލަތަކެއް ނެތް ކަމަށް އޮޑިޓަރުން މިނިސްޓްރީގެ ވެރިންނަށް ވަނީ މައުލޫމާތު ދެއްވާފަ އެވެ. އަދި ކޮންމެ އަހަރަކުވެސް ޔޫތު މިނިސްޓްރީ އޮޑިޓް ކޮށްފައިވާއިރު، ފަސް އަހަރު ތެރޭ އެންމެ ފަހަރަކުވެސް އެއްވެސް ކަމެއް އިސްލާހުކުރަން ރަސްމީ އަދި ނުރަސްމީ ލަފައެއް ވެސް ދީފައެއް ނުވެ އެވެ.

ފުރަތަމަ ކަމަކަށް މަހްލޫފް ފާހަގަ ކުރެއްވި ކަމަކީ އޮޑިޓް ރިޕޯޓު އަހަރުން އަހަރަށް ނެރެން ޖެހޭ ކަމެވެ.

"..ފަހަރުގައި އެކަން ނުވަނީ ބަޖެޓު ނެތިގެން ނަމަވެސް، 7 އަހަރު ފަހުން 576 ޕްރޮޖެކްޓު ހިންގި މިނިސްޓްރީއެއްގެ އޮޑިޓް ރިޕޯޓު ނެރޭނަމަ، ކަމެއް އިސްލާހު ކުރަން ވެސް ފުރުސަތު ނުލިބޭނެ އެވެ. ރައީސް ނޫނީ ވަޒީރަށް ފިޔަވަޅެއް އަޅަން ފުރުސަތެއް ނުލިބޭނެ އެވެ. އަދި ރިޕޯޓު ނިންމާއިރު މައުލޫމާތު ދޭން ތިބޭނީ އަލަށް އުފެދޭ ސަރުކާރެއްގެ ބައެއް ކަމުން އެންމެ ފުރިހަމަ މައުލޫމާތު ދޭނެ ކަމަށް ގަބޫލެއް ނުކުރެވެ އެވެ. ލިޔެކިއުން ފުރިހަމަ ކޮށްދޭނެ ކަމަށް ނުދެކެމެވެ," އޮޑިޓް ރިޕޯޓް ނެރުމުގައި މިހާރު އަމަލު ކުރެވޭ ގޮތާމެދު މަހްލޫފްގެ ހިޔާލު ހިއްސާ ކުރައްވާ ވިދާޅުވި އެވެ.

މިހާރު އާންމުކޮށްފައިވާ އޮޑިޓް ރިޕޯޓަކީ ރައީސް ޔާމީންގެ ސަރުކާރާއި ރައީސް ޞާލިހު އަދި ރައީސް ޑރ.މުއިއްޒުގެ ސަރުކާރު ވެސް ހިމެނޭހެން ނެރެފައިވާ ރިޕޯޓެކެވެ. އަދި ވަރަށް ބޮޑެތި އޮޅުންއަރާފަދަ މައުލޫމާތުތައްވެސް ރިޕޯޓުގައި ހުރިކަން މަހްލޫފް ވަނީ ފާހަގަ ކުރައްވާފަ އެވެ.

ޔޫތު މިނިސްޓްރީ އިން 576 ޕްރޮޖެކްޓު ހިންގި އިރު އޭގެ ތެރޭގައި ތަހުގީގު ކުރަން ޖެހޭ ކަމަށް އޮޑިޓް އޮފީހުން ފާހަގަ ކޮށްފައިވަނީ އެންމެ 2 މައްސަލަ އެވެ. އޭގެ ތެރެއިން އެއް މައްސަލަ އަކީ ފުޓުބޯޅަ ސްކޫލުގެ މައްސަލަ އެވެ. ނަަމަވެސް އެއީ ރައީސް ސޯލިހް ވެރިކަމާއި ހަވާލުވުމުގެ ކުރިން ފަށާފައިވާ މަސައްކަތެއްކަން މަހްލޫފް ފާހަގަ ކުރެއްވި އެވެ.

ދެން ހިމެނެނީ ޔޫތު މިނިސްޓްރީއަށް ގަނެފައިވާ ވެހިކަލްތަކާއި ގުޅޭ މައްސަލަ އެކެވެ. މަހްލޫފް ވިދާޅުވި ގޮތުގައި ކޮންޓްރެކްޓަރު އޮޅުވާލައިގެން އައު ވެހިކަލެއް ގޮތަށް ވިއްކާފައިވާތީ ކޮންޓްރެކްޓަރުގެ މައްސަލަ މިނިސްޓްރީގެ ފަރާތުން ފުލުހުންނަށް ވަނީ ހުށައަޅާފަ އެވެ. އަދި އެ ކަމުގައި ވެސް މިނިސްޓްރީގެ މައްސަލައެއް ނެތް ކަމަށް ވިދާޅުވި އެވެ.

"ދެންފާހަގަ ކޮށްފައިވަނީ ރަނގަޅު ކުރަންޖެހޭ ކަމަށް އޮޑިޓް އޮފީހަށް ފެންނަ ބައެއް ކަންކަމެވެ. އަހަރުން އަހަރަށް އޮޑިޓް ރިޕޯޓު އާއްމުކުރެވޭނަމަ، އަދި އިސްލާހު ކުރަން ޖެހޭ ކަމަށް މިނިސްޓްރީއަށް ގަބޫލުކުރެވޭ ކަންކަން މަޝްވަރަާކޮށް އިސްލާހު ކުރަން މުވައްޒަފުންނަށް ފަސޭހަވާނެއެވެ," މަހްލޫފް ވިދާޅުވި އެވެ.

މަހްލޫފް ވަނީ އޮޑިޓްގައި އިސްލާހު ކުރަން ޖެހޭ ކަމަށް ބުނެފައިވާ ކަންކަމާއި ގުޅޭގޮތުން ތަފްސީލު ގޮތެއްގައި މައުލޫމާތު ހިއްސާ ކުރައްވާފަ އެވެ. އެއް ކަމަކަށް ފާހަގަ ކުރެއްވީ ބޮޑު ފުޓުބޯޅަ ދަނޑުގެ މަސައްކަތުގެ ސަބް ބޭސް އަދި ޓާފްގެ މަސައްކަތް ވަކިވަކިން އިއުލާން ކޮށްގެން މަސައްކަތް ކުރި ސަބަބެވެ. ވިދާޅުވީ އެކަން ކުރީ އެ މަސައްކަތް ވަކިވަކިން ކުރުމަށް ގާނޫނުން ޖާގަލިބޭ ކަމަށް ގަބޫލު ކުރެވޭތީ ކަމަށެވެ.

އަދި އެ ދެ މަސައްކަތް އެއްކޮށް ކުރަން އިއުލާނު ކުރުމުން ލިބުނު އަގަށްވުރެ ހެޔޮއަގުގައި ދައުލަތަށް ފައިދާވާ ގޮތަށް ވަކިވަކިން މަސައްކަތް ކުރެވޭތީ ކަމަށް ވިދާޅުވި އެވެ. މީގެ އިތުރުން ގިނަ މަސައްކަތްތަކެއް އަވަހަށް ކުރެވޭތީ ކަމަށް ވެސް ވިދާޅުވި އެވެ. މި ސަރުކާރުން ވެސް ވަކިވަކިން އެ މަސައްކަތް ކުރިއަށް ގެންދަނީ އެ ސަބަބާ ހެދި ކަމަށް ގަބޫލުކުރެވޭ ކަމަށް ވިދާޅުވި އެވެ.

މީގެ އިތުރުން މިނިސްޓްރީން ހިންގާފައިވާ މަޝްރޫއުތަކުގެ މައުލޫމާތު ފޯރުކޮށްދިނުމަށް، މިނިސްޓްރީން ހިއްސާކޮށްފައިވާ ލިސްޓު (އެކްސެލް ފައިލް) އެއްގައި ބައެއް މައުލޫމާތުތައް ފުރިހަމަނުވުމަކީ، ޕްރޮޖެކްޓެއް ހިންގަން ބޭނުންވާ ލިކެކިއުން ފުރިހަމަ ނުވުން ނޫން ކަމަށް ވެސް މަހްލޫފް ފާހަގަ ކުރެއްވި އެވެ. އެއީ ލިޔެކިއުން ނެތުމެއް ނޫން ކަމަށާ ލިޔެކިއުން ގަސްތުގައި ފުރިހަމަނުކޮށް މުވައްޒަފުން މަސައްކަތެއްކޮށްފައި ހުންނާނެ ކަމަަށް ގަބޫލެއް ނުކުރައްވާ ކަމަށް ވެސް ވިދާޅުވި އެވެ.

ދެން ފާހަގަ ކުރެެއްވީ ކުޅިވަރު ސާމާނަކީ ލިއުމުން ކައުންސިލްތަކަށް ނޫންނަމަ ކުލަބް ޖަމިއްޔާއަކަށް ހަވާލުކޮށް، އެފަރާތުން އަންގާ ފަރާތަކާ ހަވާލު ކުރާ ސާމާނު ކަމެވެ. އަދި ބައެއް ޔޫތު ސެންޓަރުތައް ނުބެލެހެއްޓޭކަން ފާހަގަކޮށްފައިވާއިރު، ލާމަރުކަޒީ ގާނޫނަށް ގެނައި އިސްލާހާއިއެކު ޔޫތު ސެންޓަރުންތައް ހިންގުން ވަނީ ކައުންސިލްތަކާއި ހަވާލުކޮށްފައި ކަން މަހްލޫފް ފާހަގަ ކުރެއްވި އެވެ.

އޮޑިޓް ރިޕޯޓުގައި ފާހަގަކޮށްފައިވާ ކުޅިވަރު އެސޯސިއޭޝަންތަކަށް ކޮށްފައިވާ ހަރަދުތަކަކީ ރައީސް ސޯލިހްގެ ސަރުކާރުގެ ކުރީގެ ހަރަދު ތަފްސީލެއް ކަމަށާ މިނިސްޓްރީއިން ގައުމީ ކުޅިވަރު އެސޯސިއޭޝަންތަކަށް ފައިސާ ދޫކުރަމުން ގެންދާނީ، ހަރަދު ތަފްސީލު މިނިސްޓްރީއަށް ހުށައަޅާ ގޮތަށް ކަމަށް މަހްލޫފް ވިދާޅުވި އެވެ. އަދި އެތަފްސީލު ލިޔުމުން ފެންނަން ހުންނާ ކަން ފާހަގަ ކުރެއްވި އެވެ.

މީގެ އިތުރުން ބައެއް ފިކްސްޑް އެސެޓްސް ގެއްލިފައިވާ ކަމަށް އޮޑިޓްގައި ވާއިރު އޭގަވަނީ މި ސަރުކާރުން ސްޕޯޓްސް އަދި ޔޫތު މިނިސްޓްރީ ވަކިކުރިއިރު ގެއްލިގެން މީޑިއާގައި ރިޕޯޓުކޮށްފައިވާ ބައެއް ސާމާނު ކަން ވެސް މަހްލޫފް ފާހަގަ ކުރެއްވި އެވެ.

މަހްލޫފް ވިދާޅުވީ ވަރަށް ބާރަށް 576 ޕްރޮޖެކްޓު ކުރިއަށްދިޔައިރު އިސްލާހު ކުރަންޖެހޭ ކަންކަން ހުންނާނެ ކަން ގަބޫލު ކުރައްވާ ކަމަށެވެ. އަދި ކޮރަޕްޝަންގެ މައްސަލައެއް އޮތްނަމަ ތަހުގީގު ކުރަން ޖެހޭނެ ކަމަށް ދެކެވަޑައިގަންނަވާ ކަމަށް ވިދާޅުވި އެވެ.

"އެންމެ ގިނަ ޕްރޮޖެކްޓު ހިންގި އެއް މިނިސްޓްރީއަށް [ޔޫތު މިނިސްޓްރީ] ވެފައި ތަހުގީގު ކުރަންޖެހޭ އަދި އެއީ އަޅުގަނޑުމެންނާއި ގުޅުމެއްވެސް ނެތް އެންމެ ދެ މައްސަލަ ކަމަށް ވީކަމީ، މިނިސްޓްރީގެ މުވައްޒަފުން ވަރަށް ރަނގަޅު މަސައްކަތްތަކެއް ކޮށްފައިވާކަމުގެ ހެއްކެކެވެ," އޮޑިޓް ރިޕޯޓްގައިވާ ވާހަކަތަކުގެ ހަގީގަތް ހާމަކޮށްދެއްވާ ކުރީގެ ޔޫތު މިނިސްޓަރު މަހްލޫފް ވިދާޅުވި އެެވެ.