ޕާކިސްތާނުގައި އަހަރެއްގެ މައްޗަށް 700 ބިލިޔަން އިންޑިޔާ ރުޕީސް ނުވަތަ 2.5 ބިލިޔަން އެމެރިކާ ޑޮލަރު ހޭދަވާކަމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ ތަފާސްހިސާބުތަކުން ދައްކައިފިއެވެ.

ދުނިޔޭގެ ސިއްޙަތު ޖަމުޢިއްޔާ ނެރެފައިވާ ރިޕޯޓެއްގައި ބުނެފައިވަނީ، ޕާކިސްތާނުގައި އަހަރެއްގެ މައްޗަށް 700 ބިލިޔަން ރުޕީ ނުވަތަ 2.5 ބިލިޔަން އެމެރިކާ ޑޮލަރު ދުންފަތަށް ހޭދަވެއެވެ. މި ރިޕޯޓުގައި ބުނެފައިވަނީ، އަހަރުން އަހަރަށް ދުންފަތަށް ކުރާ ހޭދަ މައްޗަށްދާއިރު، ދުންފަތުގެ ސަބަބުން ޖެހޭ ބަލިތަށް ވެސް އެ ޤައުމުގައި އިތުރުވަމުންދާ ކަމަށެވެ.

ރިޕޯޓްގައިވާގޮތުން ދުންފަތުގެ ސަބަބުން އެ ބޭނުންކުރާ މީހުން ކެންސަރާއި އެނޫންވެސް ބަލިތަކަށް ހުށަހެޅޭ މިންވަރު އަންނަނީ އިތުރުވަމުންނެވެ. އޭގެއިތުރުން ދުންފަތުގެ އިސްތިއުމާލު ނުކުރާ ފަރާތްކަށް ވެސް އޭގެ ސަބަބުން އެތައް ގެއްލުންތަކެއް ލިބެއެވެ. އޭގެތެރޭގައި، އެމީހުންނަށް ލިބޭ ދަރިން އައިބުވުން ފާހަގަކޮށްލެވެއެވެ.

ދުންފަތުން ކުރިއަށް އޮތް ޖީލު ސަލާމަތްކުރުމަށްޓަކައި ދުންފަތުން ނެގޭ ޓެކްސް ބޮޑުކުރުމާއި، މީހުން ހޭލުންތެރިކުރުމުގެ ޕްރޮގްރާމްތައް ކުރިޔަށް ގެންދިއުން މުހިއްމުކަމަށް އެ ޖަމުޢިއްޔާއިން ވަނީ ބުނެފައެވެ. ދުންފަތުން ނެގޭ ޓެކުހުގެ ސަބަބުން ދުންފަތުގެ އިސްތިއުމާލު ކުރާ ފަރާތްތަކުގެ އަދަދު މަދުވެ، ޤައުމަށް ލިބޭ އާމްދަނީ އިތުރުވެ އަދި ސިއްޙީ ދާއިރާއަށް ވެސް އޭގެ ސަބަބުން ކުރިއެރުން ލިބޭނެކަމަށް ވަނީ ފާހަގަކޮށްފައެވެ. 

2023 ވަނަ އަހަރުގައި ޕާކިސްތާނުގައި ހެދުނު ދިރާސާއެއްގައިވާ ގޮތުން، އެޤައުމުގައި ދުންފަތުންނެގޭ ޓެކްސް ބޮޑުކުރުމުގެ ސަބަބުން ދުންފަތް ބޭނުންކުރާ މީހުންގެ %19.2 މީހުންވަނީ ދުންފަތާ ދުރުވެފައެވެ. 

ދުންފަތުގެ އިސްތިއުމާލުކުރުމުގެ ސަބަބުން ދުނިޔެއިން އަހަރަކު 8 މިލިއަނަށްވުރެ ގިނަ މީހުން ދުނިޔެ ދޫކުރާއިރު، މިކަމަކީ އާއްމު ސިއްހަތަށް ކުރިމަތިވެފައިވާ އެންމެބޮޑު ނުރައްކާކަމަށް ދުނިޔޭގެ ސިއްހަތު ޖަމިއްޔާއިން ވަނީ ފާހަގަކޮށްފައެވެ.