މޯލްޑިވްސް ޕޯސްޓް ލިމިޓެޑްގެ ނަމުގައި ސްކޭމް މެސެޖުތަކެއް ކުރަމުންދާތީ، ސަމާލުވުމަށް އެކުންފުނިން އިލްތިމާސްކޮށްފިއެވެ.

ޕޯސްޓު އޮފީހުން މީސްމީޑިއާގައި ކޮށްފައިވާ ޕޯސްޓެއްގައި ބުނީ، ކަސްޓަމަރުގެ އެޑްރެސް ނުބައިކޮށް ޖަހާފައި އިނުމުން ޕެކޭޖް ޑެލިވަރ ނުކުރެވިފައިވާކަމަށް ބުނެ އެ އޮފީހުގެ ނަމުގައި ސްކޭމް މެސެޖުތަކެއް ކުރަމުންދާ ކަމަށެވެ.

އަދި އެ މެސެޖުގައި، ރަނގަޅު އެޑްރެސް ޖެހުމަށް އެދި ލިންކެއް ދީފައިވާކަންވެސް ފާހަގަކޮށްފައިވެއެވެ. 

ޕޯސްޓް އޮފީހުން އިތުރަށް ބުނީ، އައިޓަމްގެ ޑެލިވަރީ އެޑްރެސް ހޯދުމަށް ޕޯސްޓުން އެއްވެސް ކަސްޓަމަރަކަށް މެސެޖެއް ނުކުރާނެކަމަށެވެ. އެހެންކަމުން، ޒާތީ އަދި މާލީ މައުލޫމާތު ރައްކާތެރިކުރުމަށްޓަކައި، މިފަދަ ލިންކްތަކަށް ނުފިތުމަށް ޕޯސްޓު އޮފީހުން ވަނީ އިލްތިމާސްކޮށްފައެވެ.

ޕޯސްޓު އޮފީހުގެ ނަމުގައި މިފަދަ ސްކޭމް މެސެޖުތަކެއް ދައުރު ކުރަން ފަށާފައި މިވަނީ، މިފަހުން ޓެމޫއިން ގެންނަ ތަކެތި ލިބުން ލަސްވެ ގިނަ ބަޔަކު ޝަކުވާކުރަމުންދާ ދަނޑިވަޅެއްގައެވެ.

ނަމަވެސް ޓެމޫއާއި އެހެން ޕްލެޓްފޯމުތަކުންވެސް ރާއްޖެ އެތެރެ ކުރާ ކޮންމެ އެއްޗެއްވެސް ޑެލިވަރީކުރަން ޖެހުމުން ފޯނަށް އަންނާނީ މެޖެސެކެވެ. އޭގައި އެއްވެސް ލިންކެއް ނުހިމެނެއެވެ.