ގެދޮރުވެރިކަމާ ބެހޭ ވުޒާރާގެ ނޫސްވެރިންގެ ބައްދަލުވުމެއް މިއަދު ހަވީރު ބޭއްވުމަށް ނިންމައިފިއެވެ. 

ރައީސް އޮފީހުން މިއަދު ބުނެފައިވާ ގޮތުން މި ނޫސްވެރިންގެ ބައްދަލުވުން އޮންނާނީ، މިއަދު ހަވީރު 16:00 ގައި ކަމަށެވެ. އަދި ޕްރެސްކޮންފަރެންސްގައި ނޫސްވެރިންގެ ސުވާލުތަކަށް ޖަވާބު ދެއްވާނީ ގެދޮރުވެރިކަމާ ބެހޭ ވަޒީރު ޑރ. އަބްދުالله މުއްޠަލިބު ކަމަށެވެ. 

ގެދޮރުވެރިކަމާ ބެހޭ ވުޒާރާގެ ނޫސްވެރިންގެ ބައްދަލުވުމެއް މިއަދު އޮންނައިރު، ގެދޮރުވެރިޔާ ސްކީމްގެ ދަށުން ދޫކުރި 4000 ފުލެޓް ލިސްޓަށް ޝަކުވާ ހުށަހަޅަން ހުޅުވާލި މުއްދަތު މިހާރު ވަނީ ހަމަވެފައެވެ.

އެހެންކަމުން، މިއަދުގެ ބައްދަލުވުމުގައި ފްލެޓް ލިސްޓާއި ގުޅޭ ޝަކުވާ ތަކާއި، ދާއިމީ ލިސްޓް އިއުލާނު ކުރާނެ ތާރީޚާ ގުޅޭ މައުލޫމާތު ހާމަކުރައްވާނެ ކަމަށް ބެލެވެއެވެ. 

ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން ދޫކުރުމަށް ނިންމި 4،000 ފްލެޓް ލިސްޓަށް ޝަކުވާ ހުށަހެޅުމަށް ހުޅުވާލުމު މިހާތަނަށް އެންމެ ގިނައިން ޝަކުވާ ހުށަހަޅާފައިވަނީ 3 ކޮޓަރީގެ އެޕާޓްމަންޓްތަކާ ގުޅޭ ޝަކުވާތައްކަމަށް ހައުސިން މިނިސްޓްރީން މީގެ ކުރިން ވަނީ ބުނެފައެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރުން އާއްމުކުރި ފްލެޓް ލިސްޓް މުރާޖައާކުރުމަށްފަހު މި ސަރުކާރުން އަލުން އެ ލިސްޓް އާއްމުކޮށްފައިވަނީ، މިދިޔަ ފެބުރުއަރީމަހުގެ 27 ވަނަ ދުވަހެވެ.