މި ސަރުކާރަށް މިވީ 18 މަސްދުވަސްތެރޭ ސިއްހީ ދާއިރާއަށް ކުރިއެރުން ގެނައުމަށް ގިނަ މަސައްކަތްތަކެއް ކުރެވިފައިވާ ކަން ފާހަގަ ކުރައްވާ ނަންބަރުން އެ ތަފްސީލު, ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ހާމަ ކުރައްވައިފި އެވެ.

އެމަނިކުފާނު އެ ތަފްސީލު ހާމަކުރެއްވީ ދުނިޔޭގެ ސިއްހަތު ދުވަސް ފާހަގަ ކުރުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ މާލޭ ސަރަހައްދުގައި ހުރި ހޮސްޕިޓަލްތަކާއި އަތޮޅު ހޮސްޕިޓަލްތައް އަދި ރަށްރަށުގައި ހުރި ސިއްހީ މަރުކަޒުތަކުގެ ފެންވަރު ރަނގަޅު ކުރުމަށް ހާއްސަ އިސްކަމެއް ދެއްވައިގެން މަސައްކަތް ކުރައްވާފައިވާ ކަމަށެވެ.

އެމަނިކުފާނުގެ ސިއްހީ ސިޔާސަތަކީ ކޮންމެ ރަށަކުން އެކަށީގެންވާ ސިއްހީ ފަރުވާގެ ހިދުމަތް ލިބުން ކަމަށާ އެއްވެސް ރައްޔިތަކު ތަފާތު ނުކޮށް ހަމަހަމަކަމާ އެކު ސިއްހީ ހިދުމަތް ލިބޭކަން ކަށަވަރު ކުރުން ކަމުގައި ވިދާޅުވި އެވެ.

އެ އަމާޒަށް ވާސިލުވުމަށް މިހާތަނަށް ސިއްހީ ދާއިރާގެ ތަރައްގީއަށް 4.3 ބިލިއަން ރުފިޔާގެ މަޝްރޫއު ފައްޓަވާފައިވާ ކަމަށް ވިދާޅުވި އެވެ. 

"ގާތްގަނޑަކަށް ހަތަރުހާސް ތިންސަތޭކަ މިލިއަން ނުވަތަ 4.3 ބިލިއަން ރުފިޔާގެ މަޝްރޫޢުތައް ހަމައެކަނި ސިއްހީ ދާއިރާގައި މިދިޔަ ދޮޅު އަހަރުގެ ތެރޭގައި އެބަ ކުރިއަށްދޭ," ރައީސް ވިދާޅުވި އެވެ.

މިރޭގެ ޖަލްސާގައި ރައީސް ވާހަކަފުޅު ދައްކަވަނީ -- ފޮޓޯ: ރައީސް އޮފީސް

ރައީސް ވިދާޅުވީ އެއީ 60 މަޝްރޫއު ކަމަށެވެ. އޭގެ ތެރެއިން 18 މަޝްރޫއުއަކީ މާލޭ ސަރަހައްދުގައި ފެށިފައިވާ މަޝްރޫއުތައް ކަމުގައި ވިދާޅުވެ ބައެއް ތަފްސީލްތައް ދެއްވި އެވެ.

ރައީސް މިރޭ ވިދާޅުވި ގޮތުގައި އުމްރާނީ ތަރައްގީއާއެެކު އިންސާނީ ވަސީލަތް ތަރައްގީ ކުުރުމަކީ ވެސް ސަރުކާރުން ވަރަށް ބޮޑަށް އިސްކަން ދެއްވާ ކަމެކެވެ. އެ ގޮތުން ސިއްހީ ހިދުމަތްތެރީން އިތުރުކޮށް ފެންވަރު މަތިކުރުމަށް ހާއްސަ އިސްކަމެއް ދެއްވާ ކަމުގައި ވިދާޅުވި އެވެ.

އެގޮތުން މިހާތަނަށް, މި ސަރުކާރުގެ 18 މަސް ދުވަސްތެރޭ ސިއްހީ ދާއިރާ އިން 1200 ވަޒީފާ އުފައްދާފައިވާ ކަން ފާހަގަ ކުރެއްވި އެވެ. ރައީސް ވިދާޅުވީ އޭގެ ތެރެއިން 740 ވަޒީފާ އަކީ މާލެ ސިޓީ ގްރޫޕް އޮފް ހޮސްޕިޓަލްސް އިން އުފައްދާފައިވާ ވަޒީފާތައް ކަމަށެވެ. މިހާތަނަށް މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން ހިންގާ ހޮސްޕިޓަލްތަކަށް 640 މުަވައްޒިފުން ނަގާފައިވާ ކަމަށް ވިދާޅުވި އެވެ.

މިރޭގެ ޖަލްސާގައި ރައީސް ވާހަކަފުޅު ދައްކަވަނީ -- ފޮޓޯ: ރައީސް އޮފީސް

އަދި އަތޮޅުތެރޭގެ ރަށްރަށުގެ ސިއްހީ ހިދުމަތްދޭ ތަންތަނަށް 450 ވުރެ ގިނަ މުވައްޒިފުން ނަގަން ހުއްދަ ދީ އެ މަސައްކަތް ކުރަމުންދާ ކަމަށް ވިދާޅުވި އެވެ. އޭގެ ތެރޭގައި ގިނައީ ޑޮކްޓަރުންނާއި ނަރުހުން ކަން ރައީސް ފާހަގަ ކުރެއްވި އެވެ.

މިރޭގެ ޖަލްސާގައި ރައީސް ވަނީ ނަރުހުން ހޯދުމަށް ވަރަށް ބޮޑަށް ދަތިވާކަން މާލެ ސިޓީ ގްރޫޕް އޮފް ހޮސްޕިޓަލްސް އިން ފާހަގަ ކުރާ ކަމަށް ވިދާޅުވެފަ އެވެ.

އެމަނިކުފާނު ވިދާޅުވީ ނަރުހުންގެ ވަޒީފާއަށް 218 މީހަކު ނެގުމަށް ހުއްދަ ދީފައިވާއިރު އަދިވެސް 70 ވަރަކަށް ނަރުހުން ނުލިބޭ ކަމަށެވެ. ގައުމީ ޔުނިވާސިޓީން ނަރުހުން ތަމްރީނު ކުރުމަށް ވަރަށް ބޮޑު އިސްކަމެއް ދީގެން މަސައްކަތް ކުރަމުންދާ ކަމަށާ އަދި ތަމްރީން ވެގެން ނަރުހުން ވެސް ނިކުންނަމުންދާ ކަމަށެވެ. އެހެން ކަމުން ރައީސް އެދިވަޑައިގަތީ ތަމްރީނު ވެގެން ނިކުންނަ ނަރުުހުން ޚިދުމަތާއި ގުޅުމަށެވެ.