އީދު ދުވަހު ކުޅިވަރުތައް ކުޅެ، އުފާ ފާޅުކުރާން ޖެހޭނީ އިސްލާމީ ހަމަތަކާއި އަހްލާގީ އިމުން ބޭރުނުވާ ގޮތަށް ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދު މުޅި ރާއްޖޭގައި އިއްވި ހުކުރު ހުތުބާގައި ބުނެފައި ވަނީ ހައްޖުގެ މި މާތް މައްސަރުގެތެރޭގައި އަންނަ އެންމެ މުހިންމު އެއް ދުވަހަކީ އަލުހާ އީދު ދުވަސް ކަމަށާ އެއީ އެހެން މީހުންނަށް ހެޔޮކަން ފޯރުވައި އެހީތެރިވުމުގެ ދުވަސް ކަމަށެވެ.
ހައްޖުގެ ބުރަ އަޅުކަމަށް ފަހު، އަންނަނީ އަލްހާ އީދުގެ އުފާވެރި ދުވަސްތައްކަން ފާހަގަ ކޮށް ހުތުބާގައި ބުނެފައި ވަނީ އެއީ ކެއިންބުއިމާއި، ޒީނަތްތެރިވެ އިސްލާމީ ހަމަތަކާ އެއްގޮތްވާ ގޮތުގެ މަތީން ކުޅިވަރުކުޅުމާއި، އުފާ ފާޅުކުރުމުގެ ދުވަސްތަކެއް ކަމަށެވެ.
ނަމަވެސް އިސްލާމްދީނުގައި މިއިން ކޮންމެ މުނާސަބަތެއް ވެސް ފާހަގަކުރެވެނީ މާތް اللهއަށް ކުރެވޭ މަތިވެރި އަޅުކަމަކުން, ޝުކުރުވެރިވުމުގެ ގޮތުން ކުރެވޭ ނަމާދަކުން ކަން ހުތުބާގައި ވަނީ ފާހަގަކޮށްފަ އެވެ.
"އީދު ދުވަހަކީ މުސްލިމުން އުފާ ފާޅުކުރުމުގެ ދުވަހެވެ. ރީތި ހެދުންލައި ޒީނަތްތެރިވުމުގެ ދުވަހެވެ. އެކަކު އަނެކަކަށް ޒިޔާރަތްކޮށް، ތަހުނިޔާ ކިޔުމުގެ ދުވަހެވެ. އީދު ދުވަހު މުސްލިމުން އެކަކު އަނެކަކާ ބައްދަލުވެ، ހެޔޮ ދުއާ އާއި އުފާވެރިކަމުގެ ޝުއޫރުތައް ފާޅުކުރާން ޖެހެ އެވެ. އީދު ދުވަހަކީ އެކަކު އަނެކަކާ ސަލާމްކޮށް އެކަކު އަނެކަކަށް ޒިޔާރަތް ކުރުމުގެ ދުވަހެވެ. އީދު ނަމާދަށްފަހު ގާތްތިމާގެ މީހުންނާއި ރަޙްމަތްތެރީންނަށް ޒިޔާރަތްކޮށް، އީދުގެ ތަހުނިޔާ ކިޔުމާއި އީދު ސަލާމްކުރުން މުސްތަޙައްބުވެގެން ވެއެވެ," ހުތުބާގައިވެ އެވެ.
އީދު ދުވަހު އުފާކުރުމާއި އުފާފާޅުކުރުމަކީ ހުއްދަކަމެއް ކަމަށާ ނަމަވެސް އީދު ދުވަހު ކުޅިވަރުތައް ކުޅެ، އުފާ ފާޅުކުރާން ޖެހޭނީ އިސްލާމީ ހަމަތަކާއި އަހްލާގީ އިމުން ބޭރުނުވާ ގޮތަށް ކަަމަށް ވެސް ހުތުބާގައި ވަނީ ބުނެފަ އެވެ. އަދި އެކަން ކުރަން ޖެހޭނީ ތިމާގެ އަމިއްލަ ނަފުސަށް ވެސް އަދި އެހެން މީހުންނަށް ވެސް ގެއްލުމާއި އުނދަގޫތައް ނުވާނޭ ގޮތަށް އާއްމު މަސްލަހަތަށް ޓަކައި ހެދިފައިވާ ގާނޫނުތަކާއި ގަވާއިދުތަކާ ވެސް ހިލާފު ނުވާ ގޮތެއްގެ މަތީން ކަމަށް ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
