އެކުވެރިކަމުގެ ޗޭނަކުން މުޅި ރާއްޖޭގައި ބަދަހި ގުޅުމެއް އުފެއްދުމުގައި ދިވެހި ސްކައުޓުން ދައްކައިދީފައި ވަނީ ތާރީފު ހައްގު ނަމޫނާއެއް ކަމަށް ރައީސުލްޖުމްހޫރިއްޔާ އަދި ޗީފް ސްކައުޓް, ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދަކީ ރާއްޖޭގައި ސްކައުޓް ހަރަކާތް ފެށުނުތާ 69 އަހަރު ފުރުނު ދުވަހެވެ. ގައުމީ ސްކައުޓް ދުވަހުގެ ގޮތުގައި ފާހަގަ ކުރާ މި މުނާސަބަތާ ގުޅުވާ އެކްސް ގައި ކުރެއްވި ޕޯސްޓެއްގައި ރައީސް ވިދާޅުވީ ގައުމަށް ދިމާވި ކޮންމެ މުހިންމު ކަމަކު ސްކައުޓުން އަބަދުވެސް ތިބެނީ ތައްޔާރަށް ކަމަށެވެ.
އަދި އިޖްތިމާއީ އެހީތެރި ކަމާއި އެކުވެރިކަމުގެ ޗޭނަކުން މުޅި ރާއްޖޭގައި ބަދަހި ގުޅުމެއް އުފެއްދުމުގައި ސްކައުޓުން ދައްކައިދީފައިވަނީ ތާރީފު ހައްގު ނަމޫނާއެއް ކަމަށް ވިދާޅުވި އެވެ.
ދަރިވަރުންތަކެއް ސްކައުޓް ހަރަކާތެއްގައި -- ފޮޓޯ: ސްކައުޓް އެސޯސިއޭޝަން އޮފް މޯލްޑިވްސް
ރައީސް ވަނީ ގައުމީ ސްކައުޓް ދުވަހުގެ ތަހުނިޔާ މި ހަރަކާތުގެ އެހާރާއި މިހާރުގެ ހިދުމަތްތެރީންނަށް އަރިސް ކުރައްވާފަ އެވެ.
ރާއްޖޭގައި ސްކައުޓް ހަރަކާތް ފެށުނީ މީގެ 69 އަހަރު ކުރީން މާލޭގައި މަޖީދިއްޔާ ސުކޫލުގަ އެވެ. އޭގެ އަހަރުތަކެއް ފަހުން އަމިއްލަ ސުކޫލެއް ކަމަށްވާ މާލޭ އިންގްލިޝް ސުކޫލު ގައި ސްކައުޓް ހަރަކާތް ފެށި އެވެ.
އަދި ފަހުން މާލޭގެ ހުރިހާ ސުކޫލެއްގައި އެ ހަރަކާތް ފެށި ސްކައުޓް މޫވްމަންޓް ފުޅާވި އެވެ. މިހާރު އަތޮޅުތެރޭގެ ވަރަށް ގިނަ ރަށްރަށުގައި ވެސް އެ ހަރަކާތް ކުރިއަށް ގެންދެ އެވެ.
ދަރިވަރުންތަކެއް ސްކައުޓް ހަރަކާތެއްގައި -- ފޮޓޯ: ސްކައުޓް އެސޯސިއޭޝަން އޮފް މޯލްޑިވްސް
ސްކައުޓް ހަރަކާތަކީ ދިރިއުޅުމުގެ ތަފާތު ހުނަރުތައް ދަސްކޮށްދޭ ވަރަށް ބޭނުންތެރި ހަރަކާތެކެވެ.
ގައުމީ އެކި ކަންކަމުގައި މިހާރު ވެސް ސްކައުޓުން ގެންދަނީ ވަރަށް ބޮޑު ދައުރެއް އަދާ ކުރަމުންނެވެ.
Advertisement
This content is created and paid for by advertisers and does not involve Voice Journalists
