ރާއްޖޭގެ ހުރިހާ ސަރަހައްދެއްގައި ވެސް ސިއްހީ ހިދުމަތް ވަރުގަދަ ކުރުން އެއީ، ވަރަށް ބޮޑު އިސްކަމެއް ދެއްވައިގެން ކުރައްވަމުން ގެންދަވާ ކަމެއް ކަމަށާ މިއަހަރާއި އަންނަ އަހަރުގެ ތެރޭގައި ރާއްޖޭގެ ސިއްހީ ދާއިރާ، ބޮޑުތަނުން ރަނގަޅު ވެގެންދާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، "ރައްޔިތުންނާއެކު" ސިލްސިލާ ޕޮޑްކާސްޓްގެ ހަތް ވަނަ އެޕިސޯޑްގައި ވާހަކަފުޅު ދައްކަވަމުންނެވެ.

ސިއްހީ ދާއިރާއަކީ، ދިވެހިންގެ ދުޅަހެޔޮކަމަށާއި، އާންމު ދިރިއުޅުމުގެ ފެންވަރު ރަނގަޅު ކުރުމުގައި، އެމަނިކުފާނު އެންމެ އިސްކަމެއް ދެއްވާ އެއް ދާއިރާކަން ފާހަގަކުރައްވައި، ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވިދާޅުވީ، ސިއްހީ ހިދުމަތުގެ ފެންވަރާއި، އުމްރާނީ އަދި އިންސާނީ ވަސީލަތުގެ ގޮތުން ސިއްހީ ދާއިރާ ތަރައްގީ ކުރެއްވުމަށް، މިދިޔަ ދުވަސްކޮޅުގެ ތެރޭގައި، ރާއްޖޭގެ އެކި ރަށްރަށުގައި، ސިއްހީ ކަންކަން ރަނގަޅު ކުރުމަށް ވަރަށްގިނަ މަސައްކަތްތަކެއް ކުރެވިފައިވާ ކަމަށެވެ.

ރާއްޖޭގެ ވެރިކަން ކުރާ، މާލޭ ސިޓީ ސަރަހައްދަކީ މުޅި ރާއްޖޭގެ އާބާދީގެ އެންމެ ބޮޑު އިންސައްތައެއް މިއަދު ވަޒަންވެރިވެގެން ދިރިއުޅޭ ސަރަހައްދަށް ކަމުން ސިއްހީ ދާއިރާ ކުރިއެރުވުމުގެ ގޮތުން މާލޭ ސަރަހައްދުގައި ގިނަ މަސައްކަތްތަކެއް ނިންމައިލެވި، ހިދުމަތް ދޭން ފެށިފައިވާ ކަމަށާ ކުރިއަށް އޮތް ތަނުގައި އެކަން އަދި އެއަށްވުރެ މާބޮޑަށް ވެސް ރަނގަ ޅުކުރެވިގެންދާނެ ކަން ރައީސުލްޖުމްހޫރިއްޔާ ފާހަގަ ކުރެއްވިއެވެ.

ވޭތުވެދިޔަ ހަފްތާއެއްހާ ދުވަހަށްބަލާއިރު، ސިއްހީ ދާއިރާގެ ތަރައްގީ އަށްޓަކައި އަދުގެ ސަރުކާރުން ފެއްޓެވި މުހިންމު މަޝްރޫއުތަކެއްގެ ތެރެއިން ބައެއް މަޝްރޫއުތަކުގައި ހަގީގީ ކުލަޖެހި، އަމަލީ ގޮތުން ރައްޔިތުންނަށް އެކަމުގެ ފައިދާ ވަނީ ކުރަން ފަށާފައި ކަމަށް ވިދާޅުވި އެވެ.

އެގޮތުން، މޯލްޑިވިއަން ބްލަޑް ސާވިސަސްގެ ހިދުމަތްތަކާއި ތެލެސީމިއާ އެންޑް އަދާ ހީމޮގްލޮބިނޯޕަތީސް ސެންޓާ އޮރެންޖް ހިޔާއަށް ބަދަލުކުމުގެ މަސައްކަތް މަޑުޖެހިފައި ވަނިކޮށް، އެއީ ގައުމީ މައްސަލައެއް ކަމުގައި ދެކެވަޑައިގެން ގައުމީ ދިފާއީ ބާރާ އެކަން ހަވާލުކުރައްވައިގެން މަސް ދުވަހުގެ ތެރޭގައި މަސައްކަތް ނިންމައި މެއި 25 ވަނަ ދުވަހު، އެތަނުގެ ހިދުމަތްތައް ރަސްމީކޮށް ފެށުން ރައީސް ފާހަގަ ކުރެއްވި އެވެ.

މި ބަދަލާއެކު ޖާގައިގެ ތަނަވަސްކަން ލިބި، ހިދުމަތް ފޯރުކޮށްދިނުމަށް ވެސް ލުއިފަސޭހަކަން ވަނީ ލިބިފަ އެވެ. އަލަށް ތަރައްގީ ކުރެވުނު ސެންޓަރުގައި ޖެނެރަލް ވޯޑްގެ އިތުރުން އަންހެނުންނަށް ހާއްސަ ވޯޑަކާއި، ކުޑަކުދިންނަށް ހާއްސަ ވޯޑެއް ހިމެނެ އެވެ. އަދި ލޭ ރައްކާކުރުމުގެ ކެޕޭސިޓީ 200 ޕައިންޓަށް އިތުރުކޮށްފައިވެ އެވެ. މީގެއިތުރުން އިންސާނީ އަދި ފަންނީ ވަސީލަތްތައްވެސް ވަނީ އިތުރު ކޮށްފަ އެވެ.

މީގެ އިތުރުން ހުޅުމާލޭ ހޮސްޕިޓަލުގައި ދެމުންދާ އިމަޖެންސީ ހިދުމަތްތަކުގެ ފެންވަރު، ޒަމާނާ އެންމެ އެކަށީގެންވާ ގޮތަށް ބަދަލުކޮށް އެ ހިދުމަތްތައް، މެއި 26 ވަނަ ދުވަހު ރައީސުލްޖުމްހޫރިއްޔާ ވަނީ ފައްޓަވައި ދެއްވާަފަ އެވެ. ޒަމާނީ މެޑިކަލް އާލާތްތަކާއިއެކު ފަރުމާކޮށްފައިވާ މި އިމަޖެންސީ ރޫމުގައި، ކްރިޓިކަލް ބަލިމީހުންނަށް ހާއްސަ ފަރުވާ ދިނުމަށް ރިސަސިޓޭޝަން ރޫމެއްވެސް ގާއިމު ކޮށްފައިވެ އެވެ. ފުރާނައަށް ނުރައްކާވާ ހާލަތުގައި އަވަސް ފަރުވާދެވޭ އެންމެ ފުރިހަމަ އާލާތްތަކާއެކު، މި ރޫމް ތައްޔާރުކޮށްފައި ވަނީ ބޮޑެތި އިމަޖެންސީ ހާލަތްތަކަށް ހާއްސަ އިސްކަމެއް ދީގެންނެވެ.