ހުޅުމާލެ ހޮސްޕިޓަލަށް އާ އިމާރާތެއް، އިތުރު 250 އެނދު
ހުޅުމާލެ ހޮސްޕިޓަލް ތަރައްގީ ކުރުމަށް ވަރަށް އަވަހަށް ބޮޑު މަޝްރޫއުއެއް ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މުއިއްޒުގެ ޕޮޑްކާސްޓްގައި ވާހަކަފުޅު ދައްކަވަމުން އެމަނިކުފާނު މިއަދު ވިދާޅުވީ މުޅި ރާއްޖޭގައި ސިއްހީ ހިދުމަތް ފުޅާކުރެއްވުމަށާއި ރައްޔިތުން އެދޭފަދަ ހިދުމަތެއް ފޯރުކޮށް ދިނުމަށް ވަރަށް ބޮޑު އިސްކަމެއް ދެއްވާ ކަމަށެވެ.
މިހާރު އެންމެ ބޮޑު އާބާދީއެއް އޮތް ހުޅުމާލޭގައި މިވަގުތު ހުރީ އެވަރުގެ އާބާދީއަކަށް ހިދުމަތް ދިނުމަށް ބޭނުންވާ މިންވަރަށް ވުރެ ކުޑަ ހޮސްޕިޓަލެއް ކަމަށް ރައީސް ވިދާޅުވި އެވެ. އެހެން ކަމުން މިހާރު ވެސް އެ ހޮސްޕިޓަލްގެ ހިދުމަތް އިތުރަށް ފުޅާކުރަން ގިނަ މަސައްކަތްތަކެއް ފެށިފައިވާ ކަަމަށް ވިދާޅުވި އެވެ.
އެގޮތުން އިމާޖަންސީ ހިދުމަތް ދެވޭނެ އިންތިޒާމު ދެގުނަ އިތުރުކޮށްފައިވާކަން ފާހަގަ ކުރެއްވި އެވެ. އަދި ޖުލައި މަސް ނިމެންވާއިރަށް ޑައިލިސިސްގެ ހިދުމަތް ފުޅާކުރައްވާނެ ކަމަށް ވިދާޅުވި އެވެ.
އަދި ހުޅުމާލެ ހޮސްޕިޓަލަށް އިތުރު 24 އެނދު އިތުރުކުރައްވާނެ ކަމަށް ވިދާޅުވި އެވެ.
މީގެ އިތުރުން ރައީސް ވިދާޅުވީ ހުޅުމާލެ ހޮސްޕިޓަަލަށް އިތުރު އިމާރާތެއް ކުރުމަށް ނިންމާފައިވާ ކަމަށެވެ. އެއީ 250 އެނދުގެ ޖާގަައިގެ އިމާރާތެއް ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
