ގަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުގެ ޓާސްކް ފޯސްއިން ހޮނިހިރު ދުވަހު ކުރިއަށްގެންދިޔަ އޮޕަރޭޝަނުގެ ތެރެއިން 35 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.

ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީން ހޯދައި ޤާނޫނީ އިމުގެ ތެރެއަށް އެ މީހުން ވެއްދުމުގެ މަސައްކަތް އިމިގްރޭޝަނުން ފަށާފައިވަނީ މިދިޔަ އަހަރުގެ ތެރޭގައެވެ.

އިމިގްރޭޝަނުން ހޮނިހިރު ދުވަހު ހެނދުނު 7:30އާއި 9:15އާ ހަމައަށް ބިދޭސީން އެއްވެ އުޅޭ ސަރަޙައްދެއްކަމަށްވާ ޒިކުރާ މިސްކިތް ސަރަޙައްދާއި ހީނާމާގެ ޕާކިންގ ސަރަޙައްދުގައި ވަނީ ޚާއްސަ އޮޕަރޭޝަނެއް ކުރިއަށްގެންގޮސްފައެވެ.

މި އޮޕަރޭޝަންގެ ތެރެއިން 121 ބިދޭސީއަކު ބަލައި ފާސްކޮށްފައިވާކަމަށާއި އޭގެ ތެރެއިން 35 މީހުންނަކީ ގަވާއިދާ ޚިލާފަށް ރާއްޖޭގައި ދިރިއުޅެމުންދާ ބިދޭސީންކަމަށް އިމިގްރޭޝަނުން ވަނީ ބުނެފައެވެ. އަދި އެ މީހުން މިހާރުވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.

ހަމައެހެންމެ، ބުރާސްފަތި ދުވަހު ކުރިއަށްގެންދިޔަ އޮޕަރޭޝަނުގައި 102 ބިދޭސީއަކު ބަލައި ފާސްކޮށް، ގަވާއިދާ ޚިލާފަށް ރާއްޖޭގައި ދިރިއުޅެމުންދިޔަ 50 މީހަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. އިމިގްރޭޝަނުން ދަނީ ސައްޙަ ވިސާނެތި ވިޔަފާރިތައް ހިންގުމުގައި އުޅޭ ބިދޭސީން ދެނެގަތުމަށްޓަކައި އޮޕަރޭޝަންތަކެއް ކުރިއަށްގެންދަމުންނެވެ. 

ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަކީ ސަރުކާރުން ވަރަށް ބޮޑު އިސްކަމެއް ދީގެން ފަށާފައިވާ މަސައްކަތެކެވެ. އަދި ރާއްޖޭގައި އުޅެމުންދާ ބިދޭސީންގެ އަދަދާއި އެ މީހުންގެ މަޢުލޫމާތު އެއްކުރުމަށްޓަކައި އެ މީހުންގެ ބަޔޯމެޓްރިކް ޑޭޓާ ނެގުންފަދަ މުހިއްމު މަސައްކަތްތަކެއްވެސް ސަރުކާރުން ވަނީ މިހާރު ފަށާފައެވެ.