ހުސްވި މެއި މަހު ރާއްޖެއަށް 135،000 އަށްވުރެ ގިނަ ފަތުރުވެރިން ޒިޔާރާތްކޮށްފައިވާކަމަށް ފަތުރުވެރިކަމާއި ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުގައި މިދިޔަ މެއި މަހު ރާއްޖެއަށް ޖުމުލަ 135,614 ފަތުރުވެރިން ޒިޔާރާތްކޮށްފައިވާއިރު މިދިޔަ އަހަރުގެ މެއި މަހު ރާއްޖެއަށް ޒިޔާރަތް ކޮށްފައިވަނީ 119,873 ފަތުރުވެރިންނެވެ. މިއީ %13.1 ގެ އިތުރުވުމެއްކަން ފާހަގަ ކޮށްލަންޖެހެއެވެ.

ތަފާސްހިސާބުތަކުން ދައްކާގޮތުގައި މިއަހަރުގެ މިހާތަނަށް ޖުމްލަ 966,358 ފަތުރުވެރިން ރާއްޖެއަށް ޒިޔާރާތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 892,243 ފަތުރުވެރިންނާ އަޅާބަލާއިރު %8.3 ގެ އިތުރުވުމެކެވެ. ތަފާސްހިސާބުތަކުން ދައްކާގޮތުގައި މިދިޔަ މަހުވެސް ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތް ކޮށްފައިވަނީ ޗައިނާއިންނެވެ.

- ޗައިނާއިން ޖުމުލަ 115,802 ފަތުރުވެރިން

- އިޓަލީވިލާތުން ޖުމުލަ 81,545 ފަތުރުވެރިން

- އިނގިރޭސިވިލާތުން ޖުމުލަ 98,695 ފަތުރުވެރިން

- ރަޝިޔާއިން ޖުމުލަ 105,059 ފަތުރުވެރިން

- ޖަރުމަނުވިލާތުން ޖުމުލަ 73,772 ފަތުރުވެރިން ވަނީ ޒިޔާރަތް ކޮށްފައެވެ.

މިދިޔަ 2024 ވަނައަހަރު ރާއްޖެއަށް 2 މިލިޔަން ފަތުރުވެރިން ޒިޔާރަތްކޮށްފައިވާއިރު، ސަރުކާރުގެ އަމާޒު ހިފާފަ ހުރީ މިއަހަރު ނިމުމުގެ ކުރިން 2.3 މިލިޔަން ފަތުރުވެރިން ރާއްޖެ ގެނައުމަށެވެ. މި އަމާޒަށް ވާސިލުވުމަށްޓަކައި ފަތުރުވެރިކަމުގެ ސިނާއަތް އިތުރަށް ވަރުގަދަކުރުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންކަން ފާހަގަ ކޮށްލަންޖެހެއެވެ.