ގިނަ ދުވަސްތަކެއް ވަންދެން ބޭނުން ނުކޮށް، ހަލާކުވާން މަގުމައްޗަށް ދޫކޮށްލާފައި ހުރި، 400 އަށްވުރެ ގިނަ އުޅަނދުތައް ނައްތާލައިފިއެވެ. 

ޓްރާންސްޕޯޓް މިނިސްޓްރީގެ ނާއިބު، އަލީ ނިޝާން މިއަދު ވޮއިސްއަށް މައުލޫމާތު ދެއްވަމުން ވިދާޅުވީ، މިނިސްޓްރީގެ މިވަގުތުގެ އެންމެ ބޮޑު އަމާޒަކީ މަގުމަތީގައި ތޮއްޖެހުމުގެ މައްސަލަ ހައްލު ކުރުން ކަމަށެވެ. އެގޮތުން، ޕާކިންގެ ނިޒާމް ރަނގަޅުކޮށް، މަގުމަތީގައި ގިނަ ދުވަސްތަކެއް ވަންދެން ބަހައްޓާފައި ހުންނަ ވެހިކަލްތައް، ޓޯވ ކޮށް އެ ނައްތާލައި، ޕާކިންއާ ގުޅޭގޮތުން އާއްމުން ހޭލުންތެރިކުރުން ކަމަށް އޭނާ ވިދާޅުވުއެވެ.

ނިޝާން ވިދާޅުވީ، ޕާކިންގައި ދިމާވާ އެންމެ ބޮޑު އެއް މައްސަލަ އަކީ އެތަކެއް ދުވަހެއް ވަންދެން އެއްތަނެއްގައި އުޅަނދުގައި ޕާކުކޮށްފައި ބެހެއްޓުން ކަމަށެވެ. އެގޮތުން ބޭނުން ނުކޮށް އެގޮތަށް ބަހައްޓާފައި ހުންނަ އުޅަނދުތަކުގެ ސަބަބުން، އާއްމުކޮށް ބޭނުންކުރާ އުޅަނދުތައް ޕާކު ކުރާނެ ޖާގަ ނުހުންނަ ކަމަށެވެ. 

އެހެން ކަމުން، އެފަދައިން ހަނި ގޯޅިތަކާއި ތަންތަނުގައި ޕާކުކޮށްފައި ގިނަ ދުވަސްދެން ބަހައްޓައި ހަލާކުވާން ފަށާފައިވާ އުޅަނދު ތަކުގެ ތެރެއިން އިންޖީނުވެސް ވަކިވެފައިވާ އުޅަނދުތައް ނައްތާލަމުންދާ ކަމަށާ، އަދި އިންޖީނު ހުރި އުޅަނދުތަކުގެ ވެރިފަރާތްތަކަށް އެތަނުން އުޅަނދު ނެގުމަށް 60 ދުވަހުހެ މުއްދަތެއް ދިނުމަށްފަހު ވެރިފަރާތުން ހަވާލު ނުވާނަމަ އުޅަނދު ނައްތާލާ ކަމަަށް އޭނާ ވިދާޅުވިއެވެ.

ނިޝާން ވިދާޅުވީ، އެފަދައިން އުޅަނދު ޓޯ ކޮށް ނައްތާލުމުން އަލުން އެ ޖާގައަށް އެފަދަ އެހެން އުޅަނދުތައް ގެނެސް ޕާކުކޮށްފައި ހުންނަ މައްސަލަތައްވެސް ފެންމަތިވަމުންދާ ކަމަށެވެ.

ނިޝާން އިތުރަށް ވިދާޅުވީ، ޕާކިން މައްސަލަ ހައްލު ކުރުމަށް ހުޅުމާލެ 4 ބިމެއް ކަނޑައަޅައި 1200 އެއްހާ އުޅަނދު ޕާކު ކުރާނެ ޖާގަ މި ސަރުކާރު އައި ފަހުންވެސް ހެދިފައިވާ ކަމަށެވެ. އެ ޖާގަ ތަކުގައި ހުސް ޖާގަވެސް ހުންނަ ކަމަށާ، އެފަދައިން ކަން ދިމާވަނީ ޕާކު ކުރާނެ ޖާގަ ހުއްޓައި އެތަނުގައި ޕާކު ނުކޮށް، ޕާކު ކުރުން މަނާ، އެހެނަސް ފަސޭހައިން ޕާކު ކުރެވޭ ތަންތަނުގައި ޕާކު ކުރުން ކަމަށް އޭނާ ވިދާޅުވިއެވެ.

އެހެންކަމުން، ޕާކިން މައްސަލަ ހައްލު ވާނީ، ފަރުދީ ޒިންމާވެސް އަދާކޮށް، ޕާކު ކުރާނެ ޖާގައިގައި ޕާކުކުރުމުން ކަމަށް ނިޝާން ވިދާޅުވިއެވެ.