ރާއްޖޭގެ އަސްކަރީ ގާބިލުކަން އިތުރުކޮށް، ސަލާމަތާއި ރައްކާތެރިކަން ކަށަވަރުކުރުމަށް އެހީތެރިވުމުގެ ގޮތުން އޮސްޓްރޭލިއާ ސަރުކާރުން ރާއްޖެއަށް އަސްކަރީ ކަނޑުގެ އުޅަނދެއް ކަމަށްވާ ގާޑިއަން ކްލާސް ޕެޓްރޯލް ބޯޓެއް ހަދިޔާކުރުމަށް ނިންމައިފިއެވެ.
މިކަން އިއުލާން ކޮށްފައިވަނީ، އޮސްޓްރޭލިއާގެ ބޮޑުވަޒީރުގެ ނައިބު އަދި ޑިފެންސް މިނިސްޓަރު ރިޗާޑް މާލްސް ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެެއިން މިއަދު ބަންޑާރަ ކޮށީގައި ބޭއްވި ނޫސްވެރިންގެ ބައްދަލުވުމެއްގައެވެ.
އެކަމާ ގުޅިގެން ޑިފެންސް މިނިސްޓްރީން ނެރުނު ނޫސް ބަޔާނެއްގައި ބުނީ، އެ ބޯޓަކީ ރާއްޖޭގެ ކަނޑުގެ ސަރަހައްދު ރައްކާތެރިކޮށް، އިންޑިއާ ކަނޑުގެ ސަލާމަތާއި ރައްކާތެރިކަމަށް އެހީތެރިވުމުގެ ޤާބިލުކަން އިތުރުކުރުމަށް އެޅޭ މުހިންމު ފިޔަވަޅެއް ކަމަށެވެ.
އަދި ގާޑިއަން ކްލާސް ޕެޓްރޯލް ބޯޓުގެ ސަބަބުން ރާއްޖޭގެ އިޤްތިޞާދީ ސަރަހައްދަށް ޤާނޫނާ ޚިލާފަށް ވަދެ އުޅޭ ބޭރުގެ އުޅަނދުތައް ހުއްޓުވުމަށް މަގުފަހިވާނެ ކަމަށެވެ.
މީގެ އިތުރުން، އޮސްޓްރޭލިއާއިން ވަނީ ރާއްޖެއަށް މަލްޓި-ބީމް އެކޯ ސައުންޑަރެއް ވެސް ހަދިޔާ ކުރާނެ ކަމަށް ބުނެފައެވެ. މި ހައިޑްރޮގްރަފިކް އާލާތާއި އެކު ދެވޭ ތަމްރީނުގެ ސަބަބުން ރާއްޖޭގެ ކަނޑުއަޑީގެ ޗާޓު ތައްޔާރުކުރުމުގެ ޤާބިލުކަން އިތުރުވެ، ކަނޑުގެ ސަލާމަތާއި އިޤްތިޞާދީ ތަރައްޤީއަށް މަގުފަހިވާނެ ކަމަށް މިނިސްޓްރީން ބުނެއެވެ.
ގާޑިއަން ކްލާސް ޕެޓްރޯލް ބޯޓު މިހާރު ވަނީ އުފެއްދުމުގެ މަރުހަލާގައެވެ. އަދި 2026 ވަނަ އަހަރު ނިމުމުގެ ކުރިން މި ބޯޓު ނިންމާލެވޭނެ ކަމަށް ބުނެފައިވާއިރު، އޮސްޓްރޭލިއާއިން ވަނީ ރާއްޖެއާ ގުޅިގެން މި ބޯޓު ބެލެހެއްޓުމާއި މަރާމާތު ކުރުމުގެ ޕްލޭނެއް އެކުލަވާލާނެ ކަމަށް ވެސް ބުނެފައެވެ.
މިކަމާ ގުޅިގެން، ދިފާއީ ވަޒީރު މުހައްމަދު ޣައްސާނު މައުމޫން ވިދާޅުވި ގޮތުގައި، މި ހަދިޔާއަކީ ރާއްޖޭގެ އަސްކަރިއްޔާގެ ގާބިލުކަން އިތުރުކޮށް، ސަލާމަތާއި ރައްކާތެރިކަން ކަށަވަރުކުރުމަށް ކުރާ މަސައްކަތަށް ލިބޭ ބޮޑު ކުރިއެރުމެކެވެ. އަދި މި ވަސީލަތްތަކުގެ ސަބަބުން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ރާއްޖޭގެ އަސްކަރިއްޔާ ކުރިއެރުވުމަށް ކުރައްވާ މަސައްކަތްތަކަށްވެސް ބާރު ލިބިގެންދާނެ ކަމަށް ވަޒީރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
