ދިވެހިރާއްޖޭގެ މިނިވަންކަމަށް 60 އަހަރު ފާހަގަކުރުމަށް މި އަހަރު އާންމުކޮށް ބޭނުންކުރާނެ ލޯގޯއެއް ފަރުމާކުރުމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ހުޅުވާލައިފިއެވެ. އެ ގޮތުން އެންމެ މޮޅު ލޯގޯ ފަރުމާކުރާ ފަރާތަކަށް -/30،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.

މި އިނާމަށް ވާދަކުރަން ބޭނުންވާ ފަރާތްތަކުން ލޯގޯ ފަރުމާކުރުމަށްފަހު 2025 ޖޫން 15 ވާ އާދިއްތަ ދުވަހު އޮފީސް ބަންދުކުރުމުގެ ކުރިން ހުށައެޅުމަށް އެ ވުޒާރާއިން ވަނީ އަންގާފައެެވެ.

އެ ލޯގޯއިން ރަމްޒުކޮށްދޭން ޖެހޭ ކަންތައްތަކެއް އެ ވުޒާރާއިން ވަނީ ފާހަގަކޮށްފައެވެ. 

އެއީ،

1) އިސްލާމްދީނާއި ދިވެހިބަހާއި ސަގަފާތާއި ތަރިކަތައް

2) ދިވެހިވަންތަކަމާއި ދިވެހި ބިމުގައި ދިވެހި ދައުލަތް މިނިވަންކަމާއެކު ދެމިއޮތްކަން

3) ދިވެހި ދައުލަތުގެ އެވޭލާކަމާއި މިނިވަންކަމުގެ 60 އަހަރު، އެގޮތުގައި ދެމިތިބުމަށް ކުރާ އުންމީދުތައް

4) މިނިވަންކަމުގެ 60 އަހަރު ހޯދި ކުރިއެރުންތަކާއި އުންމީދުކުރާ ކުރިއެރުންތައް

5) ލޯގޯގައި ބޭނުންކުރެވޭ ކުލަތަކަކީ ގައުމީ ކުލަތަކަށް ވުން (އިތުރު ކުލައެއް ބޭނުންކުރާނަމަ، ދިވެހި ކަނޑާއި ރާއްޖޭގެ މާހައުލު ރަމްޒުކޮށްދޭ ނޫކުލަ ބޭނުންކުރުން)

6) މުނާސަބަތާ ގުޅޭ އެކި ކަންކަމުގައި، މިސާލަކަށް ބެޖާއި ސްޓިކާގެ ގޮތުގައި ބޭނުންކުރުމަށާއި ބެނާއާއި ޗާޕުކުރާ ލިޔުންތަކާއި ޓީޝާޓު ފަދަ ތަކެތީގައި ބޭނުންކުރަން ފަސޭހަ ފަރުމާއަކަށްވުން

7) މީޑިއާގައާއި އެނިމޭޝަނާއި ވީޑިއޯތަކުގައި ބޭނުންކުރެވޭ ލޯގޯއަކަށްވުން

ހުށަހަޅާ ލޯގޯއަށް މާކްސް ދިނުމުގައި ލޯގޯގެ ކޮލިޓީއާއި ޓެކްނިކަލް ފެންވަރަށް 30 މާކްސް ލިބޭއިރު، އަސްލުވަންތަކަމާއި އުފެއްދުންތެރިކަމުގެ އިތުރުން މަސައްކަތްތެރިކަމަށް ލިބެނީ 20 މާކުހެވެ. އަދި ދިވެހިވަންތަކަމަށް ބަލައި، 20 މާކްސް ދޭއިރު، މިނިވަން 60ގެ ސިފަތައް ރަމްޒުކޮށްދީފައިވާ މިންވަރަށް ދެނީ 30 މާކުހެވެ.

އެ ވުޒާރާއިން ބުނެފައިވާ ގޮތުން، އެންމެ މޮޅު ލޯގޯއެއް ކަނޑައަޅާނީ އެކަމަށް ޚާއްސަ ފަނޑިޔާރުންގެ ޕެނަލަކުންނެވެ.

"މިނިވަން 60" މި ލޯގޯއަކީ މިނިވަންކަމުގެ 60 އަހަރުގެ ޝިޢާރުގެ ގޮތުގައި ބޭނުންކުރެވޭނެ ލޯގޯއެކެވެ. މިއީ ދިވެހިރާއްޖޭގެ މިނިވަންކަމަށް 60 އަހަރު ފުރޭ އަހަރު ކަމަށްވާތީ، މި އަހަރު ފާހަގަކުރެވޭ ހުރިހައި ހަރަކާތްތަކެއްގައި މި ލޯގޯ ބޭނުން ކުރުމަށް ވަނީ ހަމަޖެހިފައެވެ.