ގެދޮރުވެރިޔާ ސްކީމުގެ ފުރަތަމަ ބުރުގެ، ފުރަތަމަ 4000 ފުލެޓް ލިބޭ މީހުންގެ ތެރޭގައި ވަކި ފަރާތްތަކެއް ހިމަނައި، ވަކި ފަރާތްތަކަކަށް ނާޖާއިޒު މަންފާއެއް ހޯދައި ދީފައިވާކަމުގެ ތުހުމަތުގައި، ކުރީގެ ސްޓޭޓް މިނިސްޓަރު އަކްރަމް ކަމާލުއްދީންއާއި ހައުސިން މިނިސްޓްރީގެ ސީނިއަރ އެގްޒެކެޓިވްގެ މަޤާމުގައި ހުރި މުޙައްމަދު ޢާރިފް ހިމެނޭހެން 4 މީހަކަށް ދައުވާ ކޮށްދޭން އެދިއްޖެއެވެ.

މި މައްސަލާގައި ދެން ދައުވާ ކޮށްދޭން އެދިފައިވަނީ، ހައުސިން މިނިސްޓްރީގެ ކުރީގެ ސީނިއަރ އެގްޒެކެޓިވްގެ މަޤާމުގައި ހުރި ޟިރުޢާމް ވަޙީދު އަދި އެ މިނިސްޓްރީގެ ޑިރެކްޓަރ ޖެނެރަލްގެ މަޤާމުގައި ހުރި އަޙްމަދު ވިޝާން ނަސީމްގެ މައްޗަށެވެ.

އޭސީސީން ބުނީ އެ ކޮމިޝަނާއި ދިވެހި ފުލުހުންގެ ޚިދުމަތާ ގުޅިގެން ތަޙުޤީޤުކުރަމުން ގެންދާ ފުލެޓް ކޮރަަޕްޝަންގެ މައްސަލައިގައި ހޯދާފައިވާ ހެކިޤަރީނާއިން އެ 4 މީހުން ފުލެޓް ބެހުމުގައި ވަކި ބަޔަކަށް ނާޖައިޒް މަންފާވާ ގޮތަށް އަމަލުކޮށްފައިވާ ކަން އެނގޭ ކަމަށެވެ. އެހެންކަމުން، އެމީހުންނަށް ދައުވާ ކޮށްދިނުމަށް ޕްރޮސިކިއުޓަރ ޖެނެރަލްގެ އޮފީހަށް މިއަދު ފޮނުވާފައިވާ ކަމަށެވެ. 

ހަތަރު މީހުންގެ މައްޗަށް ކުރަނީ، ރަސްމީ ހައިސިއްޔަތާއި އެ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން ނަޖާއިޒު މަންފާ ހޯދައިދިނުމުގެ ކުށުގެ ދަޢުވާއެވެ. 

މީގެ އިތުރުން، ރަސްމީ ހައިސިއްޔަތާއި އެ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން ނަޖާއިޒު މަންފާ ހޯދައިދިނުމުގެ ކުށް ފިޔަވައި، އެހެން އިތުރު ކުށްތައް މި ހަތަރު މީހުން ކޮށްފައިވާކަމަށް ތުހުމަތުކުރެވޭތީ، އެކުށްތައް ތަޙުޤީޤުކުރުމުގެ މަސައްކަތް ވެސް ފުލުހުންނާ ގުޅިގެން ކުރިއަށްދާ ކަމަށް ބުނެފައިވެއެވެ.