ފްލެޓް މައްސަލާގައި ދައުވާކުރަނީ، ސިޔާސީ މަގްސަދެއްގައި: އެމްޑީޕީ
އެމްޑީޕީ ސަރުކާރުން ހިންގި ގެދޮރުވެރިޔާ ސްކީމްގެ މައްސަލާގައި އޭރުގެ ފްލެޓް ކޮމިޓީގައި ހިމެނޭ އިސްފަރާތްތަކުގެ މައްޗަށް ދައުވާކުރަނީ ސިޔާސީ މަގްސަދެއްގައިކަމަށް އިދިކޮޅު އެމްޑީޕީން ބުނެފިއެވެ.
ގެދޮރުވެރިޔާ ސްކީމުގެ ފުރަތަމަ ބުރުގެ، ފުރަތަމަ 4000 ފުލެޓް ލިބޭ މީހުންގެ ތެރޭގައި ވަކި ފަރާތްތަކެއް ހިމަނައި، ވަކި ފަރާތްތަކަކަށް ނާޖާއިޒު މަންފާއެއް ހޯދައި ދީފައިވާކަމުގެ ތުހުމަތުގައި، އޭސީސީން ވަނީ އެމްޑީޕީއަށް ނިސްބަތްވާ ކުރީގެ ސްޓޭޓް މިނިސްޓަރު އަކްރަމް ކަމާލުއްދީންއާއި ހައުސިން މިނިސްޓްރީގެ ސީނިއަރ އެގްޒެކެޓިވްގެ މަޤާމުގައި ހުރި މުޙައްމަދު ޢާރިފް ހިމެނޭހެން 4 މީހަކަށް ދައުވާ ކޮށްދޭން އެދިފައެވެ.
މިކަމާ ގުޅޭގޮތުން އިދިކޮޅު އެމްޑީޕީން ނެރުނު ބަޔާނެއްގައި ބުނެފައިވަނީ، ވަކިބަޔަކަށް ނާޖާއިޒް މަންފާ ހޯދައިދީފައިވާ ކަމުގެ އެއްވެސް ހެއްކެއް ނުދައްކައި ދައުވާކުރުމަށް ނިންމީ، ސިޔާސީ މަގްސަދެއްގައި ރައީސް ޑރ.މުހައްމަދު މުއިއްޒު އަންގަވައިގެން ކަމަށެވެ. އެމްޑީޕީން ބުނީ އެކަން އެހެން އޮތްނަމަވެސް މި ސަރުކާރުން ފްލެޓް ދިނުމަށް ނިންމާފައިވަނީ، މިދިޔަ ސަރުކާރުން ގެޒެޓްކުރި ލިސްޓަށްކަމަށެވެ. މިކަމުން އެނގިގެންދަނީ ދައުލަތުގެ އެކި އިދާރާތައް މެދުވެރިކޮށް ރައްޔިތުންގެ ގިނަ ބައެއްގެ ހައްގު ބޯހިޔާވަހިކަން ސަރުކާރުން ދޮޅުއަހަރުވަންދެން ހިފަހައްޓައިގެން ތިބިކަން ކަމަށްވެސް ބަޔާނުގައި ބުންޏެވެ.
މި ބަޔާނުގައި އެމްޑީޕީން ވަނީ އޭސީސީއަށް ވަރަށްބޮޑަށް ފާޑުކިޔައި، އެ އިދާރާއަށް ސަރުކާރުން ނުފޫޒު ފޯރުވާފައިވާކަން ތުހުމަތުކޮށްފައެވެ. އެގޮތުން ފްލެޓް ލިސްޓް މައްސަލާގައި އޭސީސީން ކަންތައްތައް ކޮށްފައިވަނީ ޤާނޫނާއި ގަވާއިދުގައި ބަޔާންކޮށްފައިވާ އިޖުރާއަތްތަކާ މުޅިން ހިލާފަށްކަމަށެވެ.
މީގެ އިތުރުން ކުރީގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނުގެ ޕާސްޕޯޓް ހިފެހެއްޓުމުގައި އަމަލުކޮށްފައިވަނީ، ސަރުކާރަށް ފާޑުކިޔާމީހުންގެ އަޑު ކަނޑުވާލައި އިދިކޮޅު ފަރާތްތަކަށް ހުރަސްއެޅުމުގެ ބޭނުމުގައި ކަމަށްވެސް އެމްޑީޕީގެ ބަޔާނުގައި ވަނީ ފާހަގަކޮށްފައެވެ. އެމްޑީޕީން ބުނީ ސަރުކާރުން މަސައްކަތްކުރަނީ ފްލެޓްތައް ހަވާލުކުރުން ލަސްކުރަން ކަމަށާއި، ބޭނުމަކީ ކުރިއަށްއޮތް އިންތިހާބުތަކާ ދިމާކޮށް ވޯޓަށް ނުފޫޒު ފޯރުވުންކަމަށެވެ.
ފްލެޓް ލިސްޓާ ގުޅޭގޮތުން އޭސީސީން ބުނެފައިވަނީ، ދިވެހި ފުލުހުންގެ ޚިދުމަތާ ގުޅިގެން ތަޙުޤީޤުކުރަމުން ގެންދާ ފުލެޓް ކޮރަަޕްޝަންގެ މައްސަލައިގައި ހޯދާފައިވާ ޤަރީނާއިން ފުލެޓް ބެހުމުގައި ވަކި ބަޔަކަށް ނާޖައިޒް މަންފާވާ ގޮތަށް އަމަލުކޮށްފައިވާ ކަން އެނގޭ ކަމަށެވެ. އެހެންކަމުން، އެމީހުންނަށް ދައުވާ ކޮށްދިނުމަށް ޕްރޮސިކިއުޓަރ ޖެނެރަލްގެ އޮފީހަށް މިއަދު ފޮނުވާފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
