އިނގުރައިދޫ ސްކޫލްގައި މިރޭ ބޭއްވުމަށް ނިންމާފައިވާ "ތަފާތު ރަހަ" ޑިނަރ ނައިޓުގައި 60 ހަށްވުރެ ގިނަ ބާވަތްތަކުގެ ރަހަތައް ތަޖުރިބާކޮށްލުމުގެ ފުރުސަތު ލިބިގެންދާނޭކަމަށް އެރަށު ސްކޫލްގެ ޕޭރެންޓް ޓީޗާ އެސޯސިއޭޝަން (ޕީޓީއޭ) އިން ބުނެފިއެވެ.

އިނގުރައިދޫ ސްކޫލްގެ ޕީޓީއޭއިން ބުނީ، "ތަފާތު ރަހަ" ޑިނަރ ނައިޓަކީ ޕީޓީއޭއިން އަހަރުގެ ތެރޭގައި ބާއްވާ އެންމެ ހާއްސަ އެއް އިވެންޓްކަމަށާއި، މިފަފަހަރުގެ ޑިނަރނައިޓް ވަރަށް ތަފާތުވާނޭ ކަމަށެވެ. އެގޮތުން މިރޭގެ ޑިނަރ ނައިޓްގައި ކާބޯތަކެތީގެ ތަފާތު އެކިއެކި އުފެއްދުންތަކުގެ ރަހަތައް ތަޖުރިބާކޮށްލުމުގެ ފުރުސަތު ލިބިގެންދާނޭކަމަށެވެ. މީގެ ތެރޭގައި ސްނެކްސް، ތަފާތު ބާވަތްތަކުގެ ރިހަޔާއި ސަޓަންނާއި ދިވެހި ފަނި ފާހަގަކޮށްލެވެއެވެ. މި ޑިނަރ ނައިޓްގައި ރާއްޖޭގެ ރަހަތަކުގެ އިތުރުން ބައެއް ޤައުމުތަކުން ތައާރަފްވެފައިވާ މަޤޢްބޫލް ކެއުންތައް ލިބޭނެއެވެ.

ޕީޓީއޭއިން ބުނީ ތަފާތު ރަހަ ޑިނަރ ނައިޓްގައި އީދަށް ހާއްސަކޮށްގެން އިނގުރައިދޫގައި އެންމެ ކުރިންސުރެ ތައްޔާރުކުރަމުންގެންދާ ކާބޯތަކެތީގެ ވައްތަރުތައް ލިބެން ހުންނާނޭކަމަށެވެ. މީގެ ތެރޭގައި އުޅާއްޔާއި، ކަށިކެއޮފޯ، މާފުށް، މަދުރޮށީގެ އިތުރުންވެސް އެކި ވައްތަރުތައް ހިމެނެއެވެ.

ޑިނަރ ނައިޓް ޕޯސްޓަރު

ތަފާތުރަހަ ޑިނަރ ނައިޓް ކުރިއަށްދާނީ މިރޭ 20:15 އިން ފެށިގެން 22:15 އަށް އިނގުރައިދޫ ސްކޫލްގައެވެ.

ޑިނަރ ނައިޓްގައި ސްކޫލް ދަރިވަރުންނަށް 10 ރުފިޔާއިން ފެށިގެން 75 ރުފިޔާ އާ ދެމެދުގެ އަގަކަށް ޓިކެޓް ވިއްކުމަށް ހަމަޖެހިފައިވައިރު، ޑިނަރ ނައިޓްގެ ހާއްސަ ވީއައިޕީ ޕެކޭޖް ހިމެނޭ ގޯލްޑެން ޓިކެޓްގެ އަގަކީ 5،000 ރުފިޔާއެވެ. މީގެ އިތުރުން ސިލްވަރ ޓިކެޓްގެ އަގެއްގެ ގޮތުގައި 1،000 ރުފިޔާ ކަނޑައެޅިފައިވާއިރު ބްރޯންޒް ޓިކެޓްގެ އަގެއްގެ ގޮތުގައި ކަނޑައަޅާފައިވަނީ، 500 ރުފިޔާއެވެ. ޑިނަރ ނައިޓަށް އާއްމުނަށް ޓިކެޓްގެ އަގެއްގެ ގޮތުގައި ކަނޑައެޅިފައިވަނީ، 150 ރުފިޔާއެވެ. ޑިނަރ ނައިޓްގެ ޓިކެޓް ނެގުމުގެ ފުރުސަތު އަދިވެސް އެބައޮތްކަމަށް ޕީޓީއޭއިން ބުނެއެވެ.

އިނގުރައިދޫ ސްކޫލްގެ ނަމުގައި ތައުލީމުދިނުމަށް ސްކޫލެއް ގާއިމްކުރެވުނީ 1983 ވަނަ އަހަރުގެ މެއިމަހުގެ 17 ވަނަ ދުވަހުއެވެ.