ސަޢުދީ ފަންޑް ފޯ ޑިވެލޮޕްމެންޓް (އެސްއެފްޑީ)ގެ އެހީ އާއިއެކު ކޯލްޑް ސްޓޯރޭޖް އަދި އެކްސްޕޯޓް އިންފްރާސްޓަރަކްޗަރއަށް އަމާޒުކޮށްގެން މަސްވެރިކަމުގެ ސިނާއަތް ތަރައްގީކުރުމުގެ ބޮޑު މަޝްރޫއެއް ފެށުމަށް ތައްޔާރީތަށްވަމުން އަންނަކަމަށް މަސްވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
އަލްޖީރިއާގެ ވެރިރަށުގައި ބޭއްވުނު އިސްލާމިކް ޑިވެލޮޕްމެންޓް ބޭންކް (އައިއެސްޑީބީ)ގެ ބައްދަލުވުމުގައި ވާހަކަދައްކަވަމުން ޝިޔާމް ވިދާޅުވީ، ސައުދީން ރާއްޖޭގެ މަސްވެރިކަމުގެ އިންޑަރސްޓްރީ ފުޅާކޮށް ކުރިއެރުވުމުގެ ގޮތުން މަޝްރޫޢުއެއް ފެށުމަށް ނިންމާފައިވާކަމަށެވެ. މި މަޝްރޫއުގެ ސަބަބުން ދުނިޔޭގެ ބާޒާރުތަކުގައި ރާއްޖޭގެ ކަނޑުމަހުގެ ވާދަވެރިކަން ރަނގަޅުވެ، ރަނގަޅު ފެންވަރެއްގައި މަހުގެ ބާވަތްތަށް އެކްސްޕޯޓް ކުރުމަށް ފަސޭހަވެގެންދާނޭކަމަށެވެ.
މަޝްރޫޢުއާ ގުޅޭގޮތުން ނިންމަންޖެހޭ ނިންމުންތަކުގެ ބޮޑުބައި މިހާރު ނިމިފައިކަމަށާއި ވަރަށް ރަނގަޅަށް ހުރިހާ ކަމެއް ކުރިޔަށްދާ ކަމަށް އިތުރަށް މަސްވެރިކަމާ ބެހޭ ވަޒީރު ވިދާޅުވިއެވެ.
ވަޒީރު ފާހަގަ ކުރެއްވި ގޮތުގައި ރާއްޖޭގެ މަސްވެރިކަމުގެ ސިނާއަތަށް ދިމާވެފައިވާ އެންމެ ބޮޑު ގޮންޖެހުމަކީ، ހަރުދަނާ ގޮތެއްގައި މަސް ރައްކާކުރެވޭނެ ނިޒާމެއް ގާއިމުވެފައި ނެތުމާއި އައިސް ޕްލާންޓްތަށް މަދުވުމުގެ މައްސަލައެވެ. މިކަމުގެ ސަބަބުން ބޭރުގެ މާކެޓްތަކުގައި ރާއްޖެއިން އެކްސްޕޯޓް ކުރާ މަހުގެ އަގު ދަށްވަމުންދާ ކަމަށް ވެސް ވަޒީރު އިތުރަށް ވިދާޅުވިއެވެ.
"މިމަޝްރޫގެ އަމަލީ މަސައްކަތް ނިމުމުން ބޭރުގެ މާކެޓްތަކުގެ ހާލަތު ރަނގަޅުވަންދެން މަސް ރައްކާކުރުމުގެ ކެޕޭސިޓީ އިތުރުވެގެންދާނެ. އަޅުގަންޑުމެން މިމަސައްކަތް ކުރަނީ ސަޢުދީގެ މުއައްސަސާތަކާ، ޚާއްސަކޮށް ސަޢުދީ ފަންޑް ފޯ ޑިވެލޮޕްމަންޓް ގުޅިގެން، ރާއްޖޭގެ މަސްވެރިކަމުގެ ސިނާއަތާއި އަޅުގަނޑުމެންގެ ރައްޔިތުންގެ ދިރިއުޅުމުގެ ހާލަތު ރަނގަޅުކުރަން
ޝިޔާމް ވިދާޅުވިއެވެ
މިބައްދަލުވުމުގައި ވަޒީރު ވަނީ ދިވެހިރާއްޖެއާއި ސަޢުދީ އަރަބިއްޔާއާއި ދެޤައުމުގެ އެކުވެރިކަމަށް ވެސް އަލިއަޅުއްވާލާ ވާހަކަދައްކަވާފައެވެ. އެގޮތުން ސައުދީ ސަރުކާރުގެ އެހީގައި މިހާތަނަށްވެސް އެކިއެކި ދާއިރާތައް ކުރިއެރުވުމަށް ގިނަ އެހީތަކެއް ލިބެމުންދާކަމަށްވެސް ވަޒީރުގެ ވާހަކަފުޅުގައި ފާހަގަކުރެއްވިއެވެ.
މަސްވެރިކަމުގެ ސިނާއަތް ތަރައްޤީކުރުމަށް ސަރުކާރުން ވަނީ ގިނަ މަސައްކަތްތަކެއް ފަށާފައެވެ. އެގޮތުން މަސްރައްކާ ކުރެެވޭ މިންވަރު އިތުރުކޮށް، އައިސްލިބޭނޭ އިންތިޒާމުތައް މަސްވެރިންނަށް ފަހިކޮށްދިނުމަށް ސަރުކާރުން މިހާރުވެސް ވަނީ މުހިއްމު މަސައްކަތްތަކެއް ފަށާފައެވެ.
ދިވެހިރާއްޖެ އަކީ ދެމެހެއްޓެނިވި މަސްވެރިކަންކުރާ ގައުމަކަށް ވުމާއިއެކު، މަސްވެރިން މަސް ބާނަން ބޮޑު ހޭދައެއް ކުރަންޖެހެއެވެ. އެގޮތުން މަސްވެރިކަމުގެ މާކެޓް ތަކުގައި ބޭރުގެ ގައުމުތަކާއި ވާދަކުރާއިރު ގޮންޖެހުންތަކާއި ކުރިމަތިލާން ޖެހޭ ކަމަށް މަސްވެރިކަމާ ބެހޭ ވަޒީރު މީގެ ކުރިންވެސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
