ކުރިއަށްއޮތް ރިޔާސީ އިންތިހާބުގައި ވާދަކުރެއްވުމުގެ ވިސްނުން އެބަހުރިކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މި ބީދައިން ވިދާޅުވެފައިވަނީ، މިކަމާ ގުޅޭގޮތުން އެމަނިކުފާނުގެ އަރިސް ފަރާތްތަކާއެކު ހިއްސާކުރެއްވި މެސެޖެއްގައެވެ. އެފަރާތްތަކަށް ކުރެއްވި މި މެސެޖްގައި ރައީސް ނަޝީދު ވިދާޅުވެފައިވަނީ ކުރިއަސް އޮތް ރިޔާސީ އިންތިހާބުގައި ވާދަކުރެއްވުމުގެ ވިސްނުން ގެންގުޅުއްވާކަމަށެވެ.

އެގޮތުން އެކަމާ ގުޅޭގޮތުން ހިޔާލުފުޅު ހުރިގޮތް ހިއްސާކުރެއްވުމަށް ރައީސް ނަޝީދު ވަނީ އެދިވަޑައިގެންފައެވެ. ރައީސް ނަޝީދު ކުރެއްވި އެ މެސެޖުގައި އިތުރަށް ވިދާޅުވެފައިވަނީ ކޮންމެ ގޮތަކަށް ޖަވާބު ދެއްވިނަމަވެސް އަޅުގަނޑުމެންގެ ގުޅުމަށް ބުރޫ ނާރާނެ ކަމަށެވެ. މިކަމާ ގުޅޭގޮތުން ރައީސް ނަޝީދު އަދި އާއްމުކޮށް އެއްވެސް ވާހަކައެއް ވިދާޅުވެފައެއް ނުވެއެވެ. 

ރައީސް ނަޝީދު ވަނީ ރާއްޖޭގައި އެންމެ ފުރަތަމަ ސިޔާސީޕާޓީތައް ބައިވެރިވެގެން ބޭއްވި ރިޔާސީ އިންތިހާބު 2008 ވަނަ އަހަރު ކާމިޔާބުކޮށް ރައީސުލްޖުމްހޫރިއްޔާގެ މަޤާމަށް އިންތިހާބުވެ ވަޑައިގެންފައެވެ. ނަމަވެސް ވެރިކަމުގެ ދައުރު ހަމަނުވަނީސް ކުރިމަތިވި ސިޔާސީ ފިއްތުންތަކުގެ ސަބަބުން އެމަނިކުފާނު ވަނީ 2012 ވަނަ އަހަރުގެ ފެބުރުއަރީމަހު މަޤާމުން އިސްތިއުފާދެއްވާފައެވެ.

ކުރިން އެމްޑީޕީގެ ރައީސްކަމުގެ މަގާމު ފުރުއްވި، ރައީސް މުހައްމަދު ނަޝީދު އެޕާޓީ ދޫކޮށްލެއްވީ، އެމްޑީޕީގެ ތެރޭގައި އުފެދިގެންދިޔަ ހިޔާލް ތަފާތުވުމެއްގެ ތެރެއިން 2023 ވަނަ އަހަރުއެވެ. އޭގެ ކުރިން ރިޔާސީ ޕްރައިމަރީ އިންތިހާބުގައި ރައީސް ސޯލިހާ ވާދަކުރައްވައި ރައީސް ނަޝީދަށް ވަނީ ނާކާމިޔާބީއާ ކުރިމަތިލައްވަން ޖެހިވަޑައިގެންފައެވެ.

ރައީސް ނަޝީދު މިހާރު ގިނައިން ހުންނަވަނީ ސިޔާސީ ކަންކަމާއި، ސިޔާސީ ހަރަކާތްތަކާ ދުރުގައެވެ. ރައީސް ނަޝީދު ވަނީ ސިޔާސީ ހަރަކާތްތަކުން ދުރައްޖެހިލައިގެން ހުންނެވިކަން 2023 ވަނަ އަހަރުގެ ޑިސެމްބަރުމަހުގެ ތެރޭގައި ވިދާޅުވެފައެވެ. ރައީސް ނަޝީދު މިހާރު މަސައްކަތް ކުރައްވަމުން ގެންދަވަނީ، ތިމާވެށްޓާ ބެހޭ ބައިނަލްއަގްވާމީ ޖަމިއްޔާއެއް ކަމަށްވާ ކްލައިމެޓް ވަލްނަރަބަލް ފޯރަމްގެ ސެކްރެޓަރީގެ ޖެނެރަލްގެ މަގާމުގައެވެ. ނަމަވެސް މިއަހަރުގެ ޖެނުއަރީމަހުގެ ތެރޭގައި ރައީސް ނަޝީދު ވަނީ ރާއްޖޭގެ ސިޔާސީ ކަންކަމުން މުޅިން ދުރަށްވަޑައި ނުގަންނަވާކަމަށް ވިދާޅުވެފައެވެ.