ޗައިނާ ސަރުކާރުގެ އެހީގައި ވިލިމާލޭގައި އިމާރާތް ކުރާ ހޮސްޕިޓަލަށް "ވިލިމާލެ ޗައިނާ މޯލްޑިވްސް ފްރެންޑްޝިޕް ހޮސްޕިޓަލް" ނަމުން ނަން ދިނުމަށް ނިންމައިފި އެވެ.
މި ހޮސްޕިޓަލަކީ ރައީސް މުއިއްޒު ޗައިނާއަށް ކުރެއްވި ދަތުރުފުޅުގައި އެ ގައުމުގެ އެހީތެރިކަމުގައި ރާއްޖޭގައި ހިންގަން އެއްބަސްވީ މަޝްރޫއުތަކުގެ ތެރެެއިން މުހިންމު މަޝްރޫއު އެކެވެ. އެ މަޝްރޫއު ފެށުމަށް ލެޓާ އޮފް އެކްސްޗޭންޖު ގައި މިއަދު ވަނީ ސޮއިކޮށްފަ އެވެ.
ދިވެހި ސަރުކާރާއި ޗައިނާ ސަރުކާރާ ދެމެދު ސޮއި އެޅުނު މި ހޮސްޕިޓަލަކީ 112 އެނދުގެ ބޮޑު ހޮސްޕިޓަލެކެވެ.
މިއަދު އޮތް ރަސްމިއްޔާތުގައި ވަނީ މި ހޮސްޕިޓަލަށް "ވިލިމާލެ ޗައިނާ މޯލްޑިވްސް ފްރެންޑްޝިޕް ހޮސްޕިޓަލް" ނަމުން ނަން ދީފައިވާކަން ވެސް ހާމަކޮށްފަ އެވެ.
ހޮސްޕިޓަލްގެ މަަސައްކަތް އަންނަ އަހަރު ފެށޭނެ ކަމަށް ސަރުކާރުން ބުނެ އެވެ. ޗައިނާގެ އެހީގައި އެ ގައުމުގެ ކުންފުންޏަކާއި ހަވާލުކޮށްގެން މި މަޝްރޫއު ކުރިއަށް ގެންދާއިރު ވަރަށް ހަލުއި ދުވެއްޔެއްގައި މަސައްކަތް ގެންގޮސް ނިންމަން އަމާޒު ހިފާނެ ކަމަށް ވެސް ސަރުކާރުން ބުންޏެވެ.
ވިލިމާލޭގައި "ވިލިމާލެ ޗައިނާ މޯލްޑިވްސް ފްރެންޑްޝިޕް ހޮސްޕިޓަލް" އިމާރާތް ކުރަން ނިންމާފައިވާއިރު ރާއްޖޭގައި ހިންގާފައިވާ އެންމެ ބޮޑު ތަރައްގީގެ މަޝްރޫއު, މާލެ-ހުޅުލެ ގުޅުވާލި ބްރިޖު މަޝްރޫއު ހިންގާފައިވަނީ ވެސް ޗައިނާގެ އެހީގަ އެވެ. އެ ބްރިޖަށް ނަން ދީފައިވަނީ ވެސް ދެ ގައުމު ނިސްބަތްވާހެން "ޗައިނާ މޯލްޑިވްސް ފްރެންޑްޝިޕް ބްރިޖް" ގެ ނަމުންނެވެ.
Advertisement
This content is created and paid for by advertisers and does not involve Voice Journalists
