ހައްޖު ދުވަހުގެ ތަހުނިޔާ, ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ރައްޔިތުންނަށް ފޮނުއްވައިފި އެވެ.
އެމަނިކުފާާނު ހައްޖު ދުވަހުގެ ތަހުނިޔާ ފޮނުއްވެވީ ހައްޖުގެ އަޅުކަމަށް އަރަފާތު ބިމުގައި ހުންނަވަ އެވެ. އިހްރާމް ގައި ހުންނަވާ ރައީސް ފޮނުއްވެވި ތަހުނިޔާގެ މެސެޖުގައި ވިދާޅުވީ މި ބަރަކާތްތެރި ދުވަހުގެ ތަހުނިޔާ ދިވެހި ރައްޔިތުންނަށް ފޮނުއްވާ ކަމަށެވެ.
އަދި ދުއާ ކުރެއްވީ ދިވެހީންނަކީ ހިތްތަކުގައި އެއްބައިވަންތަކަން އޮތް ބައެއް ކަމުގައި ލެއްވުމަށެވެ. އެކުވެރިކަމާއި ބަދަހި ކަން އޮތް މުޖްތަމައުއެއްގެ ގޮތުގައި ދިވެހި މުޖްތަމައު ލެއްވުމަށެވެ.
"އަޅުގަނޑުގެ ދުއާއަކީ ބަރަކާތްތެރި މި ހައްޖު ދުވަހުގެ ހެޔޮ ދަރުމައާ ސަވާބު އަޅުގަނޑުމެން އެންމެންނަށް މިންވަރު ކުރެއްވުން," ރައީސްގެ މެސެޖުގައި ދުއާ ކުރެއްވި އެވެ.
މިއަދަކީ ހައްޖު ދުވަސް ނުވަތަ އަރަފާތު ދުވަހެވެ. ހައްޖުގެ މަތިވެރި އަޅުކަމަށް ސައުދީގައި ތިބި އެތައް މިލިއަން މީހުން މިހާރު ވަނީ އަރަފާތު ބިމަށް ޖަމާވެފަ އެވެ. އަރަފާތުގައި ހުރުމަކީ ހައްޖުގެ އެންމެ މުހިންމު ރުކުނެވެ. އަރަފާތުގައި ނުހުރެވުނު މީހަކަށް ހައްޖެއް ނުވެ އެވެ.
ހައްޖުގެ އަޅުކަމަށް ފުުރުސަތު ނުލިބުނު މީހުންނަށް ވެސް މި ދުވަހުގެ ބަރަކާތް ހާސިލު ކުރެވޭނެ މަގު ތަނަވަސް ވެފައިވެ އެވެ. ހައްޖު ދުވަހު ރޯދައަށް ހުރުމަކީ ގަދަވެގެންވާ ސުންނަތެކެވެ. މާތް ނަބިއްޔާ ވެސް ވަނީ އެކަމަށް އުންމަތަށް އިރުޝާދު ދެއްވާފަ އެވެ. އަދި ދުއާފުޅު ކުރެއްވީ ހައްޖު ދުވަހުގެ ރޯދައިގެ ސަބަބުން ދެ އަހަރުގެ ކުދިފާފަތައް ފުއްސެވުމަށް އުންމީދު ކުރައްވާ ކަމުގަ އެވެ.
ހައްޖު މަހުގެ ފުރަތަމަ 10 ދުވަހަކީ އަހަރުގެ އެންމެ މާތް ދުވަސްތަކެވެ.
Advertisement
This content is created and paid for by advertisers and does not involve Voice Journalists
