ތިމަންނާ ބޭނުންވީމާ ރޫޅާލާފައި ހަލާކުތެރެއަށް އެންމެން ދޫކޮށްލާފައި ތިމަންނާ ބޭނުންވީމަ ހަމަ އެމީހުން ލައްވާ ރާވަން މަސައްކަތް ކުރެވޭ ނިޒާމް އަކީ ރުހެވޭ އުސޫލެއް ހަމައެއް ނޫން ކަމަށް ވިދާޅުވެ ކުރީގެ ރައީސް މުހައްމަދު ނަޝީދު އަލުން ރިޔާސީ ރޭހަށް ނިކުންނެވުމާއި ރައީސް އިބްރާހިމް މުހައްމަދު ސޯލިހްގެ ކޮއްކޯފުޅު އަލީ ނިޔާޒް (ނިޔާ) ދެކޮޅު ހައްދަވައިފި އެވެ.
ނިޔާ އެކަމަށް ދެކޮޅު ހެއްދެވީ އެކްސްގައި ކުރެއްވި ޕޯސްޓެއްގަ އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރެއްވުމުގެ ވިސްނުން އެބަހުރި ކަމަށް ނަޝީދު އިއްޔެ ވަނީ ވިދާޅުވެފަ އެވެ. އެމަނިކުފާނު އެކަން ހާމަކުރެއްވީ އެެމްޑީޕީގެ ބައެއް އިސް ބޭފުޅުން ހިމެނޭހެން އެމަނިކުފާނުގެ ގާތް ސިޔާސީ އެކުވެރީންނަށް ފޮނުއްވެވި މެސެޖެއްގަ އެވެ. އެ މެސެޖުގައި ވިދާޅުވީ ކުރިއަށް އޮތް ރިޔާސީ އިންތިހާބުގައި ވާދަކުރެއްވުމުގެ ވިސްނުން އެމަނިކުފާނު ގެންގުޅުއްވާ ކަމަށެވެ.
އެކަމާމެދު ހިޔާލުފުޅު ހުރިގޮތް ހިއްސާކޮށްދެއްވުމަށް އެދިވަޑައިގަތެވެ. އަދި އިތުރަށް ވިދާޅުވެފައިވަނީ ކޮންމެ ގޮތަކަށް ޖަވާބު ދެއްވިނަމަވެސް އެ ބޭފުޅުންގެ އޮތް ގުޅުމަށް ބުރޫ ނާރާނެ ކަމަށެވެ.
އެ ކަމަށް ނުސީދާކޮށް ރައްދު ދެއްވަމުން ނިޔާ ވަނީ ތިމަންނާ ބޭނުންވީމާ ރޫޅާލާފައި ހަލާކުތެރެއަށް އެންމެން ދޫކޮށްލާފައި ތިމަންނާ ބޭނުންވީމަ ހަމަ އެމީހުން ލައްވާ ރާވަން މަސައްކަތް ކުރެވޭ ނިޒާމް އަކީ ރުހެވޭ އުސޫލެއް ހަމައެއް ނޫން ކަމަށެވެ.
ނިޔާ އެ އިޝާރާތް ކުރައްވަނީ ނަޝީދު އެމްޑީޕީން ވަކިވެވަޑައިގެން އެ ޕާޓީގެ ލީޑާޝިޕަށް ގޮންޖައްސަވާ އެ ޕާޓީ ރޫޅާލައްވާނެ ކަމަށް ވިދާޅުވި ވިދާޅުވުމަށެވެ.
ނިޔާގެ އެ ވާހަކަތަކަށް ނަޝީދުގެ އަރިސް ކުރީގެ މެންބަރު މުހައްމަދު ވަހީދު (ވައްޑެ) ވަނީ ރައްދު ދެއްވާފަ އެވެ. އޭނާ ވިދާޅުވީ ރޫޅާލެވޭނީ އެއްޗެއް ބަލިކަށި ކޮށްލީމާ ކަމަށެވެ.
"ތިބުނާ އެއްޗެއް އަސްލު ބަލިކަށިކޮށް ރޫޅާލީ ވައްކަން ބަލަން އައިސް އެކަން ނުބަލައި އަދީބު ވެސް ދޫކޮށްލި މީހުން. މަރުތައް ބަލަން އައިސް ރނ [ރައީސް ނަޝީދު] މަރާލަން ބޮން ގޮއްވި މައްސަލަވެސް ނުބެލި މީހުން. ރޫޅާލީ މުޅި އެތީގެ ސޫރައާ ތޮބީއަތް ބަދަލުކުރި މީހުން," ރައީސް ސޯލިހަށް ފާޑު ވިދާޅުވަމުން ވައްޑެ ވިދާޅުވި އެވެ.
އެމްޑީޕީގެ ރިޔާސީ ޓިކެޓް ހޯދުމަށް އެ ޕާޓީގައި ވެސް ބޮޑު ވާދައެއް އެބަ އޮތެވެ. ނަޝީދު ވެސް ބޭނުންފުޅު ވަނީ އެމްޑީޕީގެ ޓިކެޓް ކަމަށް ބެލެވެ އެވެ. 2028 ގެ އިންތިހާބަށް އެމްޑީީޕީގެ ޓިކެޓް ހޯއްދެވުމަށް ރައީސް ސޯލިހާއި އެ ޕާޓީގެ ޗެއާޕާސަން ފައްޔާޒް އިސްމާއީލް އާއި އެމްޑީޕީގެ ރައީސް ޝާހިދުގެ އިތުރުން ހުޅުމާލެ ދާއިރާގެ މެންބަރު ޑރ. ޖަމްޝީދު ވެސް ޝައުގުވެރިވެ އެވެ.
Advertisement
This content is created and paid for by advertisers and does not involve Voice Journalists
