އަދުގެ ސަރުކާރުން އެއްވެސް ތަފާތުކުރުމެއްނެތި ހަމަހަމަކަމާއިއެކު ޤައުމުތަކާއެކު އޮތް ހާރިޖީގުޅުން ބަދަހިކުރުމުގެ ސަބަބުން އެޤައުމުތަކާއެކު ކުރިއަށްވުރެ ގާތް ގުޅުމެއް އުފެދިފައިވާ ކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް މިއަދު ވިދާޅުވެއްޖެއެވެ.
ޑރ. ޚަލީލް ވިދާޅުވީ ދިވެހިރާއްޖޭގެ ޚާރިޖީ ސިޔާސަތުގެ މައިގަނޑު މަސްދަރުތައް ޤާނޫނުއަސާސީގައި ބަޔާންކޮށްފައިވާކަމަށެވެ. އަދި ޚާރިޖީ ސިޔާސަތުގައި އަބަދުވެސް އިސްކަންދޭންޖެހޭނީ ދިވެހި ޤައުމާއި ރައްޔިތުންނަށް ކަމަށެވެ ވަޒީރު ވިދާޅުވިއެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތު ބައްޓަން ކުރައްވާފައިވަނީ، ޤައުމާއި ރައްޔިތުންގެ މަސްލަހަތު ހިމާޔަތްކުރެވޭ ގޮތަށްކަމަށެވެ. އަދި ރާއްޖޭގެ މިނިވަންކަމުގެ ރަތްރޮނގު ފަލަކޮށް ދަމާލުމަށް ރައީސް ކުރައްވާ މަސައްކަތްޕުޅުތައް ޤައުމުތަކުން އެހީ ހޯދުމުގައި ފެނިގެންދާ ކަމަށްވެސް ވަޒީރު ވިދާޅުވިއެވެ.
އަދިހަމައެހެންމެ މިނިވަންކަމާއި އިސްތިގުލާލު ހިފެެހެއްޓުމަށް ކުރާ މަސައްކަތުގެ ނަތީޖާއެއްގެ ގޮތުން ޤައުމުތަކާއިއެކު ގާތްގުޅުމެއް އުފެދި، އެ ޤައުމުތަކުން އެކަން ބަލައިގަންނަމުންދާ ކަމަށާ، ޤައުމުތަކާ ގާތް ގުޅުމެއް އުފެދުމުގެ މައިގަނޑު ސަބަބަކިީ، ޚާރިޖީ ސިޔާސަތުގެ ތެދުވެރިކަން ހާމަވަގެންދިއުން ކަމަށްވެސް ވަޒީރު އިތުރަށް ވިދާޅުވިއެވެ.
ކޮންމެ ޤައުމަކުންވެސް އެ ޤައުމެއްގެ މަސްލަހަތު، އެ ޤައުމެއްގެ ރައްޔިތުންގެ މަސްލަހަތު، އެއީ އެންމެ އިސްކުރާނެ ކަންތައްތައް. އެއީ ލިޔެވިފައި ނެތަސް ކަށަވަރުވާނެ ކަމެއް. އެހެންވީމަ ވަރަށް ސާފުކޮށް އަޅުގަނޑުމެން މިވާހަކަތައް މިގޮތަށް ބުނުމުގެ ނަތީޖާއަކީ އަޅުގަނޑުމެންގެ މިޚާރިޖީ ސިޔާސަތުގެ ތެދުވެރިކަން ޤައުމުތަކަށް ދޭހަވެގެންދިއުން
ވަޒީރު ޑރ. ޚަލީލް ވިދާޅުވިއެވެ.
ވަޒީރު ވިދާޅުވި ގޮތުގައި ޚާރިޖީ ސިޔާސަތު ހަރުދަނާ ގޮތެއްގައި ތަންފީޒުކުރަމުން އަންނަނީ މިދައުރުގެ ތެރޭގައިކަމަށެވެ. އެކަމުގެ ނަތީޖާއެއްގެ ގޮތުން ރާއްޖޭގެ ތަރައްޤީގެ ބައިވެރިންގެ ގޮތުގައި ހިމެނޭ ޤައުމުތަކާއިއެކު އޮންނަ ގުޅުންތައް ފުޅާވެ ހަރުދަނާކުރެވިގެން ދިޔުމުގެ އިތުރުން، އޭގެ ފައިދާ ރާއްޖެއަށް ވަމުންދާ ކަމަށް ވަޒީރު ވަނީ ފާހަގަކުރައްވާފައެވެ.
އެގޮތުން ޗައިނާ އަދި އިންޑިއާއަކީ ރާއްޖޭގެ ތަރައްޤީގައި މުހިންމު ދައުރެއް އަދާކުރާ ދެ ޤައުމަށްވާއިރު އެ ދެ ޤައުމާ ހަމަހަމަކަމާއެކު ގުޅުން ބަދަހިކުރުމުގެ ނަތީޖާއެއްގެ ގޮތުން އެކި ރޮނގުރޮނގުން ކުރިއަށްވުރެ ބޮޑަށް އެޤައުމުތަކުން އެހީތެރިވަމުން ދިއުންކަމަށްވެސް ޚާރިޖީ ވަޒީރު ޑރ ޚަލީލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
