ދައުލަތުގެ ބަޖެޓުން އަހަރުގެ މިހާތަނަށް އެންމެބޮޑު ހޭދައެއް ހިނގާފައިވަނީ، އެޑިއުކޭޝަން މިނިސްޓްރީ އަށާއި އެންސްޕާއަށްކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

މާލީ ވުޒާރާގެ ހިސާބުތަކުން ދައްކާގޮތުން، ދައުލަތުގެ ބަޖެޓުން މިއަހަރުގެ މިހާތަނަށް އެންމެބޮޑު ހޭދައެއްކުރި މިނިސްޓްރީއަކީ އެޑިއުކޭޝަނެވެ. ހުސްވި މެއިމަހުގެ 29 ވަނަ ދުވަހުގެ ނިޔަލަށް އެ މިނިސްޓްރީއަށް މިހާތަނަށް 1.54 ބިލިއަން ރުފިޔާ ވަނީ ހޭދަކޮށްފައެވެ. މިއި މިދިޔަ އަހަރާ އަޅާބަލާއިރު، 32.3 މިލިއަން ރުފިޔާގެ ދަށްވުމެކެވެ. މިދިޔަ އަހަރުގެ އެ މުއްދަތުގައި އެޑިއުކޭޝަން މިނިސްޓްރީގެ ހަރަދުތަކަށް 1.57 ބިލިއަން ރުފިޔާ ވަނީ ހޭދަވެފައެވެ.

އެޑިއުކޭޝަންގެ އިތުރުން ދައުލަތުގެ ބަޖެޓުން ދެން އެންމެބޮޑު ހޭދައެއްކުރީ އެންސްޕާއަށެވެ. އަހަރުގެ މިހާތަނަށް އެންސްޕާއަށް 1.39 ބިލިއަން ރުފިޔާ ވަނީ ހޭދަކޮށްފައެވެ. މިދިޔަ އަހަރު މި އަދަދު އުޅެނީ 1.15 ބިލިއަން ރުފިޔާގައެވެ. މިއަހަރުގެ ބަޖެޓުން އެންސްޕާގެ ހަރަދުތައްކުރުމަށް 3.9 ބިލިއަން ރުފިޔާ ވަނީ ހަމަޖައްސާފައެވެ.

އެންސްޕާގެ ހަރަދުތަކަށް ބަލާއިރު އެކިއެކި ބަލިތަކަށް ފަރުވާ ހޯދުމަށް އެހީއަށް އެދޭ ފަރާތްތަކަށް ބޮޑު ހޭދައެއް ހިނގާއިރު، ނުކުޅެދުންތެރިކަން ހުންނަ ފަރާތްތަކުގެ އެލަވަންސްތަކާއި އެހީތަކަށް މިހާރު ވަރަށްބޮޑު ހޭދައެއް ހިނގަމުން އަންނަކަމަށް އެންސްޕާގެ ތަފާސްހިސާބުތަކުން ދައްކައެވެ. މިގޮތުން އެންމެބޮޑު ހޭދައެއް ކުރަންޖެހޭ އެ ދާއިރާއަކީ ތެރަޕިއުޓިކް ފަރުވާއަށެވެ. ނުކުޅެދުންތެރިކަން ހުންނަ މީހުންގެ ދަފްތަރުގައި 14 ހާހަށްވުރެ ގިނަ މީހުން ރަޖިސްޓްރީކޮށްފައިވާއިރު، މީގެ ތެރެއިން ނަފްސާނީ އަދި ވިސްނުމުގެ ނުކުޅެދުންތެރިކަން ހުންނަ މީހުންގެ އަދަދު 14،00 އަށްވުރެ ގިނައެވެ. 

މިއަހަރުގެ ބަޖެޓަށް ބަލާއިރު، ނުކުޅެދުންތެރިކަން ހުންނަ މީހުންނަށް އެލަވަންސްގެ ގޮތުގައި 634.3 މިލިއަން ރުފިޔާ ދިނުމަށް ވަނީ ނިންމާފައެވެ.