ފަޟީލަތުއް ޝައިޚް އިބްރާހީމް ފަަރީދު އަހްމަދު ކުއްލި ގޮތަކަށް ވަކިވެދިޔައީ އެވެ. އެއީ ރާއްޖޭގެ ދައުވަތުގެ މައިދާނަށް ލިބުނު ވަރަށް ބޮޑު ހީނަރުކަމެކެވެ. ދެރަ އެކެވެ. 

ޝެއިހްގެ ކުއްލި ވަކިވުމާއެކު އެންމެ ބޮޑު ހިތާމައެއް ލިބިފައިވަނީ އާއިލާއަށެވެ. ހާއްސަކޮށް ޝޭހުގެ ކުދީންނަށެވެ. ޝެއިހްގެ ދަރިފުޅު އަބްދުﷲ ފަރީދު (އަބޯ) ވަނީ އޭނާގެ ބައްޕަގެ ކުއްލި ވަކިވެ ދިއުމުން ލިބިފައިވާ ފުން ހިތާމަ ހިއްސާކޮށް ސްޓޭޓަސްއެއް ލިޔެފަ އެވެ.

އަބޯ ބުނި ގޮތުގައި ބައްޕަ އަކީ އޭނާގެ ފުރަތަމަ އެދުރެވެ. ދިރިއުޅުމުގެ ހަގީގީ މާނައަކީ ކޮބައިކަން އުނގަންނައި ދިން ‏މުދައްރިސެވެ.

"މިއީ އަޅުގަނޑުގެ ހަޔާތުގައި އައި އެންމެ ހިތާމަވެރި އަދި ހިތްދަތި ދުވަހެވެ. ބައްޕައާއެކު ހޭދަ ކުރެވުނު ކޮންމެ ހިނދުކޮޅެއް ކުއްލި އަކަށް ސިކުނޑި ފުރާލި ކަހަލަ އެވެ. މި ދުނިޔެއާއި އަލްވަދާޢު ކީ ޚަބަރާއެކު ހިތް ޗިސް ޗިސް ވި ކަހަލަ އެވެ,"

ނަމަވެސް އަބޯ ބުނި ގޮތުގައި ( كُلُّ نَفْسٍ ذَآئِقَةُ الْمَوْتِ ) ގެ މާނަ ވެސް ފަހުމް ކޮށްދެއްވީ ވެސް އޭނާގެ ބައްޕައެވެ. އެހެން ކަމުން ފުރާނަ ވަކިވެ ދިއައަސް ބައްޕަގެ ހެޔޮ ޒިކުރާ ދުލަކުން ހަމަ ގައިމު ނުފިލާނެ އެވެ.

"ބައްޕަގެ ފާފަ ފުއްސަވާ ސުވަރުގޭގެ އެންމެ މަތިވެރި ދަރަޖަ ދެއްވުމަށް އެދި ދުޢާ ކުރަމެވެ. ގިނައިން ބުނެވިފައި ނެތް ނަމަވެސް، ބައްޕަ ދެކެ އިންތިހާ އަށް ލޯބި ވަމެވެ. ސޫރަ ފަނޑުވެ ދިއައަސް، ބައްޕަ އަށް މި ހިތުގައި ވާ ޤަދަރު ހަމަ ގައިމު ފަނޑު ނުވާނެއެވެ," ބައްޕައާމެދު އޮތް ޝުއޫރު ހާމަކޮށް އަބޯ ލިޔެފައިވެ އެވެ.

ޝެއިހް ފަރީދު ނިޔާވުމާއި ގުޅިގެން ވަރަށް ގިނަ ބަޔަކު ތައުޒިޔާ ކިޔަމުންނެވެ. ޝެއިހަށް ހެޔޮ ރަހްމަތަށް އެދި ދުއާ ކުރަމުންނެވެ. މުޅި ސޯޝަލް މީޑިއާ އިން ފެންނަނީ ދިވެހިންގެ ހިތްތަކުގައި ޝެއިހް ފަރީދަށް އޮތް ވަރުގަދަ ލޯތްބެވެ.