ސުޕްރީމް ކޯޓުގެ ފަނޑިޔާރުކަމަށް ހައި ކޯޓުގެ ފަނޑިޔާރު މުޙައްމަދު ސަލީމާއި އަދި އެ ކޯޓުގެ ކުރީގެ ފަނޑިޔާރު ޢަބްދުالله ހަމީދު ޢައްޔަންކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
ސުޕްރީމް ކޯޓަށް އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ނަންތައް ދިރާސާ ކުރުމަށްފަހުގައި ޖުޑީޝަރީ ކޮމިޓީން އެކުލަވާލި ރިޕޯޓް މިއަދު މަޖިލީހުގެ ޖަލްސާގައި ވަނީ އިއްވާފައެވެ.
އެގޮތުން، އަބްދުالله ހަމީދާއި، ސަލީމް އެ ކޯޓުގެ ފަނޑިޔާރު ކަމަށް އައްޔަނު ކުރުމާމެދު ކޮމިޓީން ހުށަހެޅި ރިޕޯޓަށް ބަހުސް ކުރަން ހުޅުވާލުމުން ދެ މެންބަރުން ބަހުސްގައި ބައިވެރިވެފައިވާއިރު، އެފަހުން ވަނީ އެ ދެބޭފުޅުން އައްޔަނު ކުރުމާމެދު މެންބަރުންގެ ވޯޓަށް އަހާފައެވެ.
އަދި ވޯޓުގައި ބައިވެރިވެވަޑައިގެންނެވި 60 މެންބަރުންގެ އިއްތިފާގުންވަނީ އެ ދެބޭފުޅުން ސްޕްރީމްކޯޓްގެ ފަނޑިޔާރު ކަމަށް އައްޔަނުކުރުމަށް މަޖިލީހުން ރުހުންދީފައެވެ.
ރައީސުލްޖުމްހޫރިއްޔާ ސުޕްރީމް ކޯޓުގެ ފަނޑިޔާރުކަމަށް ހައި ކޯޓުގެ ފަނޑިޔާރު މުޙައްމަދު ސަލީމާއި އަދި އެ ކޯޓުގެ ކުރީގެ ފަނޑިޔާރު ޢަބްދުالله ހަމީދު އައްޔަން ކުރެއްވުމަށް މަޖިލީހަށް ނަން ފޮނުއްވީ މިދިޔަ ހަފުތާގެ ހޯމަ ދުވަހު ބޭއްވި ޖަލްސާއަށެވެ. އެ މައްސަލަ ޖުޑީޝަރީ ކޮމިޓީއަށް ފޮނުއްވުމުން ކޮމިޓީ ބައްދަލުވުމަށް ހާޒިރުވެވަޑައިގެންނެވި ހުރިހާ މެންބަރުންގެ އިއްތިފާގުން ފާސްކޮށްފައިވަނީ ދެ ބޭފުޅުންވެސް ސުޕްރީމް ކޯޓަށް އައްޔަން ކުރައްވަން ޝަރުތުހަމަވާކަމަށް ފާސްކޮށްފައެވެ.
ސުޕްރީމް ކޯޓްގެ ހުސްވެފައިވާ ފަނޑިޔާރުކަމުގެ މަގާމަށް ބޭފުޅުން އައްޔަން ކުރެއްވުމަށް ޖޭއެސްސީން ހުޅުވާލި ފުރުސަތުގައި 12 ފަރާތަކުން ވަނީ މިމަގާމަށް ކުރިމަތިލާފައެވެ.
Advertisement
This content is created and paid for by advertisers and does not involve Voice Journalists
