މަސްތުން ސަލާމަތްވުމަށް ހުޅުމާލޭގައި ހުންނަ ހާފްވޭ ހައުސްގައި ފަރުވާ ހޯދަމުން ދިޔަ ދެ މީހަކު މަސްތުގެ ހާލަތުގައި ތިއްބާ އެތަނުގެ ތެރެއިން ހައްޔަރުކޮށްފި އެވެ.

އެގޮތުން މި މައްސަލައިގައި ހައްޔަރުކޮށްފައިވަނީ ގއ. ކަނޑުހުޅުދޫ/ވިދާތަރި، އިކުލީލް އިބްރާހިމް (42އ) ، އަދި އދ. މަހިބަދޫ/ރެޑްރޯސް އަބްދުالله ޝާފިއު (33އ) އެވެ. 

މި ދެ މީހުންގެ ބަންދު އަމުރުގައިވާގޮތުން، އެމީހުން ހައްޔަރު ކުރެވުނީ ހުޅުމާލޭ ހާފްވޭ ހައުސް ބަލައި ފާސްކުރުމުގެ ތެރޭގައި މި ދެ މީހުން ޢަމަލުތައް ހުރި ގޮތުން މަސްތުގެ ހާލަތުގައި ތިބި ކަމަށް ޝައްކުވެގެން ކަމަށެވެ. އެގޮތުން އެ ދެ މީހުންނަށް އޭރު ރަނގަޅަށް އިށީނދެގެން ނުތިބެވޭ ކަމަށާ، އިށީނދެ އިންނައިރުވެސް މީހާގެ ގައިގައި ވަރުނެތި އަރިއަރިއަށް ވެއްޓޭ ކަމަށް ފުލުހުން ބުނެފައިވެ އެވެ.

އެ ދެމީހުން ބަލައި ފާސްކުރިއިރު އެމީހުންގެ އަތުން މަސްތުވާތަކެތި ނުފެނު ނަމަވެސް، އެމީހުން މަސްތުވެގެން ތިބި ކަމަށް ޝައްކުކުރެވޭތީ ހައްޔަރުކޮށް، ކުޑަކަމުދާ ތަކެތި ޓެސްޓުކުރި އިކުލީލް ވަނީ އޯޕީއައި، ބެންޒޯ އަށް ޕޮޒިޓިވް ވެފައިވާއިރު، އަބްދުالله ޝަފީޢު އޯޕީއައި އަށް ޕޮޒިޓިވް ވެފައިވާ ކަމަށް ބަންދު އަމުރުގައި ވެއެވެ.

މި ދެ މީހުން ވެސް ކޯޓުގައި ވަނީ އެމީހުންނަކީ މަސްތުވާތަކެތި ބޭނުންކުރާ މީހުން ކަމަށް އެއްބަސްވެފައެވެ. އަދި އެ މީހުންނަކީ އެކަމުން ސަލާމަތްވާން ފަރުވާ ހޯދަމުން އަންނަ ބައެއް ކަމަށާ، ޕޮޒިޓިވް ވެފައިވަނީ، ފަރުވާއަށް ބޭނުންކުރާ ބޭސް ބޭނުން ކުރުމުން ކަމަށް އެމީހުން ބުނެފައިވާ ކަމަށް އަމުރުގައިވެއެވެ. 

އެގޮތުން އަބްދުالله ބުނެފައިވާ ގޮތުން، އޭނާ ކޮންޓްރޯލްޑް ޑްރަގްސް ބޭނުންކުރާ ކަމުގެ ލިޔުން ވެސް އޮންނާނެއެވެ. އަދި އެ ބޭނުން ކުރުމުންވެސް ރަނގަޅަށް ކޮޅަށް ނުހުރެވޭ ކަމަށް އޭނާ ބުނެފައިވެއެވެ. 

މީނާ އަކީ މީގެ ކުރިން 42 ފަހަރު ހައްޔަރުކޮށްފައިވާ މީހެއްކަން ބަންދު އަމުރުން އެނގޭއިރު، އޭގެތެރެއިން ގިނައީ މަސްތުވާތަކެތީ ބޭނުންކުރުމުގެ މައްސަލަތައް ކަން އަމުރުގައި ފާހަގަކޮށްފައިވެއެވެ. 

މީގެ އިތުރުން، މައްސަލާގައި ހައްޔަރު ކުރި، އިކުލީލު މީގެ ކުރިން، 27 ފަހަރަކު ހައްޔަރުކޮށްފައިވާއިރު، އޭނާ ބުނީ އޭނާ އަކީ "ސައިކޭޓްރިސްޓް ބޭސް ކާ މީހެއް" ކަމަށެވެ. އަދި ކާ ހާފްވޭ ހައުސްގައި މަސްތުވާތަކެތި ބޭނުންކޮށްފައި ނުވާނެ ކަމަށާއި އެއީ ޑްރަގް އެންފޯސްމަންޓުގެ ބޭފުޅުން 24 ގަޑިއިރު ބަލަހައްޓާ އަދި ވަށައިގެން ކެމެރާ ހަރުކޮށްފައިވާ ތަނަކަށް ވާތީ އެކަހަކަ ކަމެއް ނުވެސް ކުރެވޭނެ ކަމަށް އިކުލީލް ބުނެފައިވެ އެވެ.

މި ދެ މީހުން ހާފްވޭ ހައުސްގައި ޑްރަގްސް ބޭނުން ނުކުރާ ކަމަށް ބުނި ނަމަވެސް، ފުލުހުން ކޯޓުގައި ބުނީ އެމީހުން މަސްތުވާތަކެތި ބޭނުން ކުރާކަމަށް ތުހުމަތު ކުރެވިގެން، މައްސަލަ ހުށަހެޅީ ވެސް ހާފްވޭ ހައުސް ބަލަހައްޓާ އެންޑީއޭ އިން ކަމަށް ފުލުހުން ބުންޏެވެ. 

މި މައްސަލަ ބެއްލެވި ގާޒީ ހުސައިން ފާއިޒު ރަޝާދު ވަނީ މި ދެ މީހުން ވެސް 10 ދުވަހަށް ބަންދުކުރުމަށް އަމުރުކުރައްވައިފަ އެވެ.