ދިވެހިރާއްޖޭގެ އިސްލާމީ ދަޢުވަތުގައި އިސްދައުރެއް އަދާކުރެއްވި ޝެއިޚް އިބްރާހީމް ފަރީދު އަޙުމަދުގެ ހަނދާނުގައި ބިނާ ކުރާ މިސްކިތަށް ބޭނުންވާ 7 ލައްކަ ރުފިޔާ، 24 ގަޑިއިރު ހަމަނުވަނީސް ހަމަވެއްޖެއެވެ. 

ޝެއިހް ފަރީދު ނިޔާވީ މިމަހު ނުވަވަނަ ދުވަހު މެލޭޝިޔާއަށް ވަޑައިގެންނެވިތާ މާ ގިނައިރެއް ނުވެ އެއާޕޯޓްގަ އެވެ.

ޝައިޚް ފަރީދުގެ އިސްލާމްދީނަށް ކުރެއްވި ޚިދުމަތުގެ އަގު ވަޒަންކޮށް، ނިޔާވުމަށްފަހުވެސް ޝެއިޚަށް މަންފާ ކުރާނޭ ދެމިގެންދާ ޞަދަޤާތެއް ކުރުމަށްޓަކައި، ޚިދުމަތް ޖަމިއްޔާއިން އިއްޔެ ވަނީ ޝެއިޚްގެ ނަމުގައި މިސްކިތެއް ބިނާ ކުރުމަށް ނިންމާފައެވެ.

ބަންގްލަދޭޝްގައި ބިނާ ކުރާ މި މިސްކިތް ބިނާކުރަން ފައިސާގެ އެހީތެރިކަން ދޭން ބޭނުންވާ ފަރާތްތަކަަށް އެ ފުރުސަތު ހުޅުވާލިތާ 24 ގަޑިއިރުވެސް ހަމަ ނުވަނީސް، ބޭނުންވާ އަދަދަށް ފައިސާ ހަމަވެފައިވާ ކަމަށް ޚިދުމަތް ޖަމިއްޔާއިން މިއަދު ވަނީ ބުނެފައެވެ. 

455 މީހުންގެ ޖާގައިގެ މި މިސްކިތް ބިނާކުރުމަށް ބޭނުންވާނެ ކަމަށް އެ ޖަމިއްޔާއިން ލަފާކޮށްފައިވަނީ 760،000 ރުފިޔާއެވެ. 

ޝައިޚް ފަރީދުގެ މައްޗަށް ކަށުނަމާދު ކޮށްފައިވަނީ މިއަދު މެންދުރު ނަމާދަށްފަހު، މެލޭޝިއާގެ ސައިބަޖާޔާގައި ހުންނަ ރާޖާ ހާޖީ ފީސަބީލިالله މަސްޖިދުގަ އެވެ. އިމާމްވެ ކަށުނަމާދު ކުރެއްވީ ޝެއިޚް ފަރީދުގެ ކޮއްކޮ އަދި އައްޝައިޚް އަލީ ޒައިދެވެ.

ޝެއިހް ނިޔާވީ އުމުރުން 53 އަހަރުގަ އެވެ. ޝެއިހަކީ ރާއްޖޭގައި ދީނީ ހޭލުންތެރިކަން އިތުރުކުރުމަށް އެންމެ ބުރަކޮށް މަސައްކަތް ކުރެއްވި އިލްމުވެރީންގެ ތެރޭގައި ވަރަށް ފާހަގަ ކޮށްލެވޭ ބޭފުޅެކެވެ.