މާލެސިޓީ ކައުންސިލް މުއައްޒަފުން ބޮޑީކެމެރާ ބޭނުންކުރަން ފެށުމަށް ތައްޔާރުވުމުގެ ގޮތުން އެކަމަށް ބޭނުންވާ ކެމެރާތައް ހޯދުމުގެ މަސައްކަތް ފަށައިފިއެވެ.

މާލެސިޓީ ކައުންސިލުން ވަނީ އެ ކައުންސިލަށް ގިނަ އަދަދެއްގެ ބޮޑީ ކެމެރާ ހޯދަން ގެޒެޓްގައި އާއްމުކޮށް އިއުލާނުކޮށްފައެވެ. ގެޒެޓްގައި ކޮށްފައިވާ އިއުލާނުގައިވާގޮތުން މާލެސިޓީ ކައުންސިލުން ބޮޑީ ކެމެރާ ހޯދުމަށް ނިންމާފައިވަނީ، އެ ކައުންސިލްގެ މަސައްކަތު ފެންވަރު ރަނގަޅުކުރުމާއި މުއައްޒަފުންގެ ސަލާމަތާއި ރައްކާތެރިކަމަށެވެ.

އިއުލާނުގައި ވާގޮތުން މާލެސިޓީ ކައުންސިލަށް 40 ބޮޑީ ކެމެރާ ބޭނުންވެއެވެ. އެގޮތުން އެކަމަށް ޝައުގުވެރިވާ ފަރާތްތަކަށް އޮންނަ މައުލޫމާތު ދިނުމުގެ ބައްދަލުވުން މިހިނގާ ޖޫންމަހުގެ 15 ވާ އާދިއްތަދުވަހު އޮންނާނޭކަމަށް އެ އިދާރާއިން ބުނެއެވެ.

ދައުލަތުގެ އިދާރާތަކުގެ ތެރެއިން ފުލުހުންގެ އިދާރާ ފިޔަވައި އިމިގްރޭޝަނުންވެސް އެ އިދާރާގެ އޮޕަރޭޝަންތަކުގައި ބޮޑީކެމެރާ ބޭނުންކުރެއެވެ. އިމިގްރޭޝަނުން ބޮޑީ ކެމެރާ ބޭނުންކުރަން ފަށާފައިވަނީ، މިއަހަރުެގ މެއިމަހުގެ ތެރޭގައެވެ. އެ އިދާރާއިން މިހާރު ބޮޑީ ކެމެރާ ބޭނުންކުރަނީ ފިލައިގެން އުޅޭ ބިދޭސީން ހޯދުމަށް ކުރިއަށްގެންދާ އޮޕަރޭޝަންތަކުގައެވެ. 

ފުލުހުންގެ އިދާރާއިން އާއްމުކޮށް މާލެ އަދި އަތޮޅުތެރޭގެ ރަށްތަކުގައި ހިންގާ އޮޕަރޭޝަންތަކުގައި 2022 ވަނަ އަހަރުން ފެށިގެން އަންނަނީ ބޮޑީކެމެރާ ބޭނުންކުރަމުންނެވެ.