ކ.ތުލުސްދޫގައި ތަރައްޤީކުރުމަށް ހަމަޖެހިފައިވާ އާ ހޮސްޕިޓަލް މަޝްރޫޢުގެ އަމަލީ މަސައްކަތް ފެށުމަށް އެމްޓީސީސީން ތައްޔާރުވެއްޖެއެވެ.

އެމްޓީސީސީއަށް ތުލުސްދޫ ހޮސްޕިޓަލް އެޅުމުގެ މަސައެްކަތް ހަވާލުކޮށްފައިވަނީ، މިއަހަރުގެ މާޗްމަހުގެ 28 ވަނަ ދުވަހުއެވެ. އެމްޓިސީސީން އެކްސްގައި ކުރި ޕޯސްޓެއްގައި ބުނެފައިވަނީ ތުލުސްދޫ އާ ހޮސްޕިޓަލް މަޝްރޫޢު ފެށުމުގެ އަމަލީ މަސައްކަތް މިއަދު އެކުންފުނިން ފަށާފައިވާކަމަށެވެ. އެގޮތުން އެމްޓީސީސީން ވަނީ ހޮސްޕިޓަލް އެޅުމަށް ހަމަޖެހިފައިވާ ބިން ސާފުކުރުމުގެ މަސައްކަތް ފަށައި އެ މަސައްކަތް ނިންމާލާފައެވެ.

ތުލުސްދޫގައި އެޅުމަށް ނިންމާފައިވަނީ 30 އެނދުގެ ހޮސްޕިޓަލެކެވެ. އެ މަސައްކަތް އެމްޓީސީސީއާ ސަރުކާރުން ހަވާލުކުރީ 110،716،537.72 މިލިއަން ރުފިޔާއަށެވެ. އެމްޓީސީސީން މި މަސައްކަތް 600 ދުވަހުގެ ތެރޭގައި ނިންމަންޖެހެއެވެ. 

ހޮސްޕިޓަލްގެ އިތުރުންވެސް އެމްޓީސީސީން ދަނީ ތުލުސްދޫގައި ފުލުހުންގެ އިމާރާތަކާއި އެކަމަޑޭޝަން ޔުނިޓެއް އެޅުމަށް ތައްޔާރުވަމުންނެވެ. 

ތުލުސްދޫގެ އިތުރުންވެސް ސަރުކާރުން ވަނީ، ހދ. ނެއްލައިދޫ ސިއްޙީމަރުކަޒުގެ އާ ޢިމާރާތުގެ މަސައްކަތާއި، ށ. މިލަންދޫ ހޮސްޕިޓަލްގެ އާ ޢިމާރާތުގެ މަސައްކަތުގެ އިތުރުން އއ. ރަސްދޫ ހޮސްޕިޓަލްގެ އާ އިމާރާތާއި ގއވިލިނގިލީ ހޮސްޕިޓަލް ޢިމާރާތްކުރަން އެމްޓީސީސީއާ ހަވާލުކޮށްފައެވެ.