އެޕްރީލް 18 ވަނަ ދުވަހުގެ ހެނދުނުގެ ވަގުތެއްގައި، ޒަޚަމްތަކަކާއެކު ޒުވާނަކު މާލޭ ގެއެއްގެ ފުރާޅުމަތީގައި އޮތްވައި ފެނިފައިވާ މައްސަލާގައި ދައުވާ އުުފުލާފައިވާ ގ. އެރިޔަދޫ، ރައުދު އަޙްމަދު ޛިލާލް ރާއްޖެއިން ބޭރަށް ފުރައިފި ކަމަށް ބުނެ ފަތުރާ ވާހަކަތައް ފުލުހުން ދޮގުކޮށްފި އެވެ.

ރައުދުގެ އާއިލާ ތިން މެންބަރަކާއި އޭނާގެ މަންމަ މިއަދު ބޭރަށް ފުރައިފި ކަމަށް ބުނެ ވާހަކަތަކެއް ދަނީ ފެތުރެމުންނެވެ. އެ މީހުން އެއާޕޯޓްގައި ތިބި މަންޒަރު ފެންނަ ކަމަށް ބުނާ ފޮޓޯއެއް ވެސް ދައުރު ކުރަމުން ދެ އެވެ.

ފުލުހުން ދެންމެ ބުނީ ރައުދު ރާއްޖެއިން ބޭރަށް ފުރި ކަމަށް ބުނާ ވާހަކައަކީ ދޮގެއް ކަމަށެވެ. ރައުދު ފުރުން މަނާކުރުމުގެ އަމުރު އަދިވެސް ދެމި އެބަ އޮތް ކަމަށް ވެސް ބުންޏެވެ.

އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށްނުދިނުމުގެ ކުށުގެ ދައުވާ ރައުދުގެ މައްޗަށް ވަނީ އުފުލާފަ އެވެ.

އެ ދައުވާގެ އަސާސީ އަދަބަކީ 1 މަހާއި 6 ދުވަހަށް ޖަލަށްލުމެވެ.

ދައުވާ ކުރި ސަބަބުގެ ގޮތުގައި ޕީޖީ އޮފީހުން ބުނީ، ހ. ފެންޓެނޯއީ ގޭގެ 9 ވަނަ ފަންގިފިލާގެ ސިޑި ގޮޅީގައި ހުންނަ ފެން ލައިޓުން، ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ވެއްޓުނުކަން އެނގިހުރެ، އޭނާއަށް އެހީތެރިވެދީފައި ނުވާތީއާއި، އޭނާއަށް އެހީތެރިކަން ހޯދުމަށް އެދި ކަމާ ގުޅުންހުރި އެއްވެސް އިދާރާއަކަށް ރިޕޯޓުކޮށްފައިނުވާތީ ކަމަށެވެ.

ރައުދުއަސް ކޮށްފައިވާ ދައުވާގެ އަސާސީ އަދަބަކީ އެއްމަސް ދުވަހަށް ޖަލަށް ލުން ކަމަށްވާއިރު، އޭނާ ވަނީ މި މައްސަލާގައި ހައްޔަރު ކުރެވި، އެއްމަސް ދުވަހަށްވުރެ ގިނަ ދުވަސް ވަންދެން ޖަލުގައި ހޭދަކޮށްފައެވެ. 

އެގޮތުން އެ މައްސަލާގައި އޭނާ އެންމެ ފުރަތަމަ ހައްޔަރު ކުރީ އޭޕްރީލް މަހުގެ 24ވަނަ ދުވަހުގެ ރޭ 18:20ގަ އެވެ. އެފަހުން ކްރިމިނަލް ކޯޓަށް ހާޒިރުކޮށް، އެންމެ ފުރަތަމަ އޭނާގެ މައްޗަށް ޖެހީ ފަސް ދުވަހެވެ.

އޭގެފަހުން، އިތުރު ދިހަ ދުވަސް ޖަހައި، އެ މުއްދަތު ހަމަވުމުން ފަސް ދުވަސް ޖަހުމަށްފަހު ވަނީ 20 ދުވަސް އިތުރުކޮށްފައެވެ. 

އަދި އެ މުއްދަތު ހަމަ ނުވަނީސް މިދިޔަ މަހު 22 ވަނަ ދުވަހުގެ ހެނދުނު އޭނާ ދޫކޮށްލާފައިވާއިރު، ހަމަ އެދުވަހު ފުލުހުން ވަނީ އޭނާ ހައްޔަރު ކޮށްފައެވެ.

އެފަހުން އޭނާއަށް ދައުވާ ކުރަން ޕީޖީ އޮފީހަށް ފޮނުވާފައިވާއިރު، ޕީޖީގެ ލަފާއާއެކު އޭނާ ވަނީ ބަންދުން ދޫކޮށްލާފައެވެ. 

އެހެންކަމުން، ދައުވާ ސާބިތުވެ އަންނަ ހުކުމުގެ ގޮތުން އޭނާ ޖަލުގައި އެންމެ ދުވަހެއްވެސް ހޭދަކުރަން ނުޖެހުމަކީ އެކަށީގެންވާ ކަމެކެވެ.