އިޒްރާއީލުގެ އަސްކަރިއްޔާއިން އަނެއްކާވެސް އީރާނަށް ހަމަލާދިނުމަށް ތައްޔާރުވަމުންދާކަމަށް އެޤައުމުގެ ނޫސްތަކުން ބުނެފިއެވެ.
ދަ ޓައިމްސް އޮފް އިޒްރާއީލުން ބުނެފައިވަނީ، އެޤައުމުގެ ވައިގެ ސިފައިން ތެހެރާނުގެ ނިއުކްލިއާ މަރުކަޒުތަކަށް ހަމަލާދިނުމަށް ތައްޔާރުވަމުން އަންނަކަމަށެވެ. އިޒްރާއީލްގެ ވައިގެ ސިފައިން ވަނީ ތެހެރާނުގެ މަރުކަޒްތަކަށް ހަމަލާދޭ މަންޒަރުތައް އެކްސްގައި އާއްމުކޮށްފައެވެ. މި ވީޑިއޯތައް އާއްމުކުރަމުން އިޒްރާއީލްގެ އަސްކަރިއްޔާއިން ބުނެފައިވަނީ އިތުރު ބެލަސްޓިކް މިސައިލްތައް ތެހެރާނަށް ފޮނުވާލުމަށް ތައްޔާރުވަމުންދާކަމަށެވެ.
އިޒްރާއީލްގެ ބޮޑުވަޒީރު ނަތަންޔާހޫ ބުނެފައިވަނީ، މި ހަމަލާތަކަކީ އީރާނުގެ ރައްޔިތުންނާ ދެކޮޅަށްދޭ ހަމަލާތަކެއް ނޫންކަމަށާއި، މިއީ އީރާނުގެ މިހާރުގެ ސަރުކާރާ ދެކޮޅަށް ދޭ ހަމަލާތަކެއްކަމަށެވެ. އެގޮތުން އިޒްރާއީލްގެ މަޤްސަދަކީ އީރާނުގެ ރައްޔިތުންނަށް އެޤައުމުގެ ސަރުކާރުގެ ހަރުކަށިކަމާ އަނިޔާވެރިކަމުން ނުލިބިވާ މިނިވަންކަން ރައްޔިތުންނަށް ހޯދައިދިނުން ކަމަށް ނަތަންޔާހޫ ބުންޏެވެ. މި ހަމަލާތަކާ ބެހޭގޮތުން ނަތަންޔާހޫ ދެއްކި ވާހަކަތަކުން ބޮޑަށް ދޭހަވަނީ އިޒްރާއީލް ސަރުކާރުގެ އަމާޒުހުރީ އީރާނުގެ ވެރިކަން ބަދަލުކުރުމާ ދިމާލަށްކަަމަށް މަސްރަހް ދިރާސާ ކުރާ ފަރާތްތަކުން ބުނެއެވެ.
އިޒްރާއީލްގެ ހަމަލާތަކާ ގުޅިގެން ބައިނަލްއަޤްވާމީ މުޖުތަމައުއިން ވަނީ އެގޮތަށް އީރާނަށް ހަމަލާދިނުމުގެ ހައްގު އެ ޤައުމަށް ލިބިގެން ނުވާަކަމަށްބުނެ ހަމަލާތައް ކުށްވެރިކޮށްފައެވެ. މީގެ ތެރޭގައި ސައުދީ، އިޓަލީ، ގަތަރު، އދ، އިރާގް، ފްރާންސް، ކުވައިތު، ޖޯޑަން، ހިމެނެއެވެ.
އިޒްރާއީލުން ތެހެރާނަށް އިއްޔެރޭ އަމާޒުކުރި ހަމަލާތަކުގެ ބޮޑުބައެއް އަމާޒުވީ އާއްމުން ދިރިއުޅޭ ސަރަހައްދުތަކަށްކަމަށް އީރާނުން ވަނީ ބުނެފައެވެ. އަދި ބައެއް ހަމަލާތައް ވަނީ އީރާނުގެ ޑިފެންސް ސިސްޓަމުން ވައިގެ ތެރެއަށް ގޮއްވާލާފައެވެ. ނަމަވެސް ކޮންމެވެސް ވަރަކަށް ނިއުކްލިއާ މަރުކަޒަކަށް ހަމަލާ އަރާފައިވާކަމަށް އީރާނުންނެވެސް ވަނީ އެއްބަސްވެފައެވެ.
އެ ހަމަލާތަކުގެ ރައްދެއްގެ ގޮތުން އީރާނުން ރޭ ވަނީ އިޒްރާއީލްގެ ތެލްއަވީވަށް މިސައިލް ހަމަލާތަކެއްދީފައެވެ. މީގެ ތެރެއިން ގިނަ ހަމަލާތައް ތެލްއަވީވަށް ވަނީ އަމާޒުވެފައެވެ. އިޒްރާއީލުން ބުނީ އީރާނުން ދިން ހަމަލާތަކުގައި، މިހާތަނަށް 2 މީހަކު މަރުވެ 20 މީހަކަށް އަނިޔާވެފައިވާކަމަށެވެ. އީރާނުން ތެލްއަވީވަށް ހަމަލާދިންއިރު، ގިނަބަޔަކު ތިބީ ބިންގަރާސްތަކަށްވަދެ އެތަންތަނުން ހިމާޔަތް ހޯދައިގެންނެވެ.
Advertisement
This content is created and paid for by advertisers and does not involve Voice Journalists
