ހުކުރު ދުވަހު އުރުދުންގެ ވައިގެ ސަރަގައްދުން އިސްރާއިލަށް ފޮނުވާފައުވާ މިސައިލްތަކާއި ޑްރޯންތައް ވައްޓާލާފައިވާ ކަމަށް އެގައުމުން ބުނެފިއެވެ.
އެގޮތުން އުރުދުންގެ ސިފައިން ނެރެފައިވާ ބަޔާނުގައި ބުނީ، ހުކުރު ދުވަހުގެ ހެނދުނު ރޯޔަލް އެއަރ ފޯސްގެ މަތިންދާ ބޯޓުތަކާއި އެއަރ ޑިފެންސް ސިސްޓަމްތަކުން، އުރުދުންގެ ވައިގެ ސަރަހައްދަށް ވަދެފައިވާ ގިނަ އަދަދެއްގެ މިސައިލްތަކާއި ޑްރޯންތައް ވައްޓާލާފައިވާ ކަމަށެވެ.
މިކަމާ ގުޅިގެން އުރުދުންގެ ސަރުކާރުގެ ތަރުޖަމާނު މުހައްމަދު މޮމާނީ އޭއެފްޕީއަށް ދެއްވި ބަޔާނެއްގައި ވިދާޅުވެފައިވަނީ އުރުދުނުގެ ވައިގެ ސަރަހައްދު ހުރަސްކުރުމުގެ ހުއްދަ އެއްވެސް ބަޔަކަށް ނުދޭނެ ކަމަށާއި، އެ ޤައުމަކީ އެއްވެސް ހަނގުރާމައެއްގެ މައިދާނަކަށް ނުވާނެ ކަމަށެވެ.
ހުކުރު ދުވަހު ފަތިހު އިސްރާއިލުން އީރާނަށް ދިން ހަމަލާއާ ގުޅިގެން އުރުދުނުގެ ވެރިރަށް އައްމާނުގައި އެއަރ ރެއިޑް ސައިރަންތަކުގެ އަޑުއިވުފައިވާއިރު ޕަބްލިކް ސެކިއުރިޓީ ޑައިރެކްޓަރޭޓުން ވަނީ ރައްޔިތުންނަށް ގޭގައި ތިބުމަށް އިލްތިމާސް ކޮށްފައެވެ.
އުރުދުންއިން އީރާނުގެ ދިފާއު ހަމަލާތައް ވައްޓާލާފައިވާއިރު، އެގައުމުގެ ސަރުކާރުން ވަނީ އިސްރާއިލުގެ ހަމަލާތައްވެސް ކުށްވެރިކޮށްފައެވެ. އެގޮތުން އުރުދުންއިން މި ހަމަލާ ސިފަކޮށްފައިވަނީ "އދ. ގެ މެމްބަރު ޤައުމެއްގެ ސިޔާދަތަށް ކުރި ސާފު ގޮންޖެހުމެއް" ކަމަށާއި "އެއީ ބައިނަލްއަޤްވާމީ ޤާނޫނާއި އދ. ގެ ޗާޓަރާ ޚިލާފް ޢަމަލެއް" ގޮތުގައެވެ.
މީގެ ކުރިން، 2024 ވަނަ އަހަރުގެ އޮކްޓޯބަރު މަހުވެސް އީރާނުން އިސްރާއިލަށް ފޮނުވި ގިނަ އަދަދެއްގެ މިސައިލްތަކާއި ޑްރޯންތައް އުރުދުނުން ވައްޓާލާފައި ވެއެވެ.
Advertisement
This content is created and paid for by advertisers and does not involve Voice Journalists
