ޝަރަފުވެރިކަމާއެކު މަގާމުން ވަކިވެވަޑައިގަންނަވާ އުއްތަމަފަނޑިޔާރަކަށް ލިބޭ އިނާޔަތް ބޮޑު ކުރުމަށް ފަނޑިޔާރުންގެ ރިޓަޔާމަންޓް ގަވާއިދު އިސްލާހުކުރަން ރައްޔިތުންގެ މަޖިލީހަށް ހުށަހަޅައިފި އެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން މަޖިލީހަށް އެކަން ހުށައެޅުމުން އެ މަސައްކަތް ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ވަނީ ފަށާފަ އެވެ. ޖޭއެސްސީން ހުށައަޅާފައި ވަނީ އެލަވަންސްގެ ގޮތުގައި މަހަކު 70,000 ރުފިޔާ ދިނުމަށެވެ. އަދި އެ ފަނޑިޔާރަކު ހިދުމަތް ކޮށްފައިވާ މުއްދަތަށް ބެލުމަށް ފަހު ޝަރަފުވެރިކަމާއެކު މަގާމުން ވަކިވެވަޑައިގަންނަވާއިރު ގަޑުކޮށް ލިބޭ އަދަދު ބޮޑު ކުރުމަށެވެ.

މީގެ އިތުރުން އެ ބޭފުޅަކު ކުރީން ދައުލަތުގެ އެހެން މަގާމެއް ފުރުއްވާފައިވާނަމަ އެކަމަށް ވެސް ރިޔާއަތްކޮށް އިނާޔަތް ދިނުމުގައި ބެލުމަށް ހިމަނާފައިވެ އެވެ.

މިއަދު އޮތް ކޮމެޓީ ބައްދަލްވުމުގައި މެންބަރުން ވަނީ މި މައްސަލާގައި ފުޅާ ދާއިރާއެއްގައި ބަހުސް ކޮށްފަ އެވެ. ސަރުކާރު މެންބަރުންގެ ވިސްނުމަކީ އެ ހުށައެޅުން ރަނގަޅު ކަމަށެވެ. ނަމަވެސް އެމްޑީޕީ މެންބަރުން ވަނީ އެއީ މިހާރު ހުންނެވި އުއްތަމަފަނޑިޔާރު އަހްމަދު މުއުތަސިމް އަދުނާނަށް ހާއްސަކޮށް ގެންނަ ބަދަލެއްގެ ގޮތުގައި ސިފަ ކޮށް އެ ބަދަލާއި ދެކޮޅު ހަދާފަ އެވެ.

އުއްތަމަ ފަނޑިޔާރު, މުއުތަސިމް އަދުނާނު މަގާމުން ވަކިވެވަޑައިގަންނަވާން ތައްޔާރުވެވަޑައިގަންނަވާ ކަމުގެ އިޝާރާތެއް ދެއްވުމަށް ފަހު އެ މަގާމުން ޝަރަފުވެރިކަމާއެކު ވަަކިވެވަޑައިގަތުމަށް ޖޭއެެސްސީއަށް ވަނީ ހުށައަޅާފަ އެވެ. އެ ހުށައެޅުމާމެދު ގޮތް ނިންމާ އެ ކޮމިޝަނުން މި ވަނީ އުއްތަމަފަނޑިޔާރަކަށް ލިބޭ އިނާޔަތް ބޮޑު ކުރުމަށް ފަނޑިޔާރުންގެ ރިޓަޔާމަންޓް ގަވާއިދު އިސްލާހުކުރަން ހުށައަޅާފަ އެވެ.

މިހާރު އޮތްގޮތުން މުއުތަސިމް ވަކިވެވަޑައިގަންނަވާއިރު ގަޑުކޮށް 500,000ރ ލިބިވަޑައިގަންނަވާނެ އެވެ. މުއުތަސިމް ވަނީ ނުވަ އަހަރަށް ވުރެ ދިގު މުއްދަތަކަށް ފަނޑިޔާާރުކަން ކުރައްވާފަ އެވެ. އަދި މަހަކު 70,000 ރުފިޔާ ލިބިވަޑައިގަންނަވާނެ އެވެ. އެއީ ފަނޑިޔާރު ކަމުގައި ހޭދަ ކުރެއްވި މުއްދަތާއި ދައުލަތަށް ހިދުމަތް ކުރެއްވި މުއްދަތަށް ބެލުމަށް ފަހު އެވެ.