ޖީއެމްސީ ނުވަތަ ޖެމްކިއު ސްކީމަކީ އޮޅުވާލައިގެން ހިންގާ ޕިރަމިޑް ސްކީމެއް ކަން ކަށަވަރު ވެފައިވާ ކަމަށާ އެ ސްކީމްގައި ބައިވެރިނުވުމަށް ދިވެހި ފުލުހުންގެ ހިދުމަތާއި ކެޕިޓަލް މާކެޓް ޑިވެލޮޕްމަންޓް އޮތޯރިޓީން އިލްތިމާސް ކޮށްފި އެވެ.

އެ ދެ އިދާރާ ގުޅިގެން މިރޭ ވަނީ ނޫސްބަޔާނެއް ނެރެފަ އެވެ. އެ ބަޔާނުގައި ބުނެފައި ވަނީ ޖީއެމްސީ ނުވަތަ ޖެމްކިއު ސްކީމަކީ ސީއެމްޑީއޭގައި ރަޖިސްޓްރީ ކޮށްގެން ހުއްދަ ނަގައިގެން ހިންގާ ސްކީމެއް ނޫން ކަމަށެވެ.

އެހެން ކަމުން އެއީ ގާނޫނީ ހަމަތަކުގެ ތެރެއިން ހިންގާ ސްކީމެއް ނޫން ކަމަށް ވަނީ ބުނެފަ އެވެ.

ދިވެހި ފުލުހުންގެ ހިދުމަތުން ބޭރު ގައުމުތަކުގެ ކަމާބެހޭ އިދާރާތަކާއި ގުޅިގެން ކުރި މަސައްކަތުން ޖީއެމްސީ ނުވަތަ ޖެމްކިއު ސްކީމަކީ އޮޅުވާލައިގެން ހިންގާ ޕިރަމިޑް ސްކީމެއް ކަން ކަށަވަރު ވެފައިވާ ކަމަށް ވެސް ބަޔާނުގައިވެ އެވެ. އަދި ބުނީ މި ސްކީމްގައި އާޓިފިޝަލް އިންޓެލިޖެންސް ޓެކްނޮލޮޖީ ބޭނުން ކޮށްގެން ކްރިޕްޓޯ ގްރިޑް ޓްރޭޑިން ކުރާ ކަމަށް ދެއްކި ނަމަވެސް އެއީ އޮޅުވާލުމެއް ކަމަށެވެ. 

އަދި މިފަދަ ޕިރަމިޑް ސްކީމްތަކުގައި ބައިވެރިވުމުގެ ހައްގު ވިއްކާލުމަކީ ވެސް ގާނޫނީ ގޮތުން ކުށެއްގެ ގޮތުގައި ކަނޑައަޅާފައިވާ އަމަލެއް ކަން ވެސް އެ ބަޔާނުގައި ވަނީ ފާހަގަކޮށްފަ އެވެ.

ބަޔާނުގައި އިތުރަށް ބުނީ ޓެކްނޮލޮޖީއާއެކު ތައާރަފުވަމުންދާ މިފަދަ ޕިރަމިޑް ސްކީމްތަކުގައި އިވެންސްޓް ނުކުރުމަށް އިލްތިމާސް ކުރާ ކަމަށެވެ. އަދި މިފަދަ ސްކީމްތަކުގެ ސަބަބުން އިޔާދަނުކުރެވޭވަރުގެ މާލީ ބޮޑެތި ގެއްލުންތަކާއި ކުރިމަތިލާން ޖެހިފައިވާ ކަން ފާހަގަކޮށް އެފަދަ ސްކީމްތަކުން ދުރުހެލިވެ ރައްކާތެރިވުމަށް ވަނީ އިލްތިމާސް ކޮށްފަ އެވެ.

މި މައްސަލަ ފުލުހުންނާއި ސީއެމްޑީއޭ އިން ގެންދަނީ ބޭރުގެ އެޖެންސީތަކުގެ އެހީގައި ތަހުގީގު ކުރަމުން ކަމަށް ވެސް ބަޔާނުގައިވެ އެވެ.

އަދި ބުނީ ޖެމްކިއު ސްކީމް ހިންގާ ޕްރޮމޯޓްކޮށް އޭގައި ބައިވެރިވުމަށް މީހުން ހޯދާ މީހުންނަށް ފިޔަވަޅު އެޅުމަށް ކުރަން ޖެހޭ މަސައްކަތް ކުރަމުންދާ ކަމަށެވެ.