ކުރީގެ ރައީސް މުހައްމަދު ނަޝީދުއާ އެމަނިކުފާނު ނިސްބަތްވާ ދަ ޑިމޮކްރެޓްސްގެ މެންބަރުންގެ ފަރާތުން އެމްޑީޕީގެ ޗެއާޕާސަން ފައްޔާޒް އިސްމާއީލްއާ ބައްދަލު ކުރައްވައިފި އެވެ.

މި ބައްދަލު ކުރެއްވުން އޮތީ ދަ ޑިމޮކްރެޓްސް ހިންގާ ބޮޑުފެންވަޅުގޭގަ އެވެ. އެ ބައްދަލްވުން އޮތީ މެންދުރުގެ ކެއުމަކާ އެކު އެވެ.

ބައްދަލްވުމާއި ގުޅޭގޮތުން ފައްޔާޒު ވަނީ އެކްސްގައި ޕޯސްޓެއް ކުރައްވާފަ އެވެ. ވިދާޅުވީ ރައީސް ނަޝީދާއި ޑިމޮކްރެޓްސްގެ މެންބަރުން ދެއްވި މެންދުރުގެ ކެއުމަށް ވަރަށް ބޮޑަށް ޝުކުރު ދަންނަވާ ކަމަށެވެ.

އަދި ވިދާޅުވީ ސިޔާސީ މަސްރަހަށް އަންނަ ބަދަލުތަކާއި ކުރިއަށް ކުރާން ހުރި މަސައްކަތާ ގުޅޭގޮތުން ވަރަށް ފުޅާ ދާއިރާއެއްގައި ހިޔާލުބަަދަލު ކޮށްލެވިއްޖެ ކަމަށެވެ.

ފައްޔާޒު ވިދާޅުވީ ގައުމު އަނބުރާ ހަމަމަގަށް އެޅުވޭނީ އިސްލާހަށް މަސައްކަތްކުރާ އެންމެން އެކުގައި މަސައްކަތް ކޮށްގެން ކަމަށެވެ.

ކުރީގެ ރައީސް މުހައްމަދު ނަޝީދުއާ އެމަނިކުފާނު ނިސްބަތްވާ ދަ ޑިމޮކްރެޓްސްގެ މެންބަރުންގެ ފަރާތުން އެމްޑީޕީގެ ޗެއާޕާސަން ފައްޔާޒް އިސްމާއީލްއާ ބައްދަލު ކޮށްފައިވާއިރު އެމްޑީޕީގެ ރިޔާސީ ޓިކެޓް ހޯދުމަށް އެ ޕާޓީގައި ބޮޑު ވާދައެއް އެބަ އޮތެވެ. އެ ވާދައިގެ ސަބަބުން ޕާޓީގައި ބައިބައިވުންތަކެއް އުފެދުމަކީ ވެސް ގާތް ކަމެކެވެ.

ފައްޔާޒު ވަނީ އެމްޑީޕީގެ ރިޔާސީ ޓިކެޓް ހޯއްދެވުމަށް ވާދަކުރެއްވުމުގެ ޝައުގުވެރިކަން ފާޅު ކުރައްވާފަ އެވެ. އެކަމަށް އެންމެ ފުރަތަމަ އިސްނަންގަވާ އެކަން މެންބަރުންނާއި ހިއްސާ ކުރެއްވީ ވެސް ފައްޔާޒު އެވެ. ފައްޔާޒުގެ އިތުރުން ކުރީގެ ރައީސް އިބްރާހިމް މުހައްމަދު ސޯލިހަށް ރިޔާސީ ޓިކެޓް ހޯދުމަށް އެމަނިކުފާނުގެ ސަޕޯޓަރުން ވަނީ ކެމްޕެއިނެއް ފަށާފަ އެވެ.

ކުރީގެ ފޮރިން މިނިސްޓަރު ޝާހިދު ވެސް އެމްޑީޕީގެ ރިޔާސީ ޓިކެޓަށް ޝައުގުވެރިކަމުގައި އަޑުތައް ފެތުރިފައިވެ އެވެ.

އެކަން އެހެން އޮއްވާ ކުރީގެ ރައީސް މުހައްމަދު ނަޝީދު ވަނީ އެމްޑީޕީއާ ޑިމޮކްރެޓްސްގެ ބައެއް އިސް ބޭފުޅުންނަށް މެސެޖެއް ކުރައްވާ ރިޔާސީ އިންތިހާބު ގައި ވާދަ ކުރައްވަން ޝައުގުވެރިވެވަޑައިގަންނަވާކަން ހާމަ ކުރައްވާފަ އެވެ. އެކަމާމެދު ދެކޭ ގޮތެއް އަންގައި ދިނުމަށް ވެސް އެމަނިކުފާނު އެދިވަޑައިގެންފައިވެ އެވެ.