ދިވެހިރާއްޖޭގައި ނުރައްކާތެރި ކެމިކަލް ވިއްކުމުގެ ހުއްދަ ނެގުމަށާއި ކެމިކަލް ގުދަންކުރާ ތަންތަން ރަޖިސްޓަރީ ކުރުމަށް ދިން މުއްދަތު، މިނިސްޓްރީ އޮފް ޑިފެންސުން އަނެއްކާވެސް އިތުރުކޮށްދީފިއެވެ.
މިނިސްޓްރީ އޮފް ޑިފެންސުން މިއަދު ކުރި އިޢުލާނެއްގައި ބުނި ގޮތުގައި، މީގެކުރިން މިކަމަށް ދީފައިވާ މުއްދަތު މިހާރު ވަނީ ހަމަވެފައެވެ. ނަމަވެސް، އެ މުއްދަތުގެ ތެރޭގައި ކެމިކަލް ވިއްކާ ފިހާރަތައް ރަޖިސްޓަރީކުރުމާއެކު ހުއްދައަށް އެދުނު ފަރާތްތަކުގެ އަދަދު ނިސްބަތުން ވަރަށް މަދުކަން އެ ވުޒާރާއިން ވަނީ ފާހަގަކޮށްފައެވެ.
މި ސަބަބަށްޓަކައި، ރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން "ކެމިކަލް ވިއްކުމުގެ ހުއްދަ" ނެގުމަށާއި، ކެމިކަލް ސްޓޯރުކުރާ ނުވަތަ ބަހައްޓާ ތަންތަން "މަކުޑި ޕޯޓަލް" މެދުވެރިކޮށް ރަޖިސްޓަރީ ކުރުމުގެ މުއްދަތު މިއަދުން ފެށިގެން އިތުރު 1 މަސް ދުވަހަށް ވަނީ އިތުރުކޮށްދީފައެވެ.
ޑިފެންސް މިނިސްޓްރީން ވަނީ، އަލަށް ދެވުނު މުއްދަތުގެ ތެރޭގައި ރަޖިސްޓަރީ ނުކޮށް ކެމިކަލް ވިއްކަމުންދާ ފަރާތްތަކާމެދު ފިޔަވަޅު އަޅާނެ ކަމުގެ އިންޒާރު ދީފައެވެ. އެގޮތުން، ގަވާއިދު ނަންބަރު 2019/R-1057 (ނުރައްކާތެރި ކެމިކަލާބެހޭ ގަވާއިދު 2019) ގެ ދަށުން އެފަދަ ފަރާތްތަކަށް ފިޔަވަޅު އަޅައި، ކުރިއަށް އޮތް ތަނުގައި ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ނުދެވޭނެ ކަމަށް ވެސް އެ ވުޒާރާއިން ހާމަކުރެއެވެ.
Advertisement
This content is created and paid for by advertisers and does not involve Voice Journalists
