ފަޅުރަށްރަށާ ބެހޭ އައު ޤާނޫނުގެ ދަށުން އެކުލަވައިލަންޖެހޭ ޤަވާއިދުތައް އަންނަ އޮކްޓޫބަރު މަހުގެ ތެރޭގައި ނިންމައި، މެރިކަލްޗާއަށް ޚާއްޞަކޮށްފައިވާ ސަރަޙައްދުތައް ހުޅުވައިލުމުގެ މަސައްކަތް ފެށޭނެ ކަމަށް މަސްވެރިކަމާއި ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.
ސަރުކާރުން ބޭއްވި "އަހާ" ފޯރަމުގައި ވާހަކަދައްކަވަމުން ވަޒީރު ވިދާޅުވީ، ރާއްޖޭގައި އުފެއްދެން ހުންނަ ބާވަތްތައް ބޭރުން އެތެރެކުރުން މަދުކޮށް، ކާބޯތަކެތީގެ ރައްކާތެރިކަން ކަށަވަރުކުރުމަކީ މި ސަރުކާރުން އެންމެ ބޮޑު އިސްކަމެއްދޭ އެއް ސިޔާސަތު ކަމަށެވެ.
އަދި މި ލަނޑުދަނޑި ޙާޞިލުކުރުމަށްޓަކައި ދަނޑުވެރިކަމާއި މެރިކަލްޗާގެ ދާއިރާއަށް ބޮޑެތި އިންވެސްޓްމަންޓްތަކެއް ބޭނުންވާކަމަށާ، އެ ދައިރާއިން އިންވެސްޓްމެންޓް ހޯދުމަށް މިފަހުން ތަސްދީޤު ކުރެވުނު ފަޅުރައްތަކާއި ބެހޭ އައު ޤާނޫނުން ހައްލުތަކެއް ހޯދާފައިވާ ކަމަށް ވަޒީރު ވިދާޅުވިއެވެ.
"އައު ޤާނޫނާއިއެކު އެކަމަށް ވާނެ އެޑްރެސްކޮށްފައި. ހާއްސަކޮށް އިމްޕޯޓް ރިޕްލޭސް ކުރަން ބޭނުންނަމަ، އިންޕޯޓް ކުރާ މިންވަރު ދަށް ކުރަން ބޭނުންނަމަ އިންވެސްޓމެންޓްތަކަށް ޖާގަަ ދޭންޖެހޭ. އަދި ދިވެހިރާޢްޖެއިން ބޭރުވާ ބޭރުފައިސާ އެބަހިފެހެއްޓޭ. ބޮޑެތި އިންވެސްޓްމެންޓްތައް އެބައާދޭ. އެހެންވެ ލުއިތައް ދީގެން އިންވެސްޓްމެންޓްތައް ގިނަ ކުރުމަށް އަޅުގަނޑުމެން މަސައްކަތް ކުރަނީ. " ޝިޔާމް ވިދާޅުވިއެވެ.
ވަޒީރުންގެ މަޖިލީހުން މެރިކަލްޗާ ތަރައްޤީކުރުމަށް 13 ސަރަޙައްދެއް ކަނޑައަޅާފައިވާއިރު، އެ ސަރަޙައްދުތަކުގައި މަޝްރޫޢުތައް ހިންގުމަށް ޝައުޤުވެރިކަން ފާޅުކޮށް ގިނަ ޢަދަދެއްގެ ޕްރޮޕޯސަލްތައް މިހާރުވެސް ވުޒާރާއަށް ލިބިފައިވާ ކަމަށް ޝިޔާމް ހާމަކުރެއްވިއެވެ. ނަމަވެސް އެ މަސައްކަތްތައް ކުރިއަށް ގެންދެވޭނީ ޤާނޫނުގެ ދަށުން ހަދަންޖެހޭ ޤަވާއިދުތައް ފުރިހަމަވުމުންނެވެ.
"ޤާނޫނަށް ޢަމަލުކުރަން ފެށި ޤަވާއިދުތައް ނިމޭއިރު އެ ސަރަޙައްދުތައް ވެސް ހުޅުވާލެވޭނެ. މީގެ ކުރިން އަޅުގަނޑުމެންނަށް ލިބިފައި ހުރި ޕްރޮޕޯސަލްތަކުގެ އިވެލުއޭޝަން ފެށެން އޮތީވެސް ޤަވާއިދު ނިމިގެން. އަޅުގަނޑުމެން އަމާޒު ހިފަނީ އޮކްޓޯބަރު މަހުގެ ފުރަތަމަ ހަފްތާގެ ތެރޭގައި ޤަވާއިދުތައް ނިންމައި ލިބިފައި ހުރި އަދި އަލަށް ލިބޭ ޕްރޮޕޯސަލްތަކާއެކު ކުރިއަށްދާން،" ވަޒީރު ވިދާޅުވިއެވެ.
މީގެއިތުރުން، ދަނޑުވެރިކަމުގެ ދާއިރާ ކުރިއެރުވުމަށްޓަކައި މީހުން ދިރިއުޅޭ 10 ރަށަކާ ގުޅިގެން ޚާއްޞަ މަސައްކަތްތަކެއް ފެށިފައިވާކަންވެސް ވަޒީރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
