ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރި މައްސަލާގައި އަތުލައިގަތް ތަކެތީގެ ބަރުދަނުގައި 1.5 ކިލޯ ހުރި ކަމަށް ފުލުހުން ބުނެފިއެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކޮށްފައިވަނީ ނޭޕާލަށް ނިސްބަތްވާ ދެ މީހުން ކަމަށެވެ. އެއީ އުމުރުން 47 އަހަރުގެ ނިއްކަ ތަމަންގް އަދި 40 އަހަރުގެ އީތްރާނީ ގަލެ އެވެ.
އެމީހުންނަށް ތުހުމަތުކުރެވެނީ ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކޮށް ސްމަގަލްކޮށް އެ ތަކެތި ޓްރެފިކްކުރާ ކަމަށެވެ.
މި ދެ މީހުންނަކީ ރާއްޖެއައި އިރު ހަށިގަނޑުގައި މަސްތުވާތަކެތި ރައްކާކޮށްގެން އެތެރެކުރަން އުޅުނު ކަމަށް ޝައްކުކުރެވިގެން މޯލްޑިވްސް ކަސްޓަމްސް ސާވިސްއިން ހިފަހައްޓައި ފުލުހުންނާ ހަވާލުކުރި ދެ މީހުންނެވެ.
ފުލުހުންގެ ޑްރަގް އެންފޯސްމަންޓުން އެ މީހުން ރަސްމީކޮށް ހައްޔަރުކޮށްފައިވަނީ މި ހިނގާ މަހުގެ 25 ވަނަ ދުވަހުއެވެ.
ފުލުހުން މަޢުލޫމާތު ދޭ ގޮތުގައި، މި ދެ މީހުން ބަލައިފާސްކުރިއިރު އެ މީހުންގެ ހަށިގަނޑުގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައިވާ 142 ބުލެޓް ފެނިފައިވެއެވެ. އަދި މި ތަކެތީގެ ވަގުތީ ބަރުދަނުގައި 1.5 ކިލޯއަށްވުރެ ގިނަ ހުރި ކަމަށް ފުލުހުން ބުނެއެވެ.
މި މައްސަލައާ ގުޅިގެން ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އެ ދެ މީހުންގެ ބަންދަށް 30 ދުވަހުގެ މުއްދަތެއް ދީފައެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
