މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު މުޙައްމަދުގެ އަނބިކަނބަލުން ޓުން ޑރ. ސިތީ ހަސްމާ މުޙައްމަދު ޢަލީ އުމުރުފުޅުން 100 އަހަރުގައި އަވަހާރަވެއްޖެއެވެ.

މެލޭޝިޔާގެ މީޑިއާތަކުން ރިޕޯޓްކޮށްފައިވާ ގޮތުގައި، ސިތީ ހަސްމާ އަވަހާރަވީ މިއަދު ކުއާލަލަމްޕޫރުގެ ނޭޝަނަލް ހާޓް އިންސްޓިޓިއުޓްގައެވެ. މަހާތީރު ވަނީ އެމަނިކުފާނުގެ އަނބިކަނބަލުން އަވަހާރަވިކަން ފޭސްބުކް މެދުވެރިކުރައްވައި ކަށަވަރުކޮށްދެއްވާފައެވެ. އެކަމަނާ އަވަހާރަވުމާ ގުޅިގެން ހޮސްޕިޓަލުން ހަށިކޮޅު ނެރުމުގައި އެންމެ ހަގު ދަރިކަލުން މުޚްރިޒް މަހާތީރު ބައިވެރިވެވަޑައިގެންނެވިއެވެ.

1956 ވަނަ އަހަރު މަހާތީރާ ކައިވެނިބައްލަވައިގަތް ސިތީ ހަސްމާގެ 7 ބޭފުޅުން ދުނިޔޭގައި އެބަތިއްބެވިއެވެ. އެ ދެމަފިރިން ދާދިފަހުން، އޯގަސްޓް 5 ގައި ވަނީ ކައިވެނީގެ ޕްލެޓިނަމް ޖުބިލީ ފާހަގަކުރައްވާފައެވެ.

ސިތީ ހަސްމާ އަވަހާރަވުމާ ގުޅިގެން މެލޭޝިޔާގެ ރަސްގެފާނު ސުލްޠާން އިބްރާހީމާއި ރާނީ ރާޖާ ޒަރިތު ސޯފިޔާ ވަނީ ޢާއިލާއަށް ތަޢުޒިޔާ ވިދާޅުވެ، ކެތްތެރިކަން ދެއްވުން އެދި ދުޢާ ދަންނަވާފައެވެ. އަދި ބޮޑުވަޒީރު އަންވަރު އިބްރާހީމް ވަނީ ރަސްމީ އިވެންޓެއްގެ ތެރެއިން އެ ޚަބަރު ހިއްސާކުރައްވައި، ސިތީ ހަސްމާގެ ފުރާނަފުޅަށް ހެޔޮ ދުޢާކޮށްދެއްވުމަށް އެދިވަޑައިގެންފައެވެ.

ސަރުކާރުން އިޢުލާންކުރި ގޮތުގައި، ސިތީ ހަސްމާގެ ޖަނާޒާގެ ކަންކަން ކުރިއަށްދާނީ ރަސްމީ ފެންވަރުގައެވެ. އެކަމަނާ ފަސްދާނުލުމަށް ހަމަޖެހިފައިވަނީ ޕުތުރާޖާޔާގެ ޕްރެސިންޓް 20 ގައި ހުންނަ ޤައުމީ ޤަބުރުސްތާނު، "ޕުސާރާ ނެގަރާވަން" ގައެވެ.

އަންވަރުގެ އަނބިކަނބަލުން ޑރ. ވަން އަޒީޒާ ވަން އިސްމާޢީލް ވިދާޅުވީ، ސިތީ ހަސްމާއަކީ ހިތްހެޔޮ، ކެތްތެރި އަދި އަބުރުވެރިކަމާއެކު އުޅެން އޭނާއަށް ދަސްކޮށްދެއްވި ވަރަށް ޚާއްޞަ ޝަޚްޞިއްޔަތެއް ކަމަށެވެ. 1998 ވަނަ އަހަރު އަންވަރު ބޮޑުވަޒީރުގެ ނައިބުކަމުން ވަކިކުރުމާ ގުޅިގެން ދެ ޢާއިލާގެ މެދުގައި ދުރުކަމެއް އުފެދުނު ނަމަވެސް، 2018 ގެ އިންތިޚާބަށް ދެ ބޭފުޅުން ސިޔާސީ ގޮތުން ވަނީ ގުޅިވަޑައިގަންނަވާފައެވެ.،

12 ޖުލައި 1926 ގައި ސިލަންގޯގެ ކްލަންގަށް އުފަންވެވަޑައިގެންނެވި ސިތީ ހަސްމާއަކީ ސިންގަޕޫރުގެ ކިންގް އެޑްވަރޑް 7 ކޮލެޖް އޮފް މެޑިސިން އިން 1955 ގައި ޑޮކްޓަރުކަން ހާސިލްކުރެއްވި، މެލޭޔާގެ އެންމެ ފުރަތަމަ މެލޭ އަންހެން މެޑިކަލް އޮފިސަރުންގެ ތެރޭގައި ހިމެނިވަޑައިގަންނަވާ ކަނބަލެކެވެ.