ޣައްޒާގައި ބޮޑު ޤަތުލުޢާއްމެއް ހިންގަމުންދާ އިސްރާއީލުގެ ބޮޑުވަޒީރު، ނިރުބަވެރި ބެންޖަމިން ނަތަންޔާހޫ ސިއްރު ދަތުރެއްގައި ޔުނައިޓެޑް އަރަބް އެމިރޭޓްސް (ޔޫއޭއީ) ގެ ވެރިރަށް އަބޫދާބީއަށް ގޮސް އެ ޤައުމުގެ ރައީސް ޝައިޚް މުޙައްމަދު ބިން ޒައިދު އަލް ނަހްޔާނާ ބައްދަލުކޮށްފި ކަމަށް އިސްރާއީލުގެ މީޑިއާތަކުން ރިޕޯޓްކޮށްފިއެވެ.

އިސްރާއީލުގެ ޗެނަލް 12 އިން ރިޕޯޓްކޮށްފައިވާ ގޮތުގައި، ނަތަންޔާހޫ އަބޫދާބީއަށް ދަތުރުކުރީ އަމިއްލަ ޖެޓެއްގައެވެ. އަދި އޭނާ ވަނީ ޔޫއޭއީގެ ރައީސާ ބައްދަލުކޮށް އެއް ދުވަސް އެ ޤައުމުގައި ހޭދަކޮށްފައެވެ. ނަމަވެސް، މި ދަތުރާ ގުޅޭގޮތުން ޔޫއޭއީގެ ސަރުކާރުން މިހާތަނަށް ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.

އިސްރާއީލުގެ ބްރޯޑްކާސްޓަރު 'ކާން' (KAN) އިން ބުނި ގޮތުގައި، މި ދަތުރަކީ ނަތަންޔާހޫގެ އޮފީހުން ކުރިން އިޢުލާނުކޮށްފައިވާ ދަތުރެއް ނޫނެވެ. 

ރިޕޯޓްތައް ބުނާގޮތުން ނަތަންޔާހޫ ދަތުރުކުރި ބޯޓު ބެން ގޫރިއަން އެއާޕޯޓުން ފުރައިގެން އަބޫދާބީއަށް ދިޔައީ މެންދުރުފަހު 3:10 ގައެވެ. އަދި ހަތަރު ގަޑިއިރު އެތަނުގައި ހޭދަކުރުމަށްފަހު، އެނބުރި އިސްރާއީލަށް ގޮސްފައިވަނީ އެރޭ 10:00 ހާއިރުއެވެ.

ޣައްޒާގައި ހިންގަމުންދާ ޖަރީމާތަކާއި ޤަތުލުޢާއްމާ ގުޅިގެން، ބައިނަލްއަޤްވާމީ ޖިނާއީ ކޯޓު (އައިސީސީ) އިން ވަނީ 2024 ވަނަ އަހަރު ނިރުބަވެރި ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރު ހައްޔަރުކުރުމުގެ އަމުރެއް ނެރެފައެވެ.

އިސްރާއީލުން ޣައްޒާއަށް ދެމުންގެންދާ ނުރައްކާތެރި ހަމަލާތަކުގައި މިހާތަނަށް ފަލަސްޠީނުގެ 74،000 އަށްވުރެ ގިނަ މީހުން ޝަހީދުކޮށްލާފައިވާއިރު، 175،000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ. މީގެ ތެރޭގައި ގިނައީ ކުށެއްނެތް އަންހެނުންނާއި ކުޑަކުދިންނެވެ. މީގެއިތުރުން ޣައްޒާގެ ޢިމާރާތްތަކާއި ވަސީލަތްތަކުގެ 90 އިންސައްތަ ވަނީ ސުންނާފަތިކޮށްލާފައެވެ.