ފ.އަތޮޅު މަގޫދޫގައި ސަރުކާރުން ތަރައްޤީކުރަމުންގެންދާ އެއާޕޯޓްގެ މަސައްކަތް ހުއްޓާނުލާކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.

މަގޫދޫ އެއާޕޯޓްގެ މަސައްކަތް ސަރުކާރުން ކުރިއަށްގެންދަން ބޭނުންނުވާކަމަށްބުނެ، އިދިކޮޅު ބައެއް ފަރާތްތަކުން ވަނީ މީގެ ކުރިން ވަރަށްގިނައިން އެވާހަކަތައް ދައްކާފައެވެ. މިކަމާ ގުޅޭގޮތުން އާއްމު ފަރާތަކުން މައުލޫމާތު ހޯދުމަށް ފޮނުވި ސިޓީއަކަށް ދެއްވި ޖަވާބެއްގައި ރައީސް އޮފީހުން ބުނެފައިވަނީ، ފ.މަގޫދޫގައި ހަދަމުންދާ އެއާޕޯޓްގެ މަސައްކަތް ހުއްޓާލުމަށް ކެބިނެޓުން ނިންމާފައިނުވާކަމަށެވެ. 

މަގޫދޫ އެއާޕޯޓްހގެ މައްސަލަ ހޫނުވެފައިވަނީ އެރަށް ކައިރީ އޮންނަ ނިލަންދޫގައި އެއާޕޯޓެއް އެޅުމަށް ނިންމުމާ ގުޅިގެން އުފެދިގެންދިޔަ ނުތަނަވަސްކަމުގެ ތެރެއިންނެވެ. 

ރައީސް އޮފީހުން ފޮނުވި ސިޓީ

މަގޫދޫ އެއާޕޯޓާ ގުޅޭގޮތުން މެއިމަހު ރައްޔިތުންގެ މަޖިލީހުގެ ތަޅުމުގައި ވާހަކަދައްކަވަމުން މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ވިދާޅުވެފައިވަނީ މި ދައުރުގެ ތެރޭގައި މަގޫދޫ އެއާޕޯޓް ހުޅުވާނޭކަމަށެވެ. މަގޫދޫ އެއާޕޯޓްގެ މަސައްކަތްތައް ކުރިއަށް ގެންދިއުމުގައި ލަސްތަކެއް ވެފައިވާކަން މިނިސްޓަރު ވަނީ އެދުވަހު ފާހަގަކުރައްވާފައެވެ. މިނިސްޓަރު އެދުވަހު ވިދާޅުވީ ކުރިން ނިލަންދޫގައި އެޅޫމަށް އޮތް ޕްރޮޖެކްޓެއް މަގޫދޫއަށް ބަދަލުކުރީ ރަނގަޅަށް ނޫންނަމަވެސް، ސަރުކާރުން މަގޫދޫ އެއާޕޯޓް މަސައްކަތް ހުއްޓާނުލައި ކުރިއަށްގެންދާނޭކަމަށެވެ. 

މަގޫދޫ އެއާޕޯޓުގެ 75 ޕަސެންޓް މަސައްކަތް މިހާރު ވަނީ ނިމިފައެވެ. މިނިސްޓަރު ވިދާޅުވެފައިވަނީ މަގޫދޫ އެއާޕޯޓްގެ މަޝްރޫއު ހުއްޓާލުމަކީ ރައްޔިތުންނަށް ވެސް އަދި އެ ސަރަހައްދުގައި ހުރި ރިސޯޓްތަކަށް ވެސް ފައިދާވާނެ ކަމެއް ނޫންކަމަށެވެ.

އެހެންނަމަވެސް އިންވެސްޓަރުންވެސް މުސްތަގުބަލުގައި އެ ސަރަހައްދުގައި އިންޓަނޭޝަނަލް އެއާޕޯޓެއް ބޭނުންވާކަން ފާހަގަކުރައްވަމުން ވަޒީރު މުއްޠަލިބް ވިދާޅުވެފައިވަނީ މަގޫދޫ އެއާޕޯޓުގެ އިތުރުން، ނިލަންދޫގައި އެއާޕޯޓެއް އެޅުމުން ލިބޭނެ ގެއްލުމެއް އޮތް ކަމަށް ފެނިވަޑައިނުގަންނަވާ ކަމަށެވެ.

މަގޫދޫ އެއާޕޯޓްގެ މަސައްކަތާ ގުޅޭގޮތުން އިދިކޮޅު އެމްޑީޕީންވެސް ވަނީ ކަންބޮޑުވުން ފާޅުކޮށްފައެވެ. މަގޫދޫ އެއާޕޯޓަކީ ދައުލަތުގެ ބަޖެޓުން 231.5 މިލިއަން ހަރަދުކޮށްގެން ތަރައްޤީކުރާ އެއާޕޯޓެކެވެ. މި އެއާޕޯޓް ރަންވޭ ދިގުމިނުގައި 1800 މީޓަރު ހުންނައިރު އެތަން ތަރައްޤީކުރަނީ ޕްރައިވެޓް ޖެޓް ޖެއްސޭގޮތަށެވެ.