ދިވެހިރާއްޖޭގެ އާބާދީގެ 7 އިންސަތައަކީ ނުކުޅެދުންތެރިކަން ހުންނަ ފަރާތްތައް ކަމަށް އިޖުތިމާޢީ ތަރައްޤީއާ ބެހޭ ވުޒާރާއިން ބުނެފިއެވެ. 

މިކަން ހާމަކޮށްފައިވަނީ ސަރުކާރު ވެބްސައިޓްގައި އެ ވުޒާރާއިން ޢާއްމު ކުރި ލިޔުމެއްގައެވެ.

ޔޫއެންގެ ގްލޯބަލް ޑިސްއެބިލިޓީ ފަންޑްސް އިން ރާއްޖޭގެ ނުކުޅެދުންތެރިކަން ހުންނަ މީހުންގެ ޙާލަތާއި ގުޅޭގޮތުން އެކުލަވާލައި ނެރެފައިވާ ރިޕޯޓްގައިވާގޮތުން، ނޭޝަނަލް ޕްރޮޓެކްޝަން އޮތޯރިޓީ، އެންސްޕާގެ ނުކުޅެދޭމީހުންގެ ދަފްތަރުގައި 14،000 ވުރެ ގިނަމީހުން އެބަތިއްބެވެ. 

އެހެން ނަމަވެސް، 2022 ވަނަ އަހަރުގެ ބޯހިމެނުމުގެ ތަފާސްހިސާބުތައް ދައްކާގޮތުން، ރާއްޖޭގެ ނުކުޅެދުންތެރިކަން ހުންނަ މީހުންގެ އަދަދު 24،401 އަށް އަރައެވެ. އަދި އެ އަހަރުގެ ބޯހިމެނުމުގެ ތަފާސް ހިސާބުތަކުން ރާއްޖޭގެ އާބާދީއަކީ 382،639 ކަން އެނގޭއިރު، ނުކުޅެދުންތެރިކަން ހުންނަ މީހުންގެ އިންސައްތަ %7 އަށް އަރައެވެ. އެހެންކަމުން ރާއްޖޭގެ އާބާދީގެ، ކޮންމެ 15 މީހުންގެ ތެރެއިން އެކަކީ ނުކުޅެދުންތެރިކަން ހުންނަ މީހެކެވެ. 

ރާއްޖޭގެ އާބާދީގެ ބޮޑު އިންސައްތައެއް ނުކުޅެދުންތެރިކަން ހުންނަ މީހުން ހިއްސާކުރާއިރު، ޝާމިލުކުރަނިވި މުޖުތަމަޢެއް ބިނާކުރުމަށް ނުކުޅެދުންތެރިކަން ހުންނަ ފަރާތްތަކާއި ގުޅުންހުރި މުހިންމު ކަންކަން ނިންމުމުގައި އެމީހުންގެ ޚިޔާލު ހޯދަންވާނެ ކަމަށް އިޖުތިމާޢީ ތަރައްގީއާ ބެހޭ ވުޒާރާއިން ބުނެއެވެ. އެގޮތުން، ޢާއިލާގެ ތެރޭގައި ނިންމާ ނިންމުންތަކާއި، ނުކުޅެދުންތެރިކަން ހުންނަ މީހެއްގެ މުސްތަޤުބަލާއި ގުޅުންހުރި ކަންކަން ނިންމުމުގައި، ވީހާވެސް ބޮޑަށް އެމީހުންގެ ބަސް ހޯދުމަކީ މުހިންމުކަމެއްކަން ފާހަގަކޮށްފައިވެއެވެ.

މީގެއިތުރުން، ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތަޢުލީމާއި، ތަޖުރިބާ އަދި އެކި ހުނަރުތައް ދަސްކުރުމުގެ ފުރުޞަތު ފަހިކޮށްދިނުމަކީ ވެސް ފުދުންތެރި އަދި ތަނަވަސް ޢާއިލާތަކެއް ބިނާކުރުމުގައި މުހިންމު ކަމެއް ކަމަށާ، މިކަމުގެ ސަބަބުން، ނުކުޅެދުންތެރިކަން ހުންނަ މީހުންގެ މަސައްކަތުގެ ޤާބިލުކަން އިތުރުކުރެވި، ވީހާވެސް ގިނަ ނުކުޅެދުންތެރިކަން ހުންނަ މީހުންނަށް ވަޒީފާގެ މައިދާނުތަކަށް ނުކުތުމަށް ހިތްވަރު ލިބިގެންދާނެ ކަމަށް ބުނެފައިވެއެވެ.

ހަމައެހެންމެ، ނުކުޅެދުންތެރިކަމާއި ގުޅޭގޮތުން މީހުން އަހުލުވެރިކަން އިތުރުކުރުމަށް ގިނަ ޕްރޮގްރާމްތައް ހިންގައި އެ ޕްރޮގްރާމްތައް މެދުވެރިކޮށް، ނުކުޅެދުންތެރިކަމަކީ ކޮބާކަމާއި، ޅަފަތުގައި ނުކުޅެދުންތެރިކަން ދެނެގަންނާނެ ގޮތްތަކާއި، އަދި ނުކުޅެދުންތެރިކަން ހުންނަ މީހުންނަށް ބޭނުންވާ ބައެއް ކަހަލަ ވަޞީލަތްތަކައި، ޚިދުމަތްތަކާއި ގުޅުންހުރި މަޢުލޫމާތު އާންމުންގެ ތެރޭގައި އިތުރުކުރުމަށްވެސް އެ ވުޒާރާއިން އިރުޝާދުދެއެވެ.