ކާޑެެއް ބޭނުން ކޮށްގެން އާރްޓީއެލް ބަސްތަކުން ހިލޭ ދަތުރުކުރެވޭ ކަމަށް ބުނެ، އެމްޓީސީސީގެ ނަމުގައި އަނެއްކާ ވެސް ސްކޭމް ހިންގާތީ ސަމާލުވުމަށް އިލްތިމާސްކޮށްފި އެވެ.
މިފަދަ ސްކޭމެއް ހިންގާތީ މީގެ ކުރިންވެސް އެމްޓީސީސީން ވަނީ ސަމާލުވާން އެދިފައެވެ.
އަނެއްކާވެސް އެފަދަ ޕޯސްޓުތަކެއް ދައުރުވާތީ އެކަމަށް ސަމާލުވުމަށް އެދި އެކުންފުނިން މީސްމީޑިއާގައި ކުރި ޕޯސްޓެއްގައި ބުނީ، 'މޯލްޑިވްސް ޕަބްލިކް ޓްރާންސްޕޯޓު'ގެ ނަމުގައި ހިންގާ ފޭސްބުކް ޕޭޖަކުން ސްމާޓް ކާޑަކަށް 35.58ރ.ގެ ފީއެއް ދެއްކުމުން އާރުޓީއެލް ބަސްތަކުގައި ހަ މަހަށް ހިލޭ ދަތުރުކުރެވޭނެ ކަމަށް ބުނެ ސްކޭމެއް ހިންގަމުންދާ ކަމަށެވެ.
އެ ޕޭޖަކީ އެމްޓީސީސީއާ އެއްވެސް ގުޅުމެއް އޮތް ޕޭޖެއް ނޫން ކަމަށާއި އެ ޕޭޖުން ޕްރޮމޯޓު ކުރާ ކަންކަމަކީ އަދި ހިންގާ ހަރަކާތްތަކަކީ ވެސް އެ ކުންފުންޏާ އެއްވެސް ގުޅުމެެއް އޮތް ކަންތައްތަކެއް ނޫން ކަމަށް އެމްޓީސީސީން ބުންޏެވެ.
އެ ކުންފުނިން އިތުރަށް ބުނީ ކަސްޓަމަރުންނާ ގުޅުން ހުރި އެއްވެސް ޕްރޮމޯޝަނެއް ފަށާ ނަމަ ނުވަތަ ކުރިއަށް ގެންދާ ނަމަ އެ މައުލޫމާތު ހިއްސާކުރާނީ އެމްޓީސީސީގެ ރަސްމީ އެކައުންޓުތަކުގައި ކަމަށެވެ.
އަދި މިފަދަ ޕޭޖު ތަކުން އާއްމުކުރާ އެއްވެސް ލިންކަކަށް ނުފިތުމަށްވެސް ވަނީ އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
