މިދިޔަ އޭޕްރިލްމަހުގެ 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި ހައްވާ ޔުމްނު ރަޝީދު، އައިޖީއެމް ހޮސްޕިޓަލްގައި އޮތްއިރު ފުލުހުންގެ ބޭނުމަށް ޓެސްޓެއް ހަދަން އުޅުމުން އާއިލާގެ ފަރާތުން އެކަމާ ދެކޮޅު ހެދިކަމަށް ރިޔާސީ ކޮމިޝަންގެ ރިޕޯޓްގައި ބުނެފިއެވެ.

ޔުމްނު ވެއްޓުނު މައްސަލައާ ގުޅޭގޮތުން ކޮމިޝަނުން މިއަދު ނެރުނު 72 ސަފްހާގެ ރިޕޯޓްގައި ބުނެފައިވަނީ، އޭޕްރިލްމަހުގެ 25 ވަނަ ދުވަހުގެ ރޭ ފުލުހުންގެ ފޮރިންސިކް ޕެތޮލޮޖިސްޓް، ޗީފް އިންސްޕެކްޓަރ އޮފް ޕޮލިސް ޑރ.ހަސަން އުމަރު، އައިޖީއެމްއެޗްގެ ޑރ. އާމިނަތު ޒައިބާއަށް ގުޅައި ހޮސްޕިޓަލުގެ ޑޮކްޓަރުންގެ ޓީމާ ބައްދަލުކޮށް ޔުމްނުގެ ކޭސް ތަހުގީގުކުރަންޖެހޭކަމަށް ބުނިކަމަށެވެ. އަދި ޔުމްނުގެ ފިންގަރޕްރިންޓާއި ޓެސްޓް ސާމްޕަލްތައް ނެގުމަށް ބޭނުންވާކަމަށް ފުލުހުން ވަނީ ބުނެފައެވެ.

ފުލުހުން އެހެން ބުނުމުން ޔުމްނުގެ އާއިލާއިން ޓެސްޓްހެދުމަށް އިންކާރުކުރަނިކޮށް ޓެސްޓު ހަދަން ހުއްދަދޭން އުނދަގޫވާނެކަމަށާއި، ކޯޓު އަމުރެއް ނަގައިގެން ފުލުހުން އަތުވެއްޖެނަމަ ޓެސްޓް ހެދުމަށް ފެސިލިޓޭޓް ކޮށްދޭނެކަމަށް ފުލުހުންގެ ގާތުގައި ޑރ. އާމިނަތު ޒައިބާ ބުނެފައިވާކަމަށެވެ.

ނަމަވެސް ޖެހިގެންއައިދުވަހު ފުލުހުން ޔުމްނުގެ އާއިލާގެ ފަރާތުން އެ މައްސަލާގައި ލީޑްނަގައިގެން އުޅޭ ފަރާތާ ވާހަކަދައްކައި ޓެސްޓްތައް ހެދުމަށް ހުއްދަދީ ޓެސްޓްތައް އިއުތިރާޟެއް ނެތްކަމަށް  ބުނުމުން ޓެސްޓްތައް ހެދުމުގެ ހުއްދަ ދީފައިވާކަމަށެވެ. ނަމަވެސް އެދުވަހު ޔުމްނުގެ އަތުގެ ފިންގަރ ޕްރިންޓް ނެގުނުއިރު، ރޭޕް ކިޓް ޓެސްޓް ހަދާފައިނުވާނޭކަން ޑރ.އާމިނަތު ނަޖީބާ ބުނެފައިވާކަމަށްވެސް ރިޕޯޓްގައި ވެއެވެ.

ރިޕޯޓްގެ ސްކްރީން ޝޮޓެއް.. ސަފްހާ: 37

ރިޕޯޓްގައި އިތުރަށް ބުނެފައިވަނީ ޔުމްނުގެ އާއިލާއިން މެޑިކޯ ލީގަލް ރިޕޯޓް ފުރިހަމަ ކުރުމަށް އެއްބާރުލުން ނުދިންކަމަށާއި ސަބަބެއްކަމަށް ބުނެފައިވަނީ، ޓެސްޓު ހަދަންވީ ވަގުތު ފާއިތުވެގެން ދިއުމުންކަމަށެވެ. ނަމަވެސް 72 ގަޑިއިރު ވީނަމަވެސް އެ ޓެސްޓްތައް ހެދުން މުހިއްމުކަމަށް އަންހެނުންނާބެހޭ ޑޮކްޓަރު އާއިލާއަށް ކިޔައިދީފައިވާކަމަށްވެސް ކޮމިޝަނުގެ ރިޕޯޓްގައި ވަނީ ބުނެފައެވެ. އަދި ފުލުހަށް ޓެސްޓް ރިޕޯޓް ނޮފޮނުވާމަތިން ޓެސްޓް ހަދަން ހުުއްދަ ދޭނޭކަމަށްވެސް ޔުމްނުގެ އާއިލާއިން ބުނެފައިވާކަމަށްވެސް މިއަދު ނެރުނު ރިޕޯޓްގައި ވަނީ ބުނެފައެވެ. ރިޕޯޓްގައި އިތުރަށް ބުނެފައިވާގޮތުން ޖިންސީ އަނިޔާއެއް ލިބިފައިވޭތޯ ބެލުމަށް ހަދާ ޓެސްޓްވެސް ހެދިފައިނުވާކަން ވަނީ ފާހަގަކޮށްފައެވެ.

އައިޖީއެމް ހޮސްޕިޓަލުން ފަރުވާދިނުމަށްފަހު ޔުމްނު މެލޭޝިއާއަށް ފޮނުވާލާފައިވަނީ އޭޕްރިލްމަހުގެ 26 ވަނަ ދުވަހުގެ ރެއެވެ. ޔުމްނު ރާއްޖެއިން ބޭރަށް ގެންގޮސްފައިވަނީ އައިޖީއެމްއެޗްގައި ހަފްތާއެއްހާދުވަހު ފަރުވާދިނުމަށްފަހުއެވެ.